هاووڵاتییەكی مەدەنی بەهۆی تۆپبارانی توركیا بۆ سەر گوندێكی قەزای سیدەكان شەهید بوو

پەرەگراف

ئێوارەی ئەمڕۆ هاووڵاتییەكی مەدەنی بەهۆی تۆپبارانی توركیا بۆ سەر گوندێكی قەزای سیدەكان شەهید بوو.

كامەران عوسمان، ئەندامی تیمی عێراقی ڕێكخراوی CPT دەڵێت، ئەو هاووڵاتییە "كاتژمێر 4:15 خولەكی دوانیوەڕۆی ئەمڕۆ بەهۆی تۆپبارانی سوپای توركیا لە گوندی مێرگە حەوش لە كوێستانی سنین، شەهید بووە".

هاووڵاتییەكە ناوی (بەدیع كەمال محەمەد)ـە و لەدایكبووی ساڵی (1995)ـە.

بەپێی ئاماری ڕێكخراوی CPT كە چاودێریی ناوچەكانی شەڕ دەكات، لە سەرەتای ئەمساڵەوە تا ئێستا، "12 هاووڵاتیی مەدەنی بوونەتە قوربانیی هێرش و ئۆپەراسیۆنەكانی سوپای توركیا لە هەرێمی كوردستاندا".

ڕێكخراوەكە دەشڵێت "لەو ژمارەیە 10 هاووڵاتیی مەدەنی شەهید و دوو هاووڵاتی بریندار بوون. پێنج لە قوربانییەكانیش لە سنووری قەزای سیدەكان بوون".

هەر ئەمڕۆ، ڕێكخراوی ‏CPT‏ بڵاوی كردەوە، تەنیا شەوی ڕابردوو سوپای توركیا "بە شێوەیەكی زنجیرەیی و لە ‏ڕێگەی فڕۆكەی جەنگییەوە، 24 جار بۆردومانی هەرێمی كوردستانی كردووە، بەڵام هیچ ‏هاووڵاتییەكی مەدەنی نەبوونەتە قوربانی". وەزارەتی بەرگریی توركیاش دەڵێت "20 بنكە ‏و بارەگا و كۆگای پەكەكەمان كردووەتە ئامانج".‏