پەرەگراف
بەڕێوەبەری ناوەندی ڕاگەیاندنی هێزەكانی سووریای دیموكرات (هەسەدە)، خاڵی بنەڕەتیی ناكۆكییەكانیان لەگەڵ حكومەتی دیمەشق ئاشكرا دەكات و دەربارەی چەكدانانی هەسەدەیش دەڵێت "چەكە كانمان هێڵی سوورە و بە هیچ شێوەیەك داینانێین. سازشیش لەسەر پرەنسیپەكانمان ناكەین". فەرهاد شامی جەخت دەكاتەوە كە "هیچ كەسێك لە سووریا خۆی بەدەستەوە نادات و ئەوەی جەخت لەسەر لۆژیكی خۆبەدەستەوەدان بكاتەوە، لە كۆتاییدا دەدۆڕێت. پێم وایە ڕووداوەكانی سوەیدا ئەمەیان سەلماند".
وتەبێژی ناوەندی ڕاگەیاندنی هەسەدە لە گفتوگۆیەكدا لەگەڵ كەناڵی ئەلیەومی سووری، باس لە ژمارەیەک خاڵی جەوهەریی ناكۆك لەنێوان هەسەدە و دیمەشق دەكات، بەڵام بەردەمبوونی دانوستانەكانیان و پەنا نەبردنیان بۆ بایكۆت، بە "خاڵی ئەرێنی" ناو دەبات.
لەو گفتوگۆیەدا دەربارەی ڕووداوەكانی سوەیدا، فەرهاد شامی هێرشی هێزەكانی حكومەتی سووریای بۆ سەر شارەكە، بە "درێژەی هەڵەكانی حكومەتی ئێستایە كە دەیەوێت كێشەكان بە ڕێگەی ئەمنی چارەسەر بكات" ناو برد. وتیشی "ئەو ڕێگە خوێناوییەی حكومەت دەستی پێ كرد، چارەسەری كێشەكان ناكات، بەڵكو هەندێك لە كێشەكان دوادەخات و دەرگا بە ڕووی تەقینەوەی گەورە و ئاژاوە و دەستوەردانی دەرەكیدا دەكاتەوە".
دەربارەی دانوستانەكان و خاڵی ناكۆكی نێوان هەسەدە و دیمەشق، شامی ڕایگەیاند "خاڵی بنەڕەتیی جێی ناكۆكی ئەوەیە كە حكومەتی سووریا زیاتر گوێ لە دەرەوە دەگرێت وەك لە ناوخۆ، سیاسەتەكانی لەسەر بنەمای گرەنتیدانی دەرەكییە نەك ناوخۆ".
وتەبێژی ناوەندی ڕاگەیاندنی هەسەدە، خاڵێكی دیكەی ناكۆكییەكانی بۆ "لۆژیك و مانای دانوستان" گەڕاندەوە و وتی "حكومەتی دیمەشق لۆژیكی سەپاندنی دەسەڵاتی خۆی دانوستان دەكات. بۆ نموونە دەڵێت: دەبێت ناوچەكانی باكوور و ڕۆژهەڵاتی سووریا بخرێنە سەر حكومەتی سووریا. دەسەڵاتمان بەسەر زیندانەكان، كەمپەكان و دەروازە سنوورییەكان هەبێت".
"ئێمە دەڵێین: بێگومان سووریا یەك حكومەت و یەك سوپای دەبێت، ئەمە شتێكی حەتمییە. بەڵام ئێمە ناچینە دیمەشق بۆ ئەوەی گفتوگۆ لەسەر ناوچەكانی دەسەڵات بكەین، ئێمە دەچین گفتوگۆ لەسەر ناسنامەی سووریا دەكەین، گفتوگۆ لەسەر داهاتووی سووریا دەكەین. بەڵام ئەوەی حكومەت دەیەوێت ئەوەیە كە گفتوگۆ لەسەر قەسەدە بكەین، گفتوگۆ لەسەر بەڕێوەبەرایەتیی خۆسەر بكەین"، فەرهاد شامی وا دەڵێت.
نوێ دەكرێتەوە...