نێچیرڤان بارزانی: هەرێمی كوردستان بە گەشبینییەوە لە سەردانەكەی سوودانی بۆ ئەمریكا دەڕوانێت
پەرەگراف
نێچیرڤان بارزانی، سەرۆكی هەرێمی كوردستان، پاڵپشتی بۆ سەردانەكەی سوودانی بۆ ئەمریكا دەردەبڕێت و دەڵێت "هەرێمی كوردستان بە گەشبینییەوە لە سەردانەكەی محەمەد شیاع سوودانی، سەرۆكوەزیرانی عێراق، بۆ ویلایەتە یەكگرتووەكانی ئەمریكا دەڕوانێت".
سەرۆكی هەرێم لە پەیامێكدا كە لە تۆڕی كۆمەڵایەتیی ئێكس بڵاوی كردووەتەوە، دەشڵێت "ئێمە بە تەواوی پاڵپشتی لەو سەردانە دەكەین و دڵنیاین بەرژەوەندیی هەموو عێراقییەكان لەوێ لەبەرچاو دەگیرێت".
نێچیرڤان بارزانی هیواخوارزە "كۆبوونەوەكان ئەرێنی و سەركەوتوو بن و ببنە هۆی گەشەسەندنی زیاتری پەیوەندییەكانی هەردوو وڵات".
محەمەد شیاع سوودانی، سەرۆكوەزیرانی عێراق، لەسەر بانگهێشتی فەرمیی جۆ بایدن، سەرۆكی ویلایەتە یەكگرتووەكانی ئەمریكا، بە سەرۆكایەتیی شاندێك لە واشنتنە و بڕیارە ئەمڕۆ لە كۆشكی سپی لەگەڵ سەرۆكی ئەمریكا كۆ ببێتەوە.
سوودانی و شاندی یاوەری كە 13ـی ئەم مانگە گەیشتنە ئەمریكا، تا 19ـی مانگ لە ئەمریكا دەمێننەوە زنجیرەیەك كۆبوونەوە دەربارەی دۆسیەی سیاسی، ئابووری، سەربازی و ئەمنیییەكانی نێوان هەردوو وڵات لەگەڵ بەرپرسانی باڵای ئەمریكا تاوتوێ دەكەن.