ئەندامە کوردەکەی دادگای فیدراڵی لە پشکی پارتی کشایەوەو داوای هەمان هەڵوێست لەوەی یەکێتیش دەکرێت
پەرەگراف
دادوەرێكی كوردی دادگای باڵای فیدراڵیی عێراق لە پشكی پارتی كشانەوەی خۆی لە دادگاكە ڕاگەیاند و دەڵێت "ڕۆڵی ئێمە وەكوو نوێنەری هەرێمی كوردستان لە دادگای فیدراڵی، لاواز كرا". فراكسیۆنی پارتی لە پەرلەمانی عێراق داوا دەكات دادوەرە كوردەكەی دادگای فیدراڵی لە پشكی یەكێتیش بكشێتەوە.
دادوەر عەبدولڕەحمان سلێمان زێباری، ئەندامی دادگای باڵای فیدراڵیی عێراق، لە كۆنگرەیەكی ڕۆژنامەوانیدا لە هەولێر كشانەوەی خۆی ڕاگەیاند و وتی "من نوێنەری هەرێمی كوردستان بووم، بەڵام نەمتوانیوە لە دادگای فیدراڵی بەرگری لە مافەكانی هەرێم بكەم".
"هەندێك لە بڕیارەكانی دادگای فیدڕاڵی لە چوارچێوەی كاری دادگا دەرچوون، پێشێلی دەستووریان تێدایە و تێكەڵاوییان لە نێوان دەسەڵاتەكانی عێراقدا دروست كردووە، هەروەها هەندێك جار دادگا سیستەمی فیدراڵیی عێراقی پێشێل كردووە"، دادوەر عەبدولڕەحمان زێباری وا وت.
هەروەها ئاماژەی بەوە دا كە هەرێمی كوردستان تاكە هەرێمە لە چوارچێوەی دەستووردا دانی پێدا نراوە و ڕۆڵی هەبووە لە نووسینەوەی دەستوور بۆ گەلانی عێراق، "دەبوو دادگای فیدڕاڵی دەسەڵاتی هەرێمەكان بەهێز بكات و بەرگری لە مافیان بكات".
دوای كیشانەوەی ئەو دادوەرە، دادگای باڵای فیدڕاڵیی عێراق کە ٩ ئەندامی هەمیشەیی و سێ یەدەگی هەیە، ڕایگەیاند "كشانەوەی دادەوەر عەبدولڕەحمان سلێمانی زێباری لە ئەندامێتیی دادگا، كاریگەری لەسەر كارەكان دروست ناكات، بەو پێیەی دادگای فیدڕاڵی سێ دادوەری یەدەگی هەیە".
هاوكات فراكسیۆنی پارتی داوا دەكات دادوەرە كوردەكەی دیكەش كە لە پشكی یەكێتییە، هەمان هەڵوێست وەربگرێت و لە دادگای فیدراڵی بكشێتەوە.
مەریوان قەرەنی، جێگری سەرۆكی فراكسیۆنی پارتی لە پەرلەمانی عێراق، دەڵێت "كۆمەڵێك هۆكاری زۆر هەیە بۆ ئەوەی بڵێین كە دادگای فیدڕاڵیی عێراق لەو بنەمایانە لای داوە كە لەپێناویدا دامەزراوە. چیتر ئەو دادگایە، دادگایەك نییە كە چاودێریی دەستووریبوونی یاسا و بڕیارەكان بكات، بەڵكوو خۆی بە ناوی تەفسیركردنی دەقە دەستوورییەكانەوە، هاتووە دەستووری هەمیشەیی عێراق لە دژی هەرێمی كوردستان و لە قازانجی مەركەزیەتی عێراق هەموار دەكاتەوە".
جێگری سەرۆكی فراكسیۆنی پارتی لە پەرلەمانی عێراق جەخت دەكاتەوە كە "بۆ كورد و هەرێمی كوردستان، بە هیچ شێوەیەك بوون و نەبوونی نوێنەرایەتی لەو دادگایە گرنگیی نەماوە"، لەو چوارچێوەیەشدا دەڵێت "دادوەرە كوردەكەی دیكەی دادگاكە لە ڕوانگەی هەستكردنی بە بەرپرسیارێتیی بەرامبەر بە قەوارەی هەرێمی كوردستان، هەڵوێست وەربگرێت و لە دادگای فیدڕاڵیی عێراق بكشێتەوە".