پەرەگراف
"هیچ عەقڵێكی تەندروست ڕێگە نادات ئێمە پەیوەندی لەگەڵ وڵاتێكی بەهێز و دۆست، بە هاوكاری لەگەڵ ڕژێمێك كە ئەمڕۆ لە خراپترین پێگەی خۆیدایە، بگۆڕینەوە"، بەپێی ئاژانسێكی ئێرانی، نێچیرڤان بارزانی لە كۆبوونەوە لەگەڵ ئیبراهیم ڕەئیسی وای وتووە.(مەبەستی ئیسرائیلە).
هەر لە كۆبوونەوە لەگەڵ نێچیرڤان بارزانی، ئیبراهیم ڕەئیسی جەختی لە جێبەجێكردنی تەواوەتیی ڕێككەوتننامەی ئەمنی كردووەتەوە و داوای كردووە "خاكی هەرێم و عێراق لەلایەن ڕژێمی زایۆنی (ئیسرائیل) و گرووپە دژبەرەكانی شۆڕش (ئۆپۆزسیۆنی ئێران)ـەوە دژی ئێران بەكار نەهێنرێت".
ئاژانسی هەواڵی میهری ئێرانی ناوەرۆكی كۆبوونەوەی نێوان نێچیرڤان بارزانی، سەرۆكی هەرێمی كوردستان و ئیبراهیم ڕەئیسی، سەرۆككۆماری ئێران ئاشكرا دەكات.
بەپێی هەواڵی ئاژانسە ئێرانییەكە، ڕەئیسی لە كۆبوونەوەكەدا ڕایگەیاندووە "ئێمە لە نیەتپاكی و دۆستیی برایانی عێراقی و كورد دڵنیاین، بەڵام بە سەرنجدان لە دوژمنكاریی دوژمنان بە تایبەت ڕژێمی زایۆنی دژی میللەتی ئێران، چاوەڕوانیمان لە دەوڵەتی عێراق و هەرێمی كوردستان هەیە بە تەواوەتی ڕێگری لە هەر خراپ بەكارهێنانێكی خاكەكەیان لەلایەن دوژمنانی زایۆنی و گرووپە دژ بە شۆڕشەكانەوە بكەن".
ڕەئیسی لەگەڵ سوپاسكردنی دەوڵەتی عێراق و هەرێمی كوردستان لە بەرانبەر هەنگاوەكانیان بۆ جێبەجێكردنی ڕێككەوتننامەی ئەمنیی نێوان عێراق - ئێران، بۆ جێبەجێكردنی ورد و تەواوەتیی ڕێككەوتنەكە جەختی كردووەتەوە كە "لەچەكداماڵینی تەواوەتی و نەهێشتنی گرووپەكانی دژ بە شۆڕش (ئۆپۆزسیۆنی ئێران) لە خاكی عێراقدا پێویستە".
"ئێران هیچ ڕێگرییەك لەبەردەم فراوانكردنی هاوكارییە ئابووری و پەیوەندییە بازرگانییەكان لەگەڵ هەرێمی كوردستان نابینێت، ئێمە سنووری دوور و درێژی نێوانمان بە دەرفەتێكی گرنگ بۆ بەرزكردنەوەی ئاستی پەیوەندییەكانمان دەزانین، بەڵام ئاسایش بنەمای زەمینەسازیی هەر جۆرە پەیوەندییەك و فراوانكردنیەتی"، سەرۆككۆماری ئێران وای وتووە.
سەبارەت بە قسەكانی نێچیرڤان بارزانی، سەرۆكی هەرێمی كوردستانیش لە كۆبوونەوەكەدا، ئاژانسی میهر بڵاوی كردووەتەوە، سەرۆكی هەرێم، كۆماری ئیسلامیی ئێرانی بە "دۆستی ڕۆژە سەختەكان و وڵاتێك كە لەگەڵ سەرهەڵدانی كێشەكان لە تەنیش عێراق و هەرێمی كوردستان وەستاوە" وەسف كردووە،
هەروەها نێچیرڤان بارزانی وتوویەتی "ئێران بۆ ئێمە تەنیا دراوسێیەك نییە، ئەگەر شۆڕشی ئیسلامیی ئێران نەبوایە، دیار نەبوو كە بزووتنەوەی كوردی چ چارەنووسێكی دەبوو، پاراستنی ئەم هاوكاری و پەیوەندییانە هێڵێكی سوورە كە ئێمە هەرگیز تێی ناپەڕێنین".
"چاوەڕوانیمان لە ئێران ئەوەیە كە وەكوو پێشتر بۆ نەهێشتنی كێشەكان لە عێراق و بونیادنانی وڵاتێكی پێشكەوتوو و ئاوەدان لە تەنیشتمانەوە بێت. پەیوەندیی ڕابردوومان جێگای شانازییە، هەوڵی ئێمە بۆ ئەوەیە كە ئایندەیەكی درەوشاوە و باشتر بونیاد بنێین"، سەرۆكی هەرێمی كوردستان وای وتووە.
هەروەها ئاژانسەكە دەڵێت، سەرۆكی هەرێمی كوردستان جەختی لە جێبەجێكردنی تەواوەتیی ڕێككەوتننامەی ئەمنیی نێوان ئێان و عێراق كردووەتەوە و ڕایگەیاندووە "هیچ عەقڵێكی تەندروست ڕێگە نادات ئێمە پەیوەندی لەگەڵ وڵاتێكی بەهێز و دۆست بە هاوكاری لەگەڵ ڕژێمێك كە ئەمڕۆ لە خراپترین پێگەی خۆیدایە، بگۆڕینەوە".