پەرەگراف
جێگری بەڕێوەبەری نووسینگەی مەسروور بارزانی ڕایدەگەیەنێت، دادگای فیدراڵی لەم هەفتەیەدا "ڕاستكردنەوەیەك" لەبارەی پرۆسەی بەبانكیكردنی مووچەی مووچەخۆرانی هەرێم دەردەكات. بەپێی ڕاستكردنەوەكە بانكەكانی ناو (پرۆژەی هەژماری من)یش مافی ئەوەیان دەبێت هەژماری بانكی بۆ مووچەخۆرانی هەرێم دروست بكەن.
بەڵام هاوكات مووچەخۆرانی هەرێم دەتوانن بانكە عێراقییەكانی دەرەوەی هەژماری من بۆ بەبانكیكردنی مووچەكانیان هەڵبژێرن، هەروەها مووچە ڕاستەوخۆ لەلایەن وەزارەتی دارایی عێراقەوە دەخرێتە سەر هەژماری مووچەخۆران.
عەزیز ئەحمەد، جێگری بەڕێوەبەری نووسینگەی سەرۆكوەزیرانی هەرێمی كوردستان، لە هەژماری خۆی لە تۆڕی كۆمەڵایەتیی ئێكس دەڵێت "دادگای فیدراڵی لەم هەفتەیەدا ڕاستكردنەوەیەك دەردەكات بۆ پشتڕاستكرنەوەی ئەوەی كە هاووڵاتیانی هەرێمی كوردستان هەمان مافیان هەیە وەك هەموو عێراقییەكان لە پرۆژەی بانكی ناوەندیی عێراق بۆ بەبانكیكردنی مووچە".
بەوپێیەش "وەكوو چۆن مووچەخۆرانی حكومەتی فیدراڵی بانكی دڵخوازی خۆیان هەڵدەبژێرن لە لیستی بانكە پەسەندكراوەكان، مووچەخۆرانی هەرێمی كوردستانیش هەمان مافیان هەیە".
عەزیز ئەحمەد دەڵێت "ئەمە بنەمای پرۆژەكەیە: هەر بانكێك كە لەلایەن بانكی ناوەندیی عێراقەوە مۆڵەتی پێ درابێت و مەرجەكانی هەژماری منی تێدا بێت، دەتوانێت هەژماری بانكی بۆ مووچەخۆرانی هەرێمی كوردستان دروست بكات".
جێگری بەڕێوەبەری نووسینگەی مەسروور بارزانی ئاماژەی بەوەش كردووە كە "هەر بانكێك لەلایەن بانكی ناوەندیی عێراقەوە مۆڵەتی پێ درابێت و مەرجەكانی هەژماری منی تێدا بێت، دەتوانێت هەژماری بانكی بۆ مووچەخۆرانی هەرێمی كوردستان دروست بكات".
ئەو بەرپرسەی حكومەتی هەرێم دەشڵێت "هەموو بانكە بەشدارەكانی پڕۆژەی هەژماری من مۆڵەتیان لە لایەن بانكی ناوەندی عێراقییەوە پێ دراوە و بە تایبەتی پەسەند كراون بۆ پرۆژەكە، دوای ئەم ڕاستكرنەوەیە، دەتوانین بە تەواوی توانامانەوە بەردەوام بین تا هێڵی كۆتایی".