میدیای یەكێتی ڕاگەیەندراوەكەی جەعفەر شێخ مستەفای سڕییەوە كە ڕەخنەی لە فایەق زێدان گرتبوو
پەرەگراف
میدیای فەرمیی یەكێتی ئەو ڕاگەیەندراوەی ئەنجوومەنی پاراستنی بەرژەوەندییە باڵاكانی یەكێتیی سڕییەوە كە تێیدا ڕەخنە لە سەرۆكی ئەنجوومەنی باڵای دادوەریی عێراق گیرابوو، هیچ ڕوونكردنەوەیەكیشی لەبارەی هۆكاری سڕینەوەی ڕاگەیەندراوەكەوە بڵاو نەكردووەتەوە.
ئەنجوومەنی پاراستنی بەرژەوەندییە باڵاكانی یەكێتی كە لە كۆنگرەی چوارەمی یەكێتی پێكهێنرا و لە كۆنگرەی پێنجەمی ئەو حیزبە گۆڕانكاریی تێدا كرا، لەلایەن جەعفەر شێخ مستەفاوە سەرۆكایەتیی دەكرێت و ئێوارەی ئەمڕۆ یەكەم ڕاگەیەندراوی لە دوای كۆنگرەی پێنجەم بڵاو كردەوە.
لە ڕاگەیەندراوەكەدا كە میدیای فەرمیی یەكێتی بڵاوی كردەوە، ئەنجوومەنی پاراستنی بەرژەوەندییە باڵاكانی یەكێتی داوای "هەڵوەستەكردن" لەسەر لێدوانێكی سەرۆكی ئەنجوومەنی باڵای دادوەریی عێراق دەربارەی "پێكهاتنی هەرێمی كوردستان و پێكهێنان و دروستبوونی هەرێمی نوێی فیدراڵی لە عێراقدا" كردبوو.
ئەنجوومەنەكەی یەكێتی بە چوار خاڵ ڕەخنەی لە لێدوانێكی فایەق زێدان گرتووە و داوا لە فراكسیۆنی یەكێتی لە پەرلەمانی عێراق دەكات كە "لە پاڵ فراكسیۆنە كوردستانییەكانی تردا، هەڵوەستەیەك بكەن، لەسەر لێدوانەكانی ڕۆژی 18/2/2024ی سەرۆكی ئەنجوومەنی باڵای دادوەری عێراق".
بەڵام دوای چەند كاتژمێر لە بڵاوكردنەوەی ڕاگەیەندراوەكە، ماڵپەڕی (PUKMEDIA) كە میدیای فەرمیی یەكێتییە، هەواڵی پەیوەست بە ڕاگەیەندراوەكەی سڕییەوە و هیچ ڕوونكردنەوەیەكیشی لەبارەی هۆكاری سڕینەوەی بڵاو نەكردووە.
بەپێی ڕاگەیەندراوەكەی ئەنجوومەنی پاراستنی بەرژەوەندییە باڵاكانی یەكێتی، فایەق زێدان لەو لێدوانەیدا ناوی هەرێمی كوردستانی وەكوو "واقیعێكی جوگرافی و نەتەوەیی" بردووە كە "هەلومەرجی دوای داگیركردنی كوێت هێناویەتە ئاراوە"، ئەنجوومەنی پاراستنی بەرژەوەندییە باڵاكانی یەكێتی دەڵێت "دەبوو وەكوو هەرێمێكی دەستووریی فیدراڵی ناوی بهێنایە، ئاماژە بە ماددەی 117/ یەكەم لە دەستووری هەمیشەیی عێراق".
هەروەها سەرنجێكی دیكەی ئەنجوومەنەكەی یەكێتی لەسەر لێدوانەكەی سەرۆكی ئەنجوومەنی باڵای داوەری ئەوەیە كە هەرێمی كوردستان بە "بارێكی تایبەت - وچع خاص" ناو دەهێنێت و دەیبەستێتەوە بە "دانپیادانانی سەرجەم ڕۆڵەكانی گەلی عێراق"، نەك بە قەوارەیەكی یاسایی چەسپی و لە دەستووری هەمیشەیی عێراقدا.
ئەنجوومەنەكەی یەكێتی لە خاڵێكی دیكەدا دەڵێت "فایەق زێدان گومان دەخاتە سەر هەلومەرجەكانی سەردەمی داڕشتنی بنەماكانی دەستووری هەمیشەیی عێراق و بە ڕەهایی دەڵێت: (ئێستا ئەو هەلومەرجە گۆڕدراوە لە لای ئەوانەی باوەڕیان بەو بنەمایانە هەبووە و لە ئێستادا باوەڕیان بە گۆڕینیەتی)، بێ ئەوەی ڕەچاوی ئەوە بكات كورد بەشدار بووە لە داڕشتنی ئەو بنەما دەستوورییانە و هیچ كات پەشیمانبوونمان لە داڕشتنی ئەو بنەمایانە ڕانەگەیاندووە".
ئەنجوومەنی پاراستنی بەرژەوەندییە باڵاكانی یەكێتی ئاماژەی بە گۆشەیەكی دیكەی لێدوانەكەی فایەق زێدان كردووە كە تێیدا "بیرۆكەی پێكهێنانی هەرێمی نوێ لە هەر ناوچەیەكی عێراق ڕەت دەكاتەوە و بە هەڕەشەی دادەنێت لەسەر یەكگرتوویی و ئاسایشی عێراق". ئەنجوومەنەكەی یەكێتی ئەم هەڵوێستە بە "ڕەچاونەكردن"ـی ئەوە ناو دەبات كە "پێكهێنانی هەرێمی نوێ لە عێراقدا (مافێكی دەستووری)یە نەك (بیرۆكە)" و دەشڵێت "ئەو مافە بە ماددەی (117/ دووەم، 118، 119) چەسپێنراوە و بە یاسای ژمارە (13)ـی ساڵی (2008) ڕێكارەكانی دانراوە".
ئەنجوومەنی پاراستنی بەرژەوەندییە باڵاكانی یەكێتیی نیشتمانی كە لە كۆنگرەی پێنجەمی ئەو حیزبەدا جەعفەر شێخ مستەفا بە سەرۆكی هەڵبژێردرا، بەپێی پەیڕەوی ناوخۆی یەكێتی ژمارەی ئەندامانی لە نێوان (9 بۆ 15) ئەندام دەبێت و لەلایەن سەرۆكی یەكێتییەوە دیاری دەكرێن، بەڵام تا ئێستا ئەندامەكانی دانەنراون.