پەرەگراف
لە چوارچێوەی ئامادەكارییەكان بۆ هەڵبژاردنی پەرلەمانی عێراق، كۆمیسیۆنی هەڵبژاردنەكان پرۆسەی تۆماری بایۆمەتری دەست پێ دەكاتەوە، بۆ دروستكردنی كارتی دەنگدان بۆ ئەو دەنگدەرانەی كە نییانە و چارەسەركردنی ئەو كێشانەی لە پەنجەمۆر و خوێندنەوەی كارتی دەنگداندا هەن.
لە ئەمڕۆ 3-12-2024ـەوە، دەنگدەرانی هەرێمی كوردستان دەتوانن سەردانی نزیكترین بنكەكانی كۆمیسیۆن بكەن بۆ تۆماری بایۆمەتری و دروستكردنی كارتی دەنگدان، یان چارەسەركردنی ئەو كێشانەی لە هەڵبژاردنی پەرلەمانی كوردستان هەیان بووە.
ئەنجوومەنی كۆمیسیارانی كۆمیسیۆنی هەڵبژاردنەكانی عێراق ڕۆژی 2-12-2024 كۆبووەوە و بڕیاری دا بە "دەستپێكردنەوەی تۆماری بایۆمەتری لە پارێزگاكانی هەرێمی كوردستان، وەرگرتنەوەی پەنجەمۆر لەو دەنگدەرانەی كارتی دەنگدانەكانیان پەنجەمۆری تێدا نییە".
هەروەها كۆمیسیۆن بڕیاری دا بە دەستپێكردنی "دابەشكردنی كارتی دەنگدان"ـی ئەو دەنگدەرانەی كە پێشتر كارتیان بۆ دروست كراوە و وەریان نەگرتووەتەوە.
لە هەڵبژاردنی خولی شەشەمی پەرلەمانی كوردستان كە 20-10-2024 بەڕێوەچوو، جگە لەوەی سەدان هەزار كەس بەشداریی دەنگدانیان نەكرد بەهۆی نەبوونی كارتی دەنگدانەوە، هەزاران دەنگدەری دیكەش بەهۆی نەخوێندنەوەی پەنجەمۆر و كارتی دەنگدان، لە پرۆسەكە بێبەش بوون.