وەزیری دارایی عێراق: دەبێت مووچەى مووچەخۆرانی هەرێم بەنیشتمانی بكرێت و لەڕێگەی كارتی بانكییەوە بێت
پەرەگراف
وەزارەتی دارایی عێراق پارە بۆ مووچەی ئەم مانگەی فەرمانبەرانی هەرێم بەپێی لیستی مووچە دەنێرێت و بۆ مانگی داهاتوو كراوە بە مەرج كە دەبێت فەرمانبەران هەژماری بانكیی لە بانكە عێراقییەكان بكەنەوە، بەپێچەوانەوە مووچەیان پێ نادرێت.
تەیف سامی وەزیری دارایی عێراق، لەگەڵ لیژنەی دارایی پەرلەمانی عێراق كۆبووەوە و لە وەڵامی ئەندامانی لیژنەكەدا ڕایگەیاند، پێدانی مووچەی فەرمانبەرانی هەرێمی كوردستان بۆ ئەم مانگە، پەیوەستە بە پێشكەشكردنی لیستی ناوی مووچەخۆران لەلایەن حكومەتی هەرێمەوە.
وەزیری دارایی عێراق، لەبارەی بڕیارەكەی دادگای فیدراڵییەوە دەڵێت، بڕیارەكە لە بەرژەوەندیی مووچەخۆرانی هەرێمەو مووچەی فەرمانبەران بۆ ساڵی 2024 بە تەواوەتی گرەنتی كراوە.
تەیف سامی جەختی لەوە كردووەتەوە كە دەبێت مووچەی مانگی سێی مووچەخۆرانی هەرێم، لەڕێگەی كارتی بانكییەوە بێت، وەك ئەوەی لە بڕیارەكەی دادگای فیدراڵیدا هاتووەو بەبێ ئەوە مووچەیان بۆ خەرج ناكرێت.
بەپێی بڕیارەكەی دادگای فیدراڵی، پێویستە حكومەتی هەرێم مانگانە لیستی مووچە ئاڕاستەی وەزارەتی دارایی عێراق بكات بە ئامانجی پارەداركردنی، بەڵام پارەكە نادرێتە وەزارەتی دارایی هەرێم تا دابەشی بكات، بەڵكو پێویستە سەرجەم فەرمانبەرو مووچەخۆرانی هەرێم هەژماری بانكییان بۆ بكرێتەوە لە بانكە حكومییە عێراقییەكان و مانگانە مووچەكانیان بخرێتەسەر هەژمارەكانیان.
هەریەكە لە بانكەكانی ڕەشیدو ڕافیدەین و بانكی بازرگانی عێراقی، سێ بانكی سەربە حكومەتی عێراقن و تەنها بانكی بازرگانی لقی لە هەرێمی كوردستان هەیە، كردنەوەی هەژمار بۆ سەرجەم مووچەخۆرانی هەرێم كاتێكی زۆری دەوێت و ڕوون نییە چۆن ئەو پرسە چارەسەر دەكرێت، وەزیری دارایی عێراق لە كۆبوونەوەكەی ئەمڕۆدا گوتویەتی كارێكی ئەستەم نییە كە لە ماوەی مانگی داهاتوودا سەرجەم مووچەخۆران هەژماری بانكیی بكەنەوە.