پەرەگراف
دڵشاد شەهاب، وتەبێژی سەرۆكایەتیی هەرێمی كوردستان، دەڵێت "سەرۆكایەتیی هەرێمی كوردستان بەردەوام لە پەیوەندیدایە لەگەڵ هەموو لایەنە سیاسییەكان و دەبێت زەمینەسازی بۆ هەڵبژاردنی پەرلەمانی كوردستان بكرێت".
پاش ئەوەی پارتی ڕایگەیاند بەم شێوەیەی ئێستا بەشداریی هەڵبژاردن ناكات، لە ڕێگەی سەرۆكایەتیی هەرێمەوە هەوڵی ڕازیكردنی لایەنەكان و بەدەستهێنانی پاڵپشتیی زیاتر بۆ دواخستنی هەڵبژاردن دەدات، لەو چوارچێوەیەشدا شاندی سەرۆكایەتیی هەرێم سەردانی لایەنەكان دەكات.
ئەمڕۆ شاندی سەرۆكایەتیی هەرێم سەردانی بەرەی توركمانی كرد و دوای كۆبوونەوەكە دڵشاد شەهاب ئاماژەی بەوە كرد، ناكۆكییە ساسییەكان گورزی یاسایی و سیاسییان لە هەرێمی كوردستان داوە، ناكۆكییەكانی یاسای هەڵبژاردنیش بە هەمان شێوە زیانی بە هەرێمی كوردستان گەیاندووە.
وتەبێژی سەرۆكایەتیی هەرێمی كوردستان لەبارەی كورسیی كۆتاكان و بەشداریكردنییان لە هەڵبژاردنی پەرلەمانی كوردستان، وتی "هەموو هەوڵێك دەگرینە بەر بۆ ئەوەی پێكهاتەكان بەشداری لە پڕۆسەی سیاسییدا بكەن و بەشدارییەكی كاریگەریان هەبێت".