پەرلەمانی عێراق هەمواری یاسای بودجەی پەسەند کرد بە ئامانجی دەستپێکردنەوەی هەناردەی نەوتی هەرێم
پەرەگراف
پەرلەمانی عێراق هەمواری یاسای بودجەی پەسەند کرد بە ئامانجی دەستپێکردنەوەی هەناردەی نەوتی هەرێم، ١٦ دۆلار جێگیر کرا بۆ بەرهەمهێنان و گواستنەوەی هەر بەرمیلێک نەوتی هەرێم.
پەرلەمانتار دیلان غەفور بە پەرەگرافی وت "پێشنیازەکە بەوجۆرەی لە حکومەتەوە ڕەوانەی پەرلەمان کرابوو دەنگی لەسەر دراو پەسەند کرا، بەوەش تێچووی بەرهەمهێنان و گواستنەوەی هەر بەرمیلێک لە نەوتی هەرێم ١٦ دۆلاری بۆ تەرخان دەکرێت لەلایەن وەزارەتی دارایی عێراقەوە".
حکومەتی هەرێم و کۆمپانیا نەوتییەکان بەو بڕە ڕازین و چاوەڕوان دەکرێت بەرزکردنەوەی تێچووی بەرهەمهێنان و گواستنەوەی نەوت ببێتەهۆی دەستپێکردنەوەی هەناردەی نەوتی هەرێمی کوردستان بۆ بازاڕی نێودەوڵەتی.
ئەو ١٦ دۆلارە تا ئەو كاتەیە کە كۆمپانیایەكی پسپۆڕ (كە لەماوەی ٦٠ ڕۆژدا دەستنیشان دەكرێت بە ڕێكەوتنی نێوان هەرێم و بەغداد) خەمڵاندنێكی دادپەروەرانە بۆ تێچووی بەرهەمهێنان و گواستنەوە لە كێڵگە نەوتییەكانی هەرێم دەكات.
هەربەپێی هەمواری یاساکە، نەوتی هەرێمی کوردستان ڕادەستی کۆمپانیای سۆمۆی عێراقی دەکرێت و داهاتەکەی دەگەڕێتەوە بۆ خەزێنەی گشتی عێراق.
هەناردەکردنی نەوتی هەرێمی کوردستان و کەرکوک بۆ بازاڕەکانی جیهان لە 25ی ئازاری 2023 وەستاوە، ئەوەش بە بڕیارێکی دادگای ناوبژیوانی نێودەوڵەتی لە پاریس لەسەر سکاڵایەکی عێراق لە دژی تورکیا.