بارزانی و سەرۆکایەتی ئەنەکەسە کۆبوونەوە؛ 'جەخت لە یەکڕیزیی لایەنە کوردییەکانی سووریا کرا'

 پەرەگراف

مەسعود بارزانی و سەرۆکایەتی ئەنەکەسە کۆبوونەوە، بارەگای بارزانی دەڵێت: بارزانی جەختی لە یەکڕیزی و هەماهەنگی و کاری هاوبەشی لایەنە کوردییەکانی سووریا کردەوە.

لە دیدارەکەدا بارودۆخی سیاسی و ئەمنیی سووریا و دەرئەنجامەکانی  گفتوگۆ و لەیەکنزیکبوونەوەی لایەنە کوردییەکانی سووریا و سەردانی مەزڵوم عەبدی فەرماندەی گشتیی هێزەکانی سووریای دیموکرات بۆ لای بارزانی تاوتوێ کراوە.

ئێوارەی 16-01-2025، مەسعود بارزانی، سەرۆكی پارتی دیموكرات، لە سەلاحەدین لە هەلێر پێشوازیی لە مەزڵووم عەبدی، فەرماندەی گشتیی هێزەكانی سووریای دیموكرات كرد.

مەزڵووم عەبدی، ناوەرۆكی كۆبوونەوەی لەگەڵ مەسعود بارزانی ئاشكرا كرد و ڕایگەیاند "لەگەڵ سەرۆك مەسعود بارزانی جەختمان لە یەكهەڵوێستیی كورد لە سووریا كردەوە و دەبێت دانوستان لەگەڵ دیمەشق بە شێوەیەكی ئاشتیانە مافی گەلی كورد بپارێزێت".

فەرماندەی گشتیی هەسەدە كۆبوونەوەی لەگەڵ بارزانی بە "جێگای دڵخۆشی" وەسف كرد و لە ‏تۆڕی كۆمەڵایەتیی ئێكس دەشڵێت "هەروەها جەختمان لەوە كردەوە كە گرنگیی یەكێتیی كوردی ‏و ئارامیی ناوچەكە بەگشتی، بەرپرسیارێتیی هەموومانە و ئێمە پێكەوە هاوكار دەبین".‏

هاوکات بارەگای بارزانی ڕاگەیەندراوێکى لەبارەى کۆبوونەوەكە بڵاو کردەوە و وتی "لە دیدارەکەدا جەخت لەوە کرایەوە کە پێویستە لایەنە کوردییەکانی سووریا بەبێ دەستوەردانی هیچ لایەنێک و بە ڕێکاری ئاشتیانە، بڕیار لە چارەنووسی خۆیان بدەن".

بارەگای بارزانی دەشڵێت، لە کۆبوونەوەکەدا هەردوولا هاوڕا بوون کە دەبێت "لایەنە کوردییەکان بە یەکڕێزی و یەکهەڵوێستیی هاوبەش، لەگەڵ حکومڕانانی تازەی سووریا بگەنە لێک تێگەیشتن و ڕێککەوتن".