پەرەگراف
مارك سترۆ کونسوڵی گشتیی ئەمەریکا لە هەرێم ڕایگەیاند، ئەمەریكا بە توندی سەركۆنەی هێرشەكەی سەر كێڵگەی گازی كۆرمۆر دەكات و بۆ ڕێگری لەو هێرشە تیرۆرستییانە پاڵپشتی بۆ هەردوو حکومەتی هەرێم و عێراق دووپات دەکاتەوەو لە نزیكەوە چاودێری و بەدواداچوونی گۆڕانكارییەكان دەكات.
ئەو وتانەی کونسوڵی گشتیی ئەمەریکا لە میانی سەردانی بۆ وەزارەتی سامانە سروشتییەکان و کۆبوونەوەی لەگەڵ وەزیرو ستافی وەزارەت بوو.
بەپێی وەزارەتی سامانە سروشتییەکان، لە كۆبوونەوەكەدا كونسوڵی ئەمەریكا نیگەرانیی لە هێرشە درۆنییەكەی سەر كێڵگەی كۆرمۆر و گیان لەدەستدانی چوار كارمەندی كێڵگەكە دەربڕیوە، هێرشەکەی بە "تیرۆرستی" داناو وتی "ئامانج لێی زیانگەیاندنە بە لایەنی ئەمنی و ژێرخانی ئابووریی هەرێمی کوردستان و حکومەتی عێراق".
مارک سترۆ ئەوەشی خستووەتە ڕوو، وەزارەتی دەرەوەی ئەمەریکا لە نزیكەوە چاودێری و بەدواداچوونی گۆڕانكارییەكان دەكات و هەوڵەكانی بۆ پشتگیریی لە ئارامی و ئاسایشی هەرێمی كوردستان و رێگرتن لە بەزاندنی سەروەری خاكی عێراق و هێرشی تیرۆریستی بەردەوام دەبێت.
لە بەرامبەردا كەمال محەمەد ساڵح، وەزیری سامانە سرووشتییەكان بەوەكالەت، هەوڵەكانی ئەمەریكای بەرز نرخاندو داوای كرد "هەوڵەكانیان بۆ پاراستنی ژێرخانی وزە و ئابووریی هەرێم چڕ بكەنەوە کە ئەمە نۆیەمین هێرشە دەکرێتە سەر ئەم کێڵگەیە و زیانی بە ئابووریی هەرێمی كوردستان و حكومەتی عێراقی فیدراڵی گەیاندووە".
ئێوارەی ٢٦ی ئەم مانگە بە دوو درۆن هێرش كرایە سەر كێڵگەی گازی كۆرمۆر لە چەمچەماڵ و كەمپی كێڵگەكە كرایە ئامانج، بەهۆیەوە چوار كەس گیانیان لەدەست دا كە بەپێی زانیارییەكانی پەرەگراف چوار خەبیری یەمەنی بوون و تەمەنیان لە نێوان 38 بۆ 46 ساڵدا بووە.
ئەمڕۆیش كۆمپانیای دانەگاز ڕاگرتنی بەرهەمهێنانی لە كێڵگەی گازی كۆرمۆر ڕاگەیاند و دەڵێت "ڕێوشوێنەكانی كاركردنمان گۆڕیوە و سەلامەتی و تەندروستیی كارمەندان و بەڵێندەران گرنگترین شتە لەلای كۆمپانیاكەمان".
كۆرمۆر گەورەترین كێڵگەی گازی ھەرێمی كوردستانە و كۆمپانیای دانەگازی ئیماراتی كاری تێدا دەكات. گازی سرووشتی بۆ وێستگەكانی كارەبا لە هەولێر، چەمچەماڵ و بازیان دابین دەكات كە لە سەرچاوە سەرەكییەكانی بەرھمھێنانی كارەبان، لەگەڵ دابینكردنی غازی ماڵان.
دانەگاز ئاماژەی بەوە كردووە كە یەكێك لە كۆگاكانی هەڵگرتنی شلەمەنی لە كێڵگەکە لە "هێرشێكی درۆنیی تیرۆریستی"دا كرایە ئامانج و تیایدا "چوار كارمەند گیانیان لەدەست دا و هەشت كارمەندیش بریندار بوون".
دانەگاز لە ڕاگەیەندراوەكەیدا دەڵێت "سەلامەتی و تەندروستیی كارمەندان و بەڵێندەران گرنگترین شتە لە لای كۆمپانیای دانەگاز. هەرچەندە زیانی كەم بە دامەزراوەكان و كەرەستەكان گەیشتووە، بەڵام كاری بەرهەمهێنانمان بە شێوازی كاتی وەستاندووە و ڕێوشوێنەكانی كاركردنمان گۆڕیوە".
كۆمپانیاكە ڕایشیگەیاندووە كە لەگەڵ لایەنی پەیوەندیدار لەسەر هێڵن بۆ ئەوەی "ڕێوشوێنە ئەمنییەكان توندووتۆڵ بكەن و بتوانرێت بەرهەمهێنانی گاز لە كێڵگەی كۆرمۆر دەست پێ بكاتەوە".
داناغاز ئاماژەی بەوەش كردووە، لەگەڵ هەریەك لە حكومەتی عێراق و حكومەتی هەرێم لە گفتوگۆدان بۆ ئەوەی "بكەرانی ئەو كردەوە تیرۆریستییە بە سزای خۆیان بگەنن".
كێڵگەی گازی كۆرمۆر لە دوو ساڵی ڕابردوودا چەند جارێك بە مووشەك ھێرشی كراوەتە سەر و زیانی ماددی و ئاگركەوتنەوەی بەدواوە بووە، ھێشتا بە فەرمیی بەرپرسیاران و ھۆكاری ئەو ھێرشانە ئاشكرا نەكراون.
دوێنێ پاش كۆبوونەوەی هاوپەیمانیی بەڕێوەبردنی دەوڵەت كە بە بەشداریی نێچیرڤان بارزانی، سەرۆكی هەرێمی كوردستان لە بەغداد بەڕێوە چوو، هاوپەیمانییەكە ڕایگەیاند "سەركۆنەی ئەو هێرشە تاوانكارییە دەكەین كە كرایە سەر كێڵگەی كۆرمۆر. سەرۆكوەزیران (محەمەد شیاع سوودانی) ڕایگەیاند: سەرەداویان دەستكەوتووە كە دەیانگەیەنێت بەو كەسانەی تێوەگلاون لە ئەنجامدانی هێرشەكە".
هاوپەیمانیی بەڕێوەبردنی دەوڵەت كە لە لایەنە پێكهێنەرەكانی حكومەتی عێراق پێك دێت بە پارتی و یەكێتیشەوە، جەخت دەكاتەوە كە "ئەنجامدەرانی هێرشەكەی سەر كێڵگەی گازی كۆرمۆر دوای كۆتاییهاتنی لێكۆڵینەوەكان ڕەوانەی دادگا دەكرێن".
ئەمە لەكاتێكدایە كە پێشتر مەسروور بارزانی، سەرۆكی حكومەتی هەرێمی كوردستان، ڕایگەیاند كە "بەپێی زانیاریی سەرەتایی، ئەم هێرشانە لە ناوچەیەكی نزیك لەناو خاكی عێراقەوە ئەنجام دەدرێن".
مەسروور بارزانی وتیشی "دەبێت حكومەتی فیدراڵی كۆنتڕۆڵی ئەو گرووپە چەكدارییە نایاساییانە بكات كە زیان بە هەموومان دەگەیەنن".
هەریەك لە نێردەی نەتەوەیەكگرتووەكان لە عێراق، یەكێتیی ئەورووپا، ئەمریكا، فەرەنسا، بەریتانیا، یەمەن و ئیمارات ئیدانەی هێرشەكەی سەر كێڵگەی گازی كۆرمۆریان كردووە. داوای لێكۆڵینەوە و ئاشكراكردن و سزادانی ئەنجامدەرانی دەكرێت.