عەشیرەتی عوزێری: كوێخا دێرین ئەركی لەناو دەسەڵاتدا بووە و فەرمانی لەوێوە وەرگرتووە
پەرەگراف
عەشیرەتی سمایل عوزێری لەبارەی دۆسیەی "كوێخا دێرین"ـەوە نیگەرانن و دەڵێن دەبوایە دۆسیەكە "بە هێمنی و سەلیقە"وە مامەڵەی لەگەڵ بكرایە و "نیگەرانین و زۆر پێمان قورسە كە ناوی ئێمە لەسەر شاشەی تەلەفزیۆنەكان زۆر بە زەقی دەنووسرێت".
ئەمڕۆ ژمارەیەك لە كەسایەتییەكانی عەشیرەتی سمایل عوزێری كۆنگرەیەكی ڕۆژنامەوانییان ئەنجام دا و تێیدا ئەكرەم عەبدوڵڵا، سەرۆكی عەشیرەتەكە، وتی "ئەم كوڕەی ئێمە ئەرك و دەوامی لەناو دەسەڵات و پێگە سەربازییەكاندا بووە و فەرمانی لەوێوە وەرگرتووە، چەك و جبەخانەی ئەوانی پێ بووە و ئەوان ئاگایان لە هەڵسوكەوتەكانی بووە، بەڵام بەداخەوە ئێمەیان كردووە بە واجیهە".
پەیامێكیشی ئاراستەی كوێخا دێرین كرد و وتی "تۆ كەسێكی بەدەر نیت لە دەسەڵات و یاسا و چەك و جبەخانەی ئەوانت پێیە و پارێزگاریت لە یاسا كردووە، دەبێت لە هەموو كەسێك زیاتر پابەندی یاسا بیت".
سەرۆكی عەشیرەتی سمایل عوزێری لەبارەی تۆمەتی "سەرانەسەندن" كە دراوەتە پاڵ كوێخا دێرین، وتی "ئێمە لە ڕاگەیاندنەكانەوە بیستوومانە و باوەڕیشمان بەوە نییە شتەكە بەو شێوەیە بێت، دەبێت دادگا یەكلای بكاتەوە".