پەرەگراف
ئەنجوومەنی پاراستنی بەرژەوەندییە باڵاكانی یەكێتی داوای "هەڵوەستەكردن" لەسەر لێدوانێكی سەرۆكی ئەنجوومەنی باڵای دادوەریی عێراق دەربارەی "پێكهاتنی هەرێمی كوردستان و پێكهێنان و دروستبوونی هەرێمی نوێی فیدراڵی لە عێراقدا" دەكات.
ئەنجوومەنەكەی یەكێتی بە چوار خاڵ ڕەخنەی لە لێدوانەی فایەق زێدان گرتووە كە پێكهێنانی قەوارەی دەستووریی هەرێمی خستووەتە ژێر پرسیارەوە و داوا لە فراكسیۆنی یەكێتی لە پەرلەمانی عێراق دەكات كە "لە پاڵ فراكسیۆنە كوردستانییەكانی تردا، هەڵوەستەیەك بكەن، لەسەر لێدوانەكانی ڕۆژی 18/2/2024ی سەرۆكی ئەنجوومەنی باڵای دادوەری عێراق".
بەپێی ڕاگەیەندراوەكە، فایەق زێدان لەو لێدوانەیدا ناوی هەرێمی كوردستان وەكوو "واقیعێكی جوگرافی و نەتەوەیی" بردووە كە "هەلومەرجی دوای داگیركردنی كوێت هێناویەتە ئاراوە"، ئەنجوومەنی پاراستنی بەرژەوەندییە باڵاكانی یەكێتی دەڵێت "دەبوو وەكوو هەرێمێكی دەستووریی فیدراڵی ناوی بهێنایە، ئاماژە بە ماددەی 117/ یەكەم لە دەستووری هەمیشەیی عێراق".
هەروەها سەرنجێكی دیكەی ئەنجوومەنەكەی یەكێتی لەسەر لێدوانەكەی سەرۆكی ئەنجوومەنی باڵای داوەری ئەوەیە كە هەرێمی كوردستان بە "بارێكی تایبەت - وچع خاص" ناو دەهێنێت و دەیبەستێتەوە بە "دانپیادانانی سەرجەم ڕۆڵەكانی گەلی عێراق"، نەك بە قەوارەیەكی یاسایی چەسپی و لە دەستووری هەمیشەیی عێراقدا.
ئەنجوومەنەكەی یەكێتی لە خاڵێكی دیكەدا دەڵێت "فایەق زێدان گومان دەخاتە سەر هەلومەرجەكانی سەردەمی داڕشتنی بنەماكانی دەستووری هەمیشەیی عێراق و بە ڕەهایی دەڵێت: (ئێستا ئەو هەلومەرجە گۆڕدراوە لە لای ئەوانەی باوەڕیان بەو بنەمایانە هەبووە و لە ئێستادا باوەڕیان بە گۆڕینیەتی)، بێ ئەوەی ڕەچاوی ئەوە بكات كورد بەشدار بووە لە داڕشتنی ئەو بنەما دەستوورییانە و هیچ كات پەشیمانبوونمان لە داڕشتنی ئەو بنەمایانە ڕانەگەیاندووە".
ئەنجوومەنی پاراستنی بەرژەوەندییە باڵاكانی یەكێتی ئاماژەی بە گۆشەیەكی دیكەی لێدوانەكەی فایەق زێدان كردووە كە تێیدا "بیرۆكەی پێكهێنانی هەرێمی نوێ لە هەر ناوچەیەكی عێراق ڕەت دەكاتەوە و بە هەڕەشەی دادەنێت لەسەر یەكگرتوویی و ئاسایشی عێراق". ئەنجوومەنەكەی یەكێتی ئەم هەڵوێستە بە "ڕەچاونەكردن"ـی ئەوە ناو دەبات كە "پێكهێنانی هەرێمی نوێ لە عێراقدا (مافێكی دەستووری)یە نەك (بیرۆكە)" و دەشڵێت "ئەو مافە بە ماددەی (117/ دووەم، 118، 119) چەسپێنراوە و بە یاسای ژمارە (13)ـی ساڵی (2008) ڕێكارەكانی دانراوە".
ئەنجوومەنی پاراستنی بەرژەوەندییە باڵاكانی یەكێتیی نیشتمانی كە لەدوای كۆنگرەی چوارەمی یەكێتییەوە پێكهێنرایەوە، جەعفەر شێخ مستەفا سەرۆكایەتیی دەكات، بەڵام هێشتا بافڵ تاڵەبانی ئەندامەكانی ئەنجوومەنەكەی دیاری نەكردووە كە لە دەسەڵاتەكانی خۆیەتی. ئەمەش یەكەم ڕاگەیەندراوی ئەو ئەنجوومەنە بوو لە دوای پێكهێنانی.