پەرەگراف
حەوت حیزب لە سلێمانی دەربارەی ئەنجامەكانی هەڵبژاردن كۆبوونەوە و لەسەر پێنج خاڵ ڕێككەوتن. دیارتین داواكاریی ئەو حیزبانە "هەڵوەشاندنەوەی ئەنجامی هەڵبژاردن و دووبارەكردنەوەیەتی". سەبارەت بە هەڵبژاردنی ئەلیكترۆنیش لە داهاتوودا، داوای گۆڕانكارییەك دەكەن.
دەزگا و مەكتەبی هەڵبژاردنی هەریەكە لە لایەنەكانی (كۆمەڵی دادگەری، ڕەوتی هەڵوێست، بەرەی گەل، یەكگرتووی ئیسلامی، بزووتنەوەی گۆڕان، بزووتنەوەی ئیسلامی و پەیوەنديی ئیسلامی) لە بارەگای ئەنجوومەنی سیاسیی كۆمەڵی دادگەری لە سلێمانی كۆبوونەوە.
پاش كۆبوونەوەكە ئەو لایەنانە جەختیان كردەوە كە "ساختەكاریی گەورە" ئەنجام دراوە و لە تانەكانیاندا بەڵگەیان بۆ ئەوە خستووەتە ڕوو. هەروەها ڕایانگەیاند كە لەسەر پێنج خاڵ ڕێككەوتوون:
حەوت لایەنەكە لەسەر ئەم پێنج خاڵە ڕێككەوتن:
1- ئێمە ئەم لایەنانە ڕایدەگەیەنین كە لەم هەڵبژاردنەدا ساختەكاری كراوە و ئەوەی كە ئێستا هەیە گوزارشت لە دەنگ و ئیرادەی دەنگدەرانی هەرێمی كوردستان ناكات.
2- هەموومان تانەمان لە ئەنجامی هەڵبژاردنەكان داوە و چاوەڕوانیمان لە دەستەی دادوەریی هەڵبژاردنەكان هەیە بە جیددی بەدوای تانەكاندا بچێت و ڕێڕەویی یاساییان بۆ بگرێتە بەر.
3- هەماهەنگیمان بۆ سەرجەم پرسەكانی بواری هەڵبژاردن بەردەوام دەبێت.
4- ئەو ساختەكارییەی كراوە ئەنجامی هەڵبژاردنی ئەلیكترۆنییە، بۆیە داوا دەكەین گۆڕانكاری لە سیستمی هەڵبژاردنی ئەلیكترۆنیدا بكرێت، بە جۆرێك كە ئامێری پیكۆس لەسەر سندووقەكان لاببرێت و دەنگدەران كارتی دەنگدانەكانیان بە دەستی بخەنە ناو سندووقەكەوە، بەمەش كۆمیسیۆن دڵنیایی بدات بە دەنگدەران كە ئەو دەنگەی دەیخاتە ناو سندووق گۆڕانكاریی بەسەردا نایەت.
5- داواكارین لە دەستەی دادوەریی هەڵبژاردن بە فەرمی ئەم هەڵبژاردنەی پەرلەمانی كوردستان هەڵبوەشێنێتەوە و ئەنجامەكانی پەسەند نەكات، دووبارە هەڵبژاردن لە هەرێمی كوردستان ئەنجام بدرێتەوە.