
پەرەگراف
یەكێك لە داواكارییەكانی بەغدا بۆ چارەسەری كێشەی مووچەی هەرێم، تەواوكردنی پرۆسەی بەبانكیكردنی مووچە (تەوتین)ـە. وەزارەتی دارایی هەرێمیش لە هەوڵەكانی بۆ تۆماركردنی فەرمانبەرانی سلێمانی لە هەژماری من بەردەوامە و ڕێگەیەكی "ئاسانتر" دەخاتە بەردەمیان كە فۆڕمی ئۆنلاینە.
ئەمڕۆیش شاندێكی وەزارەتی دارایی عێراق گەیشتە هەرێم و لەگەڵ وەزارەتی دارایی هەرێم دەربارەی پابەندییەكانی هەردوولا گفتوگۆ و بەدواداچوون دەكەن. دەبێت لە چوارچێوەی یاسای بودجە و بڕیارەكەی دادگای فیدراڵی، هەردوولا پابەندییەكانیان جێبەجێ بكەن، كە تەوتین خاڵێكی سەرەكییە.
وەزارەتی دارایی هەرێم لە هەژماری خۆی لە تۆڕی كرمەڵایەتیی فەیسبووك بڵاوی كردەوە "هەژماری من ڕێگەیەكی نوێی تۆماركردن دەخاتە بەردەم فەرمانبەرانی پارێزگای سلێمانی، بە مەبەستی تۆماركردنی سەرتاسەری لە چوارچێوەی پڕۆژەی هەژماری من".
وەزارەتی دارایی لینكی فۆڕمێكی ئۆنلاینی بڵاو كردووەتەوە و دەڵێت "لەمەودوا فەرمانبەرانی پارێزگای سلێمانی دەتوانن لە ڕێگای پڕكردنەوەی فۆڕمێكی ئۆنڵاین خۆیان تۆمار بكەن و ببنە خاوەنی هەژماری بانكی".
"ئەم بژاردە نوێیە بەشێكە لە هەوڵەكانی هەژماری من بۆ ئاسانكاری لە تۆماركردنی فەرمانبەران، تاوەكو بتوانن بەشێوەیەكی ئاسان و بەبێ سەردانیكیردنی بنكەكانی تۆمار، خۆیان تۆمار بكەن"، وەزارەتی دارایی وا دەڵێت.
ئەم ئاسانكارییە نوێیەی وەزارەتی دارایی هەرێم بۆ خۆتۆماركردنی فەرمانبەرانی سلێمانی لە هەژماری من، پاش ئەوە دێت كە وەزارەتی دارایی عێراق بۆ چارەسەری كێشەی مووچە، داوای تەواوكردنی بەبانكیكردنی پرۆسەی مووچەی مووچەخۆرانی هەرێم دەبات.
ڕۆژی 14-01-2025، ژمارەیەك ئەندامی كوردی پەرلەمانی عێراق سەردانی وەزارەتی دارایی عێراقیان كرد بۆ بەدواداچوون بۆ كێشەی مووچەی مووچەخۆرانی هەرێم.
سۆران عومەر كە بەشداریی كۆبوونەوەكەی كردبوو، بە پەرەگرافی ڕاگەیاند دەربارەی مووچەی مانگی یەكی 2025، وەزارەتی دارایی عێراق ڕایگەیاندووە كە "بە مەرج" دەینێرن و وتی "بۆ مووچەی مانگی كانوونی دووەم، سەرۆكوەزیرانی عێراق نووسراوی كردووە كە مووچە بەبانكی (تەوتین) بكرێت. عێراق كۆمەڵێك مەرجی داناوە بۆ مووچەی مانگی یەك، كە گرنگترینیان تەوتینە".