پەرەگراف
وەزارەتی دارایی عێراق زیاتر لە ١٣٠ ملیار دیناری ڕەوانەی هەرێمی كوردستان كرد بۆ مووچەی مانگی ٢ی خانەنشینان و خاوەن پێداویستییە تایبەتەكان، وەزارەتەكە جەختیش دەكاتەوە كە بۆ مانگی ٣ مووچە نانێرێت تاوەكو فەرمانبەرانی هەرێم هەژماری بانكی لە بانكە عێراقییەكان دەكەنەوە.
بە بڕیاری وەزارەتی دارایی عێراق ئەمڕۆ 119 ملیار و 139 ملیۆن و 195 هەزار و 614 دینار بۆ مووچەی خانەنشینانی سەربازیی و مەدەنیی و بڕی 10 ملیار و 997 ملیۆن و 100 هەزار دینار بۆ شایستەی دارایی خاوەن پێداویستیی تایبەتی سەر بە بەڕێوەبەرایەتییەكانی چاودێریی كۆمەڵایەتیی خرایەسەر هەژماری بانكی حكومەتی هەرێمی كوردستان لە بانكی ناوەندی عێراق.
وەزارەتی دارایی عێراق رایگەیاند، بە نووسرای فەرمیی دادگای فیدراڵی ئاگاداركردووەتەوە كە پارەداركردنی مووچەی فەرمانبەرانی هەرێمی كوردستانی بۆ مانگی شوبات دەستیپێكردووە، بەوپێیەی پڕۆسەی گواستنەوەی مووچەی فەرمانبەرانی هەرێم بۆ سەر بەغداد مانگێك كاتی دەوێت، بەڵام مووچەی مانگی ئادار نادرێت تاوەكو پێداویستییەكانی پڕۆسەی گواستنەوەی مووچە لەلایەن هەرێمی كوردستانە و دەستبەر دەكرێت.
بەپێی بڕیاری دادگای فیدراڵی لەبارەی مووچەی هەرێم، دەبێت مووچەخۆرانی هەرێم هەژماری بانكیی لە بانكە حكومییە عێراقییەكان بكەنەوە، بەپێچەوانەوە مووچەیان پێ نادرێت.
هەروەها وەزارەتی دارایی عێراق، وەزارەتی نەوت و كۆمپانیای سۆمۆ بۆ بە بازاڕكردنی نەوتی ئاگادار كردووەتەوە كە هەڵوێستی خۆیان بخەنەڕوو لەبارەی ئاستی پابەندیی حكومەتی هەرێم بە رادەستكردنی نەوت و 25ـی هەموو مانگێك زانیارییان پێبدەن لەبارەی بڕی نەوتی هەناردەكراو یان رادەستكراو لەلایەن حكومەتی هەرێمی كوردستانەوە.
ئەو ڕێكارانەی وەزارەتی دارایی عێراق لەبارەی مووچەی هەرێم، پشت بەستنە بە بڕیارەكەی دادگای فیدراڵی عێراق لەبارەی پرسی مووچەو بودجەی هەرێمی كوردستان، لە بڕیارەكەی دادگادا بە ڕوونی ئەوەهاتووە كە؛ ئەگەر كێشەكانی نێوان هەرێم و بەغداد چارەسەرنەبن نابێت ئەوە ببێتەهۆی دواكەوتنی مووچەی مووچەخۆرانی هەرێم.
لەبارەی پێدانی كۆی بەشە بودجەی هەرێمی كوردستان، دادگای فیدراڵی ئاماژەی بەوە كردووە كە دەبێت بەپێی یاسای بودجەی عێراق بێت و لە بڕیارەكەیدا ئاماژەی بە پێویستیی هەمواركردنەوەی ئەو یاسایە كردووە كە ئەوە داوایەكی هەرێمی كوردستانەو حكومەتی عێراقیش ڕازییەو بڕیارە پڕۆژەی هەمواركردنەوەكە ڕەوانەی پەرلەمان بكات.
ناردنی كۆی بودجەی هەرێمیش بەستراوە بە جێبەجێكردنی سێ مەرج لەلایەن هەرێمی كوردستانەوە كە بریتین لە؛ ڕادەستكردنی ٤٠٠ هەزار بەرمیل نە وتی ڕۆژانە بە عێراق لەگەڵ ڕادەستكردنی داهاتە نەوتی و نانەوتییەكان و هاوكاریكردنی دیوانی چاودێری دارایی عێراق بۆ وردبینی لە لیستی مووچەخۆرانی هەرێمی كوردستان.