پەرەگراف
وتەبێژی حكومەتی هەرێم سووربوونی حكومەت لەسەر پرۆژەی هەژماری من ڕادەگەیەنێت و ڕوو لە بەغداد دەڵێت "دەتوانن لەڕێگەی هەژماری منەوە مووچە بدەن".
پێشەوا هەورامانی، وتەبێژی حكومەتی هەرێم، پاش كۆبوونەوەی ئەمڕۆ ئەنجوومەنی وەزیرانی هەرێم، ڕایگەیاند "حكومەتی هەرێم پاشەكشێ لە پرۆژەی هەژماری من ناكات. هەر كەسێك كە دەیەوێت، دەتوانێت لەڕێگەی هەژماری منەوە مووچە بداتە فەرمانبەرانی هەرێمی كوردستان".
ئەم لێدانەی وتەبێژی حكومەتی هەرێم پاش ئەوە دێت كە ئەمڕۆ لە كۆبوونەوەی لەگەڵ لیژنەی دارایی پەرلەمانی عێراق، وەزیری دارایی عێراق ڕەتی كردەوە پشت بە پڕۆژەی هەژماری من ببەستن بۆ دابەشكردنی مووچەی مووچەخۆرانی هەرێم بە ئەلیكترۆنی و لەڕێی هەژماری بانكییەوە، دەشڵێت، لیستی ناو و زانیاریی هەر وەزارەتێكی هەرێمی پێ نەگات، ناتوانێت مووچەكانیان بنێرێت، لەوانەش پێشمەرگەو هێزە ئەمنییەكان.
پێشەوا هەورامانی پرۆژەی هەژماری منی بە پێشكەوتووتر لە پرۆژەكانی بەغداد بۆ بەئەلیكترۆنیكردنی مووچە ناو برد و وتیشی "تێچووی كارتی بانكی لە هەژماری من (2500) دوو هەزار و پێنجسەد دینارە و فەرمانبەران لەڕێگەی پرۆژەكەوە لە 19 خزمەتگوزاریی بانكی سوودمەند دەبن".
"ئابووریی هەرێمی كوردستان دوای تەواوبوونی هەژماری من، دەچێتە قۆناغێكی ترەوە. ئەوانەی كارتی هەژماری منیان هەبێت، دەتوانن قەرز وەربگرن"، وتەبێژی حكومەتی هەرێم وای وت.
هەروەها ئاماژەی بەوە كرد كە "نزیكەی 240 هەزار فەرمانبەر لە هەژماری من تۆمار كراون، نیوەیان كاتیان وەرگرتووەوە. پلانی حكومەتی هەرێمیش ئەوەیە تا كۆتایی ئەمساڵ سەرجەم فەرمانبەران كارتی خۆیان هەبێت".