پەرەگراف
چوار فراکسیۆنی کوردستانی لە پەرلەمانی عێراق کە پارتییان تێدا نییە، لە بەیاننامەیەکی هاوبەشدا دواخستنی هەڵبژاردنی پەرلەمانی کوردستان ڕەت دەکەنەوە.
فراكسیۆنەكانی یەكێتی، نەوەی نوێ، کۆمەڵ و یەكگرتوو لە پەرلەمانی عێراق دەڵێن: بە توندی دژی هەموو هەوڵێكین بۆ دواخستنی هەڵبژاردنی پەرلەمانی كوردستان.
ئەو فراکسیۆنانە داوا لە دەسەڵاتەكانی ئەنجومەنی نوێنەران و ئەنجومەنی وەزیران و دادگای فیدراڵی و كۆمسیۆنی هەڵبژاردنەكانی عێراق دەكەن، دژی ئەو هەوڵانە بوەستنەوەو گرەنتی ئەنجامدانی هەڵبژاردن بكەن لە وادەی دیاریكراوی خۆیدا كە 10ی حوزەیرانی داهاتووە.
"سێجار لەسەر خواستى پارتێکى سیاسی و وەک تەحەدایەکى تەواوەتى یاسا و دەستوور و مەرسوومەکانى سەرۆکى هەرێم و بڕیارەکانى دادگاى فیدراڵى و کۆمسیۆنى هەڵبژاردنەکان، وادەى هەڵبژاردنى پەرلەمانى کوردستان دواخراوە" ئەو فراکسیۆنانە دەشڵێن "مافى هیچ پارتێکى سیاسی نییە دەسەڵاتى ئەمنى و سەربازیى خۆى بەکاربهێنێت بۆ سەپاندنى ئەمرى واقیع و یاخیبوون لە یاسا و بڕیارەکان".
هەڵوێستی ئەو فراکسیۆنانە لەکاتێکدایە محەمەد شیاع سوودانی ئەمڕۆ لەگەڵ سەرۆکی کۆمسیۆنی هەڵبژاردنی عێراق کۆبووەوەو جەختی کردەوە لەسەر گرنگی ئەنجامدانی هەڵبژاردنی پەرلەمانی کوردستان "لە چوارچێوەی ڕێککەوتنی سیاسی و بەشداریکردنی هەموو پێکهاتەکان و دڵنیابوون لە بەدیهێنانی بنەمای دادپەروەری و یەکسانی لە جێبەجێکردنی ئەم مافەدا".
بەپێی ڕاگەیەندراوێکی نووسینگەی سەرۆکوەزیرانی عێراق، دادوەر عومەر ئەحمەد سەرۆکی کۆمسیۆن لە دیدارەکەدا ئەو ڕێکارانەی خستووەتەڕوو کە کۆمسیۆن دەیگرێتەبەر بۆ ئەنجامدانی هەڵبژاردنی پەرلەمانی کوردستان.
پەیامەکەی سوودانی ناڕاستەوخۆ ئاماژەیە بۆ دواخستنی هەڵبژاردنەکە بەوپێیەی پارتی و بەشێکی زۆری پێکهاتەکان لەوانەش تورکمان و کرستیانەکان ئامادەنین بەشداریی بکەن، بەهۆی هەڵوێست وەرگرتنیان لە دژی بڕیارەکانی دادگای فیدراڵی عێراق لەبارەی یاسای هەڵبژاردن و هەڵوەشاندنەوەی کورسیی پێکهاتەکان.
پاش ئەوەی پارتی ڕایگەیاند بەم شێوەیەی ئێستا بەشداریی هەڵبژاردن ناكات، لە ڕێگەی سەرۆكایەتیی هەرێمەوە هەوڵی ڕازیكردنی لایەنەكان و بەدەستهێنانی پاڵپشتیی زیاتر بۆ دواخستنی هەڵبژاردن دەدات، بۆئەو مەبەستەش نێچیرڤان بارزانی سێ ڕۆژی ڕابردووی لە بەغداد بەسەر بردو تەوەرێکی سەرەکی کۆبوونەوەکانی لەگەڵ لایەنە عێراقییەکان پرسی هەڵبژاردنی پەرلەمانی کوردستان بوو.
ئەو پێشهاتە نوێیانە لەکاتێکدان، كۆمسیۆنی هەڵبژاردنەكانی عێراق تا ئێستا بەردەوامە لە کارەکانی بۆ ئەنجامدانی هەڵبژاردنەکە لە 10-6-2024، بڕیارە بانگەشەی هەڵبژاردن لە 10-5 واتە مانگێك بەر لە هەڵبژاردن دەست پێ بكات.
پارتی پاش سێ جار درێژكردنەوەی وادەی پێشكەشكردنی ناوی كاندیدەكان لەلایەن كۆمیسیۆنەوە، ئامادە نەبوو لیستی ناوەکانی پێشكەش بكات، بەهۆی ئەو ڕەخنانەی لە پرۆسەكە و بڕیارەكانی دادگای فیدراڵی هەیەتی لەبارەی یاسای هەڵبژاردن.
پارتی لەگەڵ ڕاگەیاندنی بەشداریی نەکردن، دەشڵێت، ئەگەر هەڵبژاردنیش دوابخرێت هەربەشداریی ناکەن، تائەوکاتەی ئەو پرسانە چارەسەر دەکرێن کە ئەوان بە نایاسایی و بەربەست لەبەردەم هەڵبژاردنەکە لە قەڵەمیان دەدەن، کە گرنگترینیان پەیوەستە بە؛ یەکلا کردنەوەی تانەکانی هەڵبژاردن لەلایەن دەسەڵاتی دادوەریی هەرێم نەک دەسەڵاتی دادوەریی عێراق لەگەڵ کورسی پێکهاتەکان لە پەرلەمان و ژمارەی کورسیی تەرخانکراو بۆ پارێزگای هەڵەبجە کە 3 کورسین و پارتی داوای زیاتر دەکات لەگەڵ کێشەی نەخوێندنەوەی پەنجەمۆری بەشێک لە دەنگدەران.
بەپێی بڕیاری دادگای فیدراڵی عێراق ژمارەی كورسییەكانی پەرلەمانی كوردستان بۆ 100 كورسی كەم كراونەتەوە و دادگاکە بە پاساوی "نادەستووریبوون" 11 كورسیی پێكهاتەكانی لابردو، پێكهاتەكان هاوشێوەی حیزب و پارتەكانی دیكە بەبێ سیستمی كۆتا بەشداری لە هەڵبژاردن دەكەن.
بڕیارە هەڵبژاردنەكە بە چوار بازنە بەڕێوە بچێت و ١٠٠ کورسییەکەی پەرلەمان دابەشکراون بەسەر پارێزگاکانی هەرێمدا بە جۆرێک، سلێمانی 38 كورسی، هەولێر 34 كورسی، دهۆك 25 كورسی و هەڵەبجە سێ كورسی بۆ تەرخان کراوە.