پەرەگراف
هێزەكانی سووریای دیموكرات (هەسەدە) ڕایگەیاند "شەش شەڕڤانمان لە هێرشێكی درۆنیدا بۆ سەر ئەكادیمیایەكی مەشق و ڕاهێنان لە دێرەزوور شەهید بوون". ڕووانگەی سووریش دەڵێت "هێزەكانی كۆماندۆی هەسەدە كراونەتە ئامانج و 25 كوژراو و بریندار هەن".
هێرشەكە شەوی ڕابردوو ئەنجام دراوە و هەسەدە لە ڕاگەیەندراوێكدا دەڵێت "هێرشێكی تیرۆریستی لە ناوچەكانی ژێر كۆنترۆڵی بەكرێگیراوانی ڕژێمی سووریاوە بە درۆنی بۆمبڕێژكراو كرایە سەر ئەكادیمیایەكی مەشق و ڕاهێنان لە كێڵگەی عومەر لە ڕۆژهەڵاتی پارێزگای دێرەزوور".
بەڵام ڕوونگەی سووری بۆ مافەكانی مرۆڤ ڕەتی دەكاتەوە هێرشەكە لەناو خاكی سووریاوە ئەنجام درابێت و دەڵێت "فڕۆكە بێفڕۆكەوانەكە لەلایەن موقاوەمەی ئیسلامییەوە لەناو خاكی عێراقەوە ئاراستەی ئەكادیمیاكەی هەسەدە كراوە".
هێزەكانی سووریای دیموكرات "شەهیدبوونی شەش شەڕڤان"ـی خۆی ڕاگەیاندووە، بەڵام ڕامی عەبدولڕەحمان، بەڕێوەبەری ڕووانگەی سووری بۆ مافەكانی مرۆڤ، دەڵێت "هێزی تایبەت و كۆماندۆی هەسەدەی لە بەشی ئەكادیمیای مەشق و ڕاهێنان لە كێڵگەی نەوتی عومەر كردووەتە ئامانج، 25 كوژراو و برینداری لێ كەوتووەتەوە، بەلای كەمەوە حەوت كوژراو هەیە".
هێزەكانی سووریای دیموكرات وەڵامدانەوەی هێرشەكە لە "كات و ساتی دیاریكراودا" بە مافی خۆی ناو دەبات.
لە كێڵگەی نەوتی عومەر كە لەلایەن میلیشیاكانی نزیك لە ئێرانەوە كراوەتە ئامانج، شەڕڤانانی هەسەدە و هێزەكانی ئەمریكا هەن.
لە دوای هێرشی سەر بنكە سەربازییەكەی ئەمریكا لە ئوردون، ئەمە دووەم هێرشی گرووپە چەكدارییەكانی "موقاومەی ئیسلامی"یە كە كوژرانی لێ دەكەوێتەوە.