پەرەگراف
كۆمیسیۆنی هەڵبژاردنەكانی عێراق بۆ ڕۆژی هەڵبژاردن پێویستی بە كارمەندی زیاتر هەیە. تا ئێستا زیاتر لە 187 هەزار كەس داواكارییان پێشكەش كردووە، بەڵام كۆمیسیۆن دەڵێت "پێویستمان بە نزیكەی 250 هەزار كارمەندە".
جومانە غەلای، وتەبێژی كۆمیسیۆنی باڵای سەربەخۆی هەڵبژاردنەكانی عێراق، بە پەرەگرافی ڕایگەیاند "تا دوێنێ 09-06-2025، لە سەرتاسەری عێراق 187 هەزار و 861 كەس داواكارییان بۆ كارمەندی لە ڕۆژی هەڵبژاردندا پێشكەش كردووە، بەڵام بەپێی پێوەرە نێودەوڵەتییەكان، پێویستمان بە نزیكەی 250 هەزار كارمەند هەیە".
لە سێ پارێزگاكەی هەرێم 15 هەزار و 660 كەس داواكارییان بۆ كارمەندیی ڕۆژی هەڵبژاردن پێشكەش بە كۆمیسیۆن كردووە، سلێمانی شەش هەزار و 20 كەس، هەولێر پێنج هەزار و 412 كەس و دهۆك چوار هەزار و 228 كەس.
وتەبێژی كۆمیسیۆن وتیشی "فەرمانبەرانی حكومی، دەرچووانی دانەمەزراو و خوێندكارانی ئامادەیی بەرەو سەرەوە مافی پێشكەشكردنی داواكارییان هەیە بۆ كارمەندی لە ڕۆژی هەڵبژاردندا هەیە".
پرۆسەكە یەك مانگی ماوە و تا 09-07-2025 بەردەوام دەبێت.
ئەو كەسانەی كە دەیانەوێت داواكاری پێشكەش بكەن، دەبێت فۆڕمێكی ئۆنلاین پڕ بكەنەوە كە لەسەر پلاتفۆرمەكانی كۆمیسیۆن (سایت و سۆشیال میدیا) هەیە و زانیاریی كەسی و هەندێك بەڵگەنامەی پێویستە.