پەرەگراف
مەسروور بارزانی و ئەنتۆنی بلینكن لە واشنتن كۆبوونەوە. سەرۆكی حكومەتی هەرێم دەڵێت "بە شانازییەوە هاوپەیمانی ئەمریكاین". وەزیری دەرەوەی ئەمریكایش جەخت لە پابەندیی وڵاتەكەی بە "هاوكاری و هاوبەشی" لەگەڵ هەرێمی كوردستان دەكاتەوە و دەشڵێت "یەكڕیزیی كورد گرنگە".
بەر لە كۆبوونەوەكەیان، مەسروور بارزانی، سەرۆكی حكومەتی هەرێم و ئەنتۆنی بلینكن، وەزیری دەرەوەی ئەمریكا قسەیان كرد. بلینك خۆشحاڵیی خۆی دەربڕی بە پێشوازیكردن لە مەسروور بارزانی لە وەزارەتی دەرەوەی ئەمریكا لە واشنتن و وتی "ئەمریكا هاوبەشییەكی دوورودرێژی لەگەڵ حكومەتی هەرێمی كوردستان هەیە و پەیوەندییەكە لەسەر بنەمای بەهای هاوبەش، بەرژەوەندیی هاوبەش و مێژووی هاوبەش لە قوربانیدان بونیاد نراوە".
وەزیری دەرەوەی ئەمریكا جەختی لە "پشتیوانی"ـی وڵاتەكەی بۆ حكومەتی هەرێم "لە چوارچێوەی پەیوەندییەكان لەگەڵ عێراق" كردەوە و پەیوەندییەكەشی بە "گرنگ" وەسف كرد.
"حكومەتی هەرێمی كوردستان هاوبەشێكی گرنگ بووە بۆ سەقامگیری لە ناوچەكە و ژینگەیەكی تەندروست بووە بۆ كەرتی تایبەت و لەناویشیاندا وەبەرهێنانی ئەمریكی، ئەمەش بۆ ئێمە گرنگە"، بلینك وای وت.
ئەنتۆنی بلینك باسی لە "قۆناغی سەخت"ـی ئێستای ناوچەكە كرد و جەختی كردەوە كە "گرنگە پێكەوە بتوانین ئەم سەختییانەش تێپەڕێنین".
"لە كۆتاییدا تەنیا ئەوەندە دەڵێم: بۆ ئێمە و پێموایە بۆ سەركەوتنی دۆست و هاویەیمانەكانیشمان، یەكگرتوویی كورد گرنگە، چونكە بەرژەوەندیی هاوبەش هەیە و هەمووان پێكەوە كار دەكەن"، وەزیری دەرەوەی ئەمریكا وای وت.
لە بەرانبەردا مەسروور بارزانی، سەرۆكی حكومەتی هەرێم، سوپاسی بانگهێشتكردنی بۆ واشنتۆن كرد و خۆشحاڵیی دەربڕی جارێكی دیكە دەگەڕێتەوە واشنتن. وتیشی "بەدڵنیاییەوە ئێمە هاوبەشی یەكترین و بەشانازییەوە ئێمە دەتوانین بڵێین هاوپەیمانی ئەمریكاین".
مەسروور بارزانی وتیشی "پێكەوە چەندین قۆناغی سەختمان تێپەڕاندووە. ئێمە زۆر سوپاسگوزارین و پێزانینیمان دەردەبڕین بە هاوكارییەكانی ئەمریكا بۆ خەڵكی كوردستان".
"ئاڵنگاریی نوێ لە ناوچەكەدا هەن و چاوم لەوەیە لە گفتوگۆكانماندا باسی پێشهاتەكانی ناوچەكە و عێراق و بەتایبەتیش باسی پەیوەندییە دوو قۆڵییەكانمان لەگەڵ ویلایەتەیەكگرتوەكانی ئەمریكا بكەین"، سەرۆكی حكومەتی هەرێم وای وت.
مەسروور بارزانی، سەرۆكی حكومەتی هەرێم، ئەمڕۆ بە سەردانێكی پێشتر ڕانەگەیندراو گەیشتە واشنتنی پایتەختی ئەمریكا و لەگەڵ برپرسانی باڵای ئەو وڵاتە كۆدەبێتەوە. سەردانەكە لە كاتێكدایە كە لە ڕۆژانی ڕابردوودا دادگای فیدراڵی دوو بڕیاری لەبارەی مووچە و هەڵبژاردن لە هەرێمی كوردستان دەركرد، بەڵام هشتا حكومەتی هەرێم بە فەرمی هەڵێوستی خۆی لەبارەی بڕیارەكانەوە دەرنەبڕیوە.