پەرەگراف
سەرۆكایەتیی كۆماری توركیا ئاشكرای دەكات كە ئەردۆغان لە كۆبوونەوەكەی شەوی ڕابردوودا بە بەرپرسانی هەرێمی ڕاگەیاندووە "ئیتر كاتی ئەوە هاتووە شتێك بە ناوی دۆسیەی پەكەكە نەمێنێت". هەروەها داوای لێكردوون بۆ كارێكی لەو شێوەیە "ئاستی هاوكارییەكانیان بۆ ڕووبەڕووبوونەوەی تیرۆر" لەگەڵ توركیا بەرز بكەنەوە. بەپێی ڕاگەیەندراوی سەرۆكایەتیی هەرێمی كوردستانیش، "پاراستنی ئاسایشی سنوور و بەرەنگاربوونەوەی تیرۆر" دوو تەوەری كۆبوونەوەكە بوون.
دۆسیەی پەكەكە لە سەرەكیترین دۆسیەكانی سەردانەكەی دوێنێی ئەردۆغان بۆ بەغداد و هەولێر بوو، بە جۆرێك كە حكومەتی عێراقیش هەڵوێستێكی نوێی لەبارەوە ڕاگەیاند و ئەردۆغانیش لەوبارەیەوە سوپاسی عێراقی كرد.
فەرمانگەی پەیوەندییەكانی سەرۆكایەتیی كۆماری توركیا ڕاگەیەندراوێكی سەبارەت بە كۆبوونەوەی شەوی ڕابردووی نێوان بەرپرسانی هەرێم و شاندی توركیا بەسەرۆكایەتیی ڕەجەب تەیب ئەردۆغان بڵاو كردووەتەوە و دەڵێت "لە دیدارەكەدا سەركۆمار ئەردۆغان وێڕای ئاماژەدان بە خۆشحاڵیی خۆی لە هەمبەر دووركەوتنەوەی عێراق لە توندوتیژییەكان، جەختیشی لەوە كردەوە كە ئیتر كاتی ئەوە هاتووە شتێك بە ناوی دۆسیەی پەكەكە نەمێنێت".
سەرۆكایەتیی كۆماری توركیا ئاماژەی بەوەش كردووە كە وڵاتەكەی گرنگی بە "هاوكارییەكانی بەرەنگاربوونەوەی تیرۆر" دەدات و داواش لە هەرێم دەكات كە "ئاستی ئەو هاوكارییانە بەرز بكرێتەوە".
كاتژمێر 8:30 خولەكی شەوی ڕابردوو، ڕەجەب تەیب ئەردۆغان، سەرۆككۆماری توركیا، پاش سەردانەكەی بۆ بەغداد، گەیشتە هەولێر و لەلایەن نێچیرڤان بارزانی، سەرۆكی هەرێم و مەسروور بارزانی، سەرۆكی حكومەتی هەرێم و قوباد تاڵەبانی، جێگری سەرۆكی حكومەتی هەرێم و ژمارەیەك لە وەزیرەكان پێشوازیی لێ كرا. دواتریش كۆبوونەوەیەكی فراوانی هەردوولا لە سەرۆكایەتیی هەرێم بەڕێوە چوو.
سەبارەت بە كۆبوونەوە لەگەڵ ئەردۆغان، سەرۆكایەتیی هەرێمی كوردستان لە ڕاگەیەندراوێكدا دەڵێت "پەیوەندییەكانی توركیا لەگەڵ عێراق و هەرێمی كوردستان بەتایبەتی لە بواری ئابووری و بازرگانی و هاریكاریی ئەمنیدا، هەروەها پاراستنی ئاسایشی سنوور و بەرەنگاربوونەوەی تیرۆر تاوتوێ كران".
نێچیرڤان بارزانی لە كۆبوونەوەكەدا "خواست"ـی هەرێمی كوردستانی بۆ برەودان بە پەیوەندییەكانی لەگەڵ كۆماری توركیا لە "هەموو بوارەكان"دا دەربڕیوە و دووپاتی كردووەتەوە كە "هەرێمی كوردستان وەك هەمیشە لە ناوچەكە فاكتەری ئارامی و سەقامگیری دەبێت".
دوێنێ لە كاتێكدا سەرۆككۆماری توركیا و سەرۆكوەزیرانی عێراق لە كۆبوونەوەدا بوون، باسم عەوادی، وتەبێژی حكومەتی عێراق كۆنفرانسێكی ڕۆژنامەوانیی ئەنجام دا و تێیدا پارتی كرێكارانی كوردستان (پەكەكە)ـی بە "ڕێكخراوێكی قەدەغەكراو" ناو برد.
وتەبێژی حكومەتی عێراق لە پەراوێزی سەردانەكەی شاندی باڵای توركیا بۆ بەغدا، بۆ میدیاكان وتی "لیژنەی ئاسایشی عێراق، پارتی كرێكارانی كوردستان (پەكەكە)ـی وەكوو ڕێكخراوێكی قەدەغەكراو پۆلێن كردووە و لەسەر ئەو بنەمایە مامەڵە لەگەڵ پەكەكەدا دەكرێت".
باسم عەوادی جەختی كردەوە كە لیژنە هاوبەشە ئەمنییەكانی نێوان عێراق و توركیا و دەزگا پەیوەندیدارەكانی هەردوولا، گەیشتوونەتە ئەو باوەڕەی كە "پەكەكە ڕێكخراوێكی قەدەغەكراوە و دەبێت تەنیا وەكوو میوان و پەنابەری سیاسی لە عێراقدا بێت، نابێت چالاكی بەرانبەر توركیا ئەنجام بدات".
وتەبێژی حكومەتی عێرا ئاماژەی بەوە كرد كە هەر وەكوو چۆن پێشتر لەگەڵ ئێران ڕێككەوتن و لێكتێگەیشتنیان لەبارەی ڕێكارە ئەمنییەكانی سەر سنوورەوە كردووە، هەمان شت لەگەڵ توركیاش دەكەن، بەڵام بۆ ئەوە پێویستیان بە ماوەیەك هەیە.
دوای قسەكانی باسم عەوادی، ڕەجەب تەیب ئەردۆغان، سەرۆككۆماری توركیا لە كۆنگرەی ڕۆژنامەوانیی هاوبەش لەگەڵ سوودانی وتی "بە سوپاسەوە پێشوازی لە ناساندنی پەكەكە وەكوو ڕێكخراوی قەدەغەكراو لەلایەن عێراقەوە دەكەین". ئەردۆغان وتیشی "باوەڕی بەهێزم هەیە كە ئەگەر بە فەرمی بە تیرۆریست بناسرێت، لە كەمترین ماوەدا لە خاكی عێراق نامێنێت و ئەمەم بە هاوتاكەم ڕاگەیاند".
محەمەد شیاع سوودانی، سەرۆكوەزیرانی عێراق، ڕاستەوخۆ باسی لە دۆسیەی پەكەكە نەكرد، بەڵام جەختی كردەوە كە "ئێمە سوورین لەسەر ئەوەی ڕێگە بە هیچ هێزێك نەدەین خاكی عێراق لە دژی وڵاتانی دراوسێ بەكار بهێنێت، هەروەك چۆن خاكی خۆمان بە پیرۆز دەزانین و ڕێگە نادەین پێشێلی سەروەریی خاكمان بكرێت".
توركیا لە ساڵانی ڕابردوودا هەوڵەكانی چڕ كردەوە بۆ ئەوەی پەكەكە لەلایەن عێراقەوە بە "ڕێكخراوێكی تیرۆریستی" بناسێنرێت، بەڵام تا ئێستا عێراق نەچووەتە ژێر باری وەها بڕیارێك و دیارترین بڕیار كە دژی پەكەكە دابێتی، ئەم بڕیارە نوێیەیە كە وەكوو "ڕێكخراوێكی قەدەغەكراو" ناساندوویەتی. هەرچەندە ئەم بڕیارە لە ئاستی چاوەڕوانیی توركیادا نییە، بەڵام ڕەنگە ئەنقەرە لە دۆسیەی پەكەكەدا دەستكراوەتر بكات.