پەرەگراف
پێدانی دۆلار بە نرخی بانكی ناوەندی بە گەشتیاران، لە فڕۆكەخانەكانی سلێمانی و هەولێر ڕاگیرا. پەرلەمانتارێك دەڵێت "ئەو بڕە دۆلارەی بۆ گەشیارانی هەرێم دابین دەكرێت زۆر كەمە و داوا كراوە زیاد بكرێت".
چەند ڕۆژێكە لە فڕۆكەخانەی سلێمانی و ئەمڕۆیش لە فڕۆكەخانەی هەولێر پێدانی دۆلار بە گەشتیاران ڕاگیراوە، بەهۆی تەواوبوونی دۆلارەوە. بەپێی زانیارییەكانی پەرەگراف، بەشێك لەو گەشتیارانەی سلێمانیش كە نۆرەیان بۆ وەرگرتنی دۆلار گرتبوو، ئەمڕۆ بەریان نەكەوت.
سۆران عومەر، ئەندامی پەرلەمانی عێراق، بە پەرەگرافی ڕاگەیاند "ئەو پارەی كە لەلایەن بانكی تی بی ئای بۆ گەشتیارانی هەرێم لە فڕۆكەخانەكانی سلێمانی و هەولێر دابین دەكرێت، بڕەكەی كەمە و بەشی گەشتیاران ناكات".
بە قسەی ئەو پەرلەمانتارە، بۆ هەولێر و سلێمانی ڕۆژانە پارەی "30 گەشتیار" دابین كراوە، كە ئەو بڕە "زۆر كەمە" و فڕۆكەخانەكان داوایان كردووە زیاد بكرێت.
سۆران عومەر وتیشی "تەنیا لە سلێمانی هەفتانە نزیكەی 600 كەس گەشتی عومرە دەكەن، ئەمە جگە لە گەشتیاری دیكە. تەواوبوونی پارەكە هۆكارەكەی هەر ئەوەیە كە بڕێكی كەم بۆ گەشتیارانی هەرێم دابین كراوە، ئەمەش وا دەكات بەش نەكات".
بەهۆی گرانیی نرخی دۆلار لە بازاڕەكانی دراودا، بانكی ناوەندی بۆ هەر گەشتیارێك بڕی سێ هەزار دۆلار (30 گەڵا) بە نرخی فەرمی كە 132 هەزار دینارە بۆ هەر 100 دۆلارێك، دابین دەكات.