پەرەگراف
وەزارەتی تەندروستیی حكومەتی هەرێمی كوردستان دەست بەسەر ٣٥ جۆر خواردنەوەی وزەبەخشدا دەگرێت و لەناویان دەبات. وەزارەتەكە دەڵێت "ئەو خواردنەوانە هیچ ڕێگاپێدانێكیان نییە لە وەزارەتی تەندروستی و تۆمار نەكراون".
بەپێی نووسراوێك كە واژووی دكتۆر سامان بەرزنجی، وەزیری تەندروستیی هەرێمی كوردستانی لەسەرە و ئاراستەی سەرجەم بەڕێوەبەرایەتییەكانی تەندروستی كراوە، داوا كراوە بە هەماهەنگی لەگەڵ لیژنەكانی قائیمقامیەت، "بەزووترین كات دەست بكرێت بە كۆكردنەوە و دەستبەسەرداگرتن و لەناوبردن"ـی ئەو خواردنەوە وزەبەخشانە لە بازاڕەكانی هەرێم.
بەپێی ڕێنماییەكانی وەزارەتی تەندروستی، بۆ دروست كردن یاخود هاوردەكردنی خواردنەوە وەزەبەخشەكان، پێویستە كارگەكان و كۆمپانیاكان لە ڕێگای وەزارەتی تەندروستییەوە ڕێگەپێدان وەرگرن.
وەزارەتی تەندروستی دەڵێت "دوای بە دواداچوونی تیمە چاودێریەكانی وەزارەتی تەندروستی، دەركەوت ٣٥ جۆر خواردنەوەی وزەبەخش هەیە و هیچ ڕێگاپێدانێكیان نییە، ئەوەش بە قاچاغ و نەشیاو بۆ بە كار هێنان ئەژمار دەكرێ".
وەزارەتەكە دەشڵێت "لێكۆڵینەوە لەو بابەتە دەكرێت و ڕێكاری یاسایی بەرامبەر سەرپێچیكاران دەگیرێتە بەر".