مەسروور بارزانی و ئەنتۆنی بلینكن لەسەر شەش تەوەر پەیوەست بە كێشەكانی هەرێم و بەغداد گفتوگۆیان كردووە
پەرەگراف
مەسروور بارزانی و ئەنتۆنی بلینكن لەسەر شەش تەوەری سەرەكیی پەیوەست بە پەیوەندی و كێشەكانی نێوان هەرێم و بەغداد گفتوگۆیان كردووە. سەرۆكی حكومەتی هەرێم دەڵێت "هەردوولا جەختمان لەوە كردەوە كە پێویستە هەرێمی كوردستان بە شێوەیەكی دادپەروەرانە بەشە بودجەی خۆی پێ بگات". وەزیری دەرەوەی ئەمریكایش جەخت لە پاڵپشتیكردنی "هەرێمی كوردستانێكی گۆڕاگر" لە چوارچێوەی عێراقدا دەكاتەوە.
درەنگانێكی شەوی ڕابردوو پاش كۆبوونەوەكەی لەگەڵ ئەنتۆنی بلینكن، وەزیری دەرەوەی ئەمریكا، مەسرروو بارزانی، سەرۆكی حكومەتی هەرێمی كوردستان، لە هەژماری خۆی لە فەیسبووك ڕایگەیاند "پاراستنی ئاسایشی هەرێمی كوردستان، چارەسەركردنی كێشەكانی بودجە و داببینكردنی شایستە دارایی و مافە دەستوورییەكانی خەڵكی كورستان، ڕێزگرتن لە سیستەمی فیدراڵی و قەوارەی دەستووریی هەرێم، پاراستنی مافی پیكهاتەكانی كوردستان، دەستپێكردنەوەی هەناردەكردنی نەوتی هەرێمی كوردستان، جێبەجێكردنی ڕێككەوتننامەی شنگال و دەرچوونی میلیشیاكان لە دەڤەرەكە، تەوەرەكانی كۆبوونەوەكەمان بوون".
مەسروور بارزانی ئاماژەی بەوە كردوە كە بلینكن "پشتیوانیی ئەمریكای بۆ پاراستنی ئاسایش و ئارامی و سەقامگیریی هەرێمی كوردستان وەكوو قەوارەیەكی فیدرالی لە چوارچێوەی عێراقدا" دەربڕیوە. دەشڵێت "هاوڕابووین لەسەر ئەوەی كە بڕیارەكانی دادگای فیدراڵی و هەنگاوەكانی دژی هەرێم و سیستەمی فیدراڵی لە عێراق، مایەی نیگەرانین و پێویستە ڕێز لە قەوارەی دەستووریی هەرێم و سیستەمی فیدراڵی و بنەما دیموكراتییەكان لە عێراق بگیرێت".
هەروەها ئەنتۆنی بلینكن، وەزیری دەرەوەی ئەمریكا، لە هەژماری خۆی لە تۆڕی كۆمەڵایەتیی ئێكس، لەبارەی كۆبوونەوەكە و هەڵوێستی ئەمریكاوە جەخت لە "هاوبەشیی ئەمریكا لەگەڵ هەرێمی كوردستانی عێراق و هاندانی بەردەوامی هەرێم بۆ هەماهەنگی و هاریكاری لەگەڵ حكومەتی فیدراڵی عێراق" كردووەتەوە.
بلینكن دەڵێت "ئەمریكا وەكوو بەردی بناغەی پەیوەندیی ٣٦٠ پلەی لەگەڵ عێراقدا، بە پشتیوانێكی هەرێمی كوردستانی عێراقی خۆڕاگر دەمێنێتەوە".
دواتر مەسروور بارزانی لە سێ كۆبوونەوەی جیادا لەگەڵ هەر یەك لە باربارا لیف، یاریدەدەری وەزیری دەرەوەی ئەمریكا بۆ كاروباری ڕۆژهەڵاتی نزیك و عەزرا زییا، بریكاری وەزیری دەرەوە بۆ كاروباری ئاسایشی سڤیل و دیموكراسی و مافەكانی مرۆڤ و جیۆفری پیات، یاریدەدەری وەزیری دەرەوە بۆ سەرچاوەكانی وزە كۆبووەتەوە.
مەسروور بارزانی دەڵێت "لە كۆبوونەوەكاندا، برەودان بە پەیوەندیی دوولایەنە و پاراستنی مافی پێكهاتەكان و پەرەپێدانی كولتووری بەیەكەوەژیانی ئاشتییانە و ئازادیی ئایینی و ئاساییكردنەوەی دۆخی شنگال، هەروەها دەستپێكردنەوەی هەناردەكردنی نەوتی هەرێمی كوردستان و پێشخستنی كەرتی وزەمان لە هەرێم، تاوتوێ كرد".
مەسروور بارزانی و بلینكن بەر لە كۆبوونەوەكەیان چییان وت؟
بەر لە كۆبوونەوەكەیان، مەسروور بارزانی، سەرۆكی حكومەتی هەرێم و ئەنتۆنی بلینكن، وەزیری دەرەوەی ئەمریكا قسەیان كرد. بلینك خۆشحاڵیی خۆی دەربڕی بە پێشوازیكردن لە مەسروور بارزانی لە وەزارەتی دەرەوەی ئەمریكا لە واشنتن و وتی "ئەمریكا هاوبەشییەكی دوورودرێژی لەگەڵ حكومەتی هەرێمی كوردستان هەیە و پەیوەندییەكە لەسەر بنەمای بەهای هاوبەش، بەرژەوەندیی هاوبەش و مێژووی هاوبەش لە قوربانیدان بونیاد نراوە".
وەزیری دەرەوەی ئەمریكا جەختی لە "پشتیوانی"ـی وڵاتەكەی بۆ حكومەتی هەرێم "لە چوارچێوەی پەیوەندییەكان لەگەڵ عێراق" كردەوە و پەیوەندییەكەشی بە "گرنگ" وەسف كرد.
"حكومەتی هەرێمی كوردستان هاوبەشێكی گرنگ بووە بۆ سەقامگیری لە ناوچەكە و ژینگەیەكی تەندروست بووە بۆ كەرتی تایبەت و لەناویشیاندا وەبەرهێنانی ئەمریكی، ئەمەش بۆ ئێمە گرنگە"، بلینك وای وت.
ئەنتۆنی بلینك باسی لە "قۆناغی سەخت"ـی ئێستای ناوچەكە كرد و جەختی كردەوە كە "گرنگە پێكەوە بتوانین ئەم سەختییانەش تێپەڕێنین".
"لە كۆتاییدا تەنیا ئەوەندە دەڵێم: بۆ ئێمە و پێموایە بۆ سەركەوتنی دۆست و هاویەیمانەكانیشمان، یەكگرتوویی كورد گرنگە، چونكە بەرژەوەندیی هاوبەش هەیە و هەمووان پێكەوە كار دەكەن"، وەزیری دەرەوەی ئەمریكا وای وت.
لە بەرانبەردا مەسروور بارزانی، سەرۆكی حكومەتی هەرێم، سوپاسی بانگهێشتكردنی بۆ واشنتۆن كرد و خۆشحاڵیی دەربڕی جارێكی دیكە دەگەڕێتەوە واشنتن. وتیشی "بەدڵنیاییەوە ئێمە هاوبەشی یەكترین و بەشانازییەوە ئێمە دەتوانین بڵێین هاوپەیمانی ئەمریكاین".
مەسروور بارزانی وتیشی "پێكەوە چەندین قۆناغی سەختمان تێپەڕاندووە. ئێمە زۆر سوپاسگوزارین و پێزانینیمان دەردەبڕین بە هاوكارییەكانی ئەمریكا بۆ خەڵكی كوردستان".
"ئاڵنگاریی نوێ لە ناوچەكەدا هەن و چاوم لەوەیە لە گفتوگۆكانماندا باسی پێشهاتەكانی ناوچەكە و عێراق و بەتایبەتیش باسی پەیوەندییە دوو قۆڵییەكانمان لەگەڵ ویلایەتەیەكگرتوەكانی ئەمریكا بكەین"، سەرۆكی حكومەتی هەرێم وای وت.
مەسروور بارزانی، سەرۆكی حكومەتی هەرێم، پێرێ بە یاوەریی هەریەك لە شۆڕش ئیسماعیل، وەزیری پێشمەرگە و سەفین دزەیی، بەرپرسی فەرمانگەی پەیوەندییەكانی دەرەوە، بە سەردانێكی پێشتر ڕانەگەیەندراو گەیشتە واشنتنی پایتەختی ئەمریكا. سەردانەكە لە كاتێكدایە كە لە ڕۆژانی ڕابردوودا دادگای فیدراڵی دوو بڕیاری لەبارەی مووچە و هەڵبژاردن لە هەرێمی كوردستان دەركرد، بەڵام هشتا حكومەتی هەرێم بە فەرمی هەڵێوستی خۆی لەبارەی بڕیارەكانەوە دەرنەبڕیوە.