پەرەگراف
نێچیرڤان بارزانی ڕۆژی شەممەی داهاتوو سەردانی بەغداد دەکات و دۆسیەکانی نێوان هەولێرو بەغدادو پرسی هەڵبژاردنی پەرلەمانی کوردستان و هەڵوێستەکانی پارتی کە بەشێکی هەڕەشەی کشانەوەیە لە پڕۆسەی سیاسی، لەگەڵ بەرپرسانی باڵای عێراق تاوتوێ دەکرێن.
دڵشاد شەهاب وتەبێژی سەرۆکایەتی هەرێم ڕایگەیاند، سەرۆکی هەرێم لەسەر مەلەفی بودجە و مووچە، نەوت و هەناردەکردنەوەی، پەیوەندییەکی تەندروست و باش لەنێوان هەولێر و بەغدا گفتوگۆ لەگەڵ بەرپرسانی عێراق دەکات.
دوای ئەوەی پارتی دیموكرات پاش سێ جار درێژكردنەوەی وادەی پێشكەشكردنی ناوی كاندیدەكان لەلایەن كۆمیسیۆنەوە، ئامادە نەبوو لیستی ناوی كاندیدەكانی پێشكەش بكات، بەهۆی ئەو ڕەخنانەی لە پرۆسەكە و بڕیارەكانی دادگای فیدراڵی هەیەتی، لە ئێستادا دواخستنی هەڵبژاردن بووە بە بەهێزترین سیناریۆ بۆ هەڵبژاردنی خولی شەشەمی پەرلەمانی كوردستان، ئەو پرسەش لە دەستی نێچیرڤان بارزانیدایە.
سەرباری ئەوەیش، كۆمیسیۆنی هەڵبژاردنەكانی عێراق بەردەوامە لە ڕێكارەكانی بۆ ئەنجامدانی هەڵبژاردن و بڕیارە ڕۆژی 7-4-2024 تیروپشك بۆ پێدانی ژمارە بە قەوارەكان بكرێت و بەزوویی كارمەند بۆ بەڕێوەبردنی پرۆسەكە بە گرێبەست دابمەزرێنێت.
هاوكات لەگەڵ بەشدارینەكردن لە هەڵبژاردنی پەرلەمانی كوردستان، پارتی هەڕەشەی كشانەوەش لە پڕۆسەی سیاسیی عێراق دەكات، مەکتەبی سیاسی پارتی ڕۆژی 18-3-2024 ڕایگەیاند "لایەنەكانی هاوپەیمانی ئیدارەی دەوڵەت دەخەینە بەردەم بەڕپرسیارێتیی نیشتمانی لە جێبەجێنەكردنی دەستوور و تەواوی خاڵەكانی ڕێكەوتنی سیاسی و ئیداریی پێكهێنانی كابینەی ئێستای حكومەتی عێراق بە سەرۆكاتیی محەمەد شیاع سوودانی، بە پێچەوانەشەوە ناتوانین بەردەوام بین لە پرۆسەی سیاسی دا".
مەكتەبی سیاسی پارتی لە بەیاننامەیەكدا چەند خاڵێكی خستەڕوو و پێی وایە دادگای فیدراڵی پێشێلی بەشێك لە ماددەكانی دەستووری عێراقی كردووە كە تایبەتن بە هەرێمی كوردستان و دەڵێت "پێشێلی مافە دەستوورییەكانی كردووە و دەیەوێت ئەو دەستكەوتانەی گەلەكەمان كە بە خەبات و تێكۆشان و خوێنی شەهیدەكانمان و ئەنفالكراوان و كیمیابارانكراوان بەدەستی هێناون، بە بڕیاری سیاسی و نادەستووری لە گەلی كوردستانی بستێنێتەوە".