.jpg)
پەرەگراف
ئاسایشی سلێمانی لە ڕێگەی بڵاوەپێكردنی هێز و "دەستبەسەركردن و هەڕەشە"وە، ڕێگری دەكات لە چالاكییەك دژی سەردانەكەی ئەردۆغان بۆ هەرێمی كوردستان و چەند چالاك و ڕۆژنامەنووسێكیش بەشێوەیەكی كاتی دەستبەسەر دەكات. ڕێكخەرانی چالاكییەكە دەڵێن "ئەم جۆرە ڕێگرییانە لە سلێمانی، دیوێكی تری پێشوازی و هەڵواسینی ئاڵای توركیایە لە هەولێر".
كاتژمێر 1ـی پاشنیوەڕۆی ئەمڕۆ هێزێكی گەورەی ئاسایشی سلێمانی لە دەوروبەری نووسینگەی سلێمانیی پەرلەمانی عێراق بڵاوەی پێ كرا، بەمەبەستی ڕێگەگرتن لە چالاكیی ژمارەیەك لە چالاكوان، ڕۆشنبیر و پەرلەمانتارانی پێشوو، كە دەیانویست یاداشتێكی ناڕەزایەتی دژی سەردانەكەی ڕەجەب تەیب ئەردۆغان، سەرۆككۆماری توركیا بۆ هەرێمی كوردستان لەبەردەم نووسینگەی پەرلەمان بخوێننەوە.
یەكێك لە چالاكوانان بە پەرەگرافی ڕاگەیاند "ئەو هێزە ئاسایش كە لەوێ بڵاوەی پێ كرابوو، ڕێگرییان كرد لە ئەنجامدانی چالاكییەكە، هەرچەندە ئێمە هەوڵی تەواوی خۆمان دا و قسەمان لەگەڵ كردن، بەڵام ئەوان بە تووڕەبوون و پاڵنان و هەڕەشەی دەستگیركردن ڕێگرییان كرد".
بەهۆی هەوڵدانیان بۆ ئەنجامدانی ئەو چالاكییە، هەریەك لە شوان محەمەد، ڕۆژنامەنووس و ستارە عارف و پەروا عەلی، چالاكوان و پەرلەمانتاری خوولی پێشووی پەرلەمانی كوردستان، لەلایەن ئەو هێزەوە خرانە ئۆتۆمبێلی دەستگیركردنی ئاسایشەوە و بۆ ماوەیەك لەناو ئۆتۆمبێلەكەدا هێڵدرانەوە، دواتر لە شوێنێكی دوور لە شوێنی چالاكییە ئازاد كران.
ڕێكخەرانی چالاكییەكەكە كە لەژێر ناوی (دەستەی پارێزگاری لە سەروەریی نیشتمان) كۆبوونەتەوە، لە ڕاگەیەندراوێكدا ئاماژەی بەوە كردووە كە هاوكات لەگەڵ ساڵڕۆژی ڕۆژنامەگەریی كوردی، هێزە ئەمنییەكانی سلێمانی ڕێگرییان كردووە لەوەی یاداشتێك ئاڕاستەی ئۆفیسی ئەنجوومەنی نوێنەرانی عێراق لە سلێمانی بكەن.
بەپێی راگەیەندراوی دەستەكە، یاداشتەكە پەیوەست بووە بە "پێشێلكاری و تاوانی سوپای توركیا لە بەزاندنی سنوور و داگیركردنی خاكی باشووری كوردستان و بۆمبارانكردنی شاخ و گوند و دارستانەكانی هەرێمی كوردستان، كوشتنی خەڵكی سڤیل لە گوند و شارۆچكەكانی كوردستان، مەترسیی فراوانبوونی ئەو داگیركارییانە لە پاش هاتنی سەرۆككۆماری توركیا بۆ عێراق و هەرێمی كوردستان".
دەستەی پارێزگاری لە سەروەریی نیشتمان دەڵێت "ئەم جۆرە ڕێگرییانە دیوێكی تری پێشوازی و هەڵواسینی ئاڵای توركیایە لە هەولێر و ڕێگەخۆشكەرە بۆ بەردەوامیی پێشێلكاری و هێرشەكانی سوپای توركیا".