پەرەگراف
ئەنجومەنی وەزیرانی هەرێمی كورستان پابەندیی خۆی بە لێكتێگەیشتنەكەی لەگەڵ بەغداد ڕادەگەیەنێت و دەڵێت "ئەو بڕە نەوتەی ئێستا ئامادەیە بۆ هەناردەكردن، ڕادەستی كۆمپانیای (سۆمۆ) دەكرێت بەمەبەستی هەناردەكردنی لە ڕێگای بەندەری جەیهانەوە".
ئەنجومەنەكە دوای كۆبوونەوەی ئەمڕۆی دەشڵێت "لیستی مووچە و تەرازووی پێداچوونەوەی مانگی حوزەیران، ڕەوانەی وەزارەتی دارایی فیدراڵ كراوە و لە بەرامبەردا، دەبێت بەغدا مووچەی مانگی حوزەیرانی مووچەخۆرانی هەرێم خەرج بكات".
ڕاگەیەندراوی حكومەتی هەرێم:
ئەمڕۆ چوارشەممە 30ی تەممووزی 2025، بە سەرپەرشتی سەرۆك وەزیران مەسرور بارزانی و ئامادەبوونی قوباد تاڵەبانی جێگری سەرۆك وەزیران، ئەنجومەنی وەزیرانی هەرێمی كوردستان كۆبووەوە.
بڕگەی یەكەمی كۆبوونەوە، تاوتوێكردنی دوا هەنگاوەكانی خەرجكردنی مووچەی مانگی حوزەیران و تەمموزی 2025 بوو لەبەر ڕۆشنایی بڕیاری هاوبەشی هەردوو ئەنجومەنی وەزیرانی فیدراڵ و هەرێمی كوردستان و بە دواداچوونی كاری لیژنە هاوبەشەكانی وەزارەتی دارایی و دیوانی چاودێری دارایی فیدراڵ و هەرێمی كوردستان بە پێی دوا بڕیاری هەردوو ئەنجومەنی وەزیرانی فیدراڵ و هەرێم . سەرەتا ئاوات شێخ جەناب وەزیری دارایی وئابووری، ڕاپۆرتێكی لەسەر پۆلێنكردنی داهاتە گشتییەكان لە هەرێمی كوردستان و دەستنیشانكردنی جۆری داهات و سەرچاوەكەی و بنەمای یاسایی وەرگرتنی خستەڕوو، كە مانگانە بە شێوازێكی ڕوون و شەفافانە، لە چوارچێوەی تەرازووی پێداچوونەوە، پێشكەشی وەزارەتی دارایی فیدڕاڵ كراوە و بە بەردەوامیش لەلایەن تیمی هاوبەشی هەردوو دیوانی چاودێری داراییشی وردبینی بۆ كراوە.
وەزیری دارایی و ئابووری ئاماژەی بەوە دا كە نوێنەرەكانی هەرێمی كوردستان لە لیژنەی هاوبەشی هەردوولا بۆ پۆلێنكردنی داهاتە نانەوتییەكان و دەستنیشانكردنی بەشی گەنجینەی فیدڕاڵیی لەم داهاتانە، هاوكار بوون لە سەرخستنی كاری لیژنەكە و پشتبەست بە دەستوور و یاسای بەڕێوەبردنی دارایی فیدڕاڵی و یاسای بودجەی سێ ساڵە، بە وردیی پێشنیاری هەرێمیان لەم بارەیەوە ئامادە كردووە.
وەزیری دارایی و ئابووری، ڕوونیكردەوە كە لیستی مووچە و تەرازووی پێداچوونەوەی مانگی حوزەیران، ڕەوانەی وەزارەتی دارایی فیدراڵ كراوە و ئەركی وەزارەتی دارایی عێراقە كە لە بەرامبەردا، مووچەی مانگی حوزەیرانی مووچەخۆرانی هەرێم خەرج بكات.
ئەنجومەنی وەزیران، دەستخۆشی لە وەزارەتی دارایی و ئابووری و تیمی دیوانی چاودێری دارایی و دانوستان لەگەڵ بەغدا كرد بۆ ئەم ڕاپۆرتە شیكارییە سەبارەت بە داهاتە نانەوتییەكانی هەرێم و هەوڵ و كاركردنیان لەم بارەیەوە. هەروەها ئەنجومەنی وەزیران ئەو تێڕوانینەی وەزارەتی پەسەندكرد سەبارەت بە پۆلێنكردنی داهاتەكان لە چوارچێوەی ئەو دەقە دەستووریی و یاساییانەی لە كۆبونەوەكەدا خرانەڕوو. نوێنەرانی هەرێمی كوردستانیشی لە لیژنە هاوبەشەكە لەگەل حكومەتی فیدڕاڵ ڕاسپارد كە گفتوگۆی ئەم تێڕوانینە لەگەڵ هاوتاكانیان لە لیژنەكە بكەن، تا وەكوو لە نزیكترین دەرفەتدا، دۆسیەی داهاتی نانەوتی یەكلایی ببێتەوە بە گوێرەی ئەو ڕێكارە هاوبەشەی لە بڕیاری هەردوو ئەنجومەنی وەزیرانی هەرێم و فیدڕاڵدا هاتووە.
پاشان كەمال محەمەد ساڵح وەزیری سامانە سروشتییەكان بە وەكالەت، بابەتی دەستپێكردنەوەی هەناردەكردنی نەوتی هەرێمی كوردستانی لە بەر ڕۆشنایی دوا بڕیاری هاوبەشی ئەنجومەنی وەزیرانی فیدراڵ و هەرێم خستەڕوو.
لە دوای گفتوگۆ، ئەنجومەنی وەزیران بڕیاریدا كە حكومەتی هەرێمی كوردستان بەرپرسیارێتی قەرەبووكردنەوەی كۆمپانیای نەوتی بەرهەمهێنەری ئەو بڕە نەوتە دەگرێتە ئەستۆ كە بە گوێرەی بڕیاری هاوبەشی ئەنجومەنی وەزیرانی فیدراڵ و هەرێم بۆ مەبەستەكانی بەكارهێنانی ناوخۆ لە هەرێم، تەرخان كراوە. ئەو بڕە نەوتەی ئێستا ئامادەیە بۆ هەناردە و لە لایەن كۆمپانیا بیانییەكان بەرهەم دەهێنرێت، ڕادەستی كۆمپانیای بە بازاڕكردنی نەوت (سۆمۆ) دەكرێت بەمەبەستی هەناردەكردنی لە ڕێگای بەندەری جەیهانەوە.
ئەنجومەنی وەزیران دووپاتی كردەوە، كە حكومەتی هەرێمی كوردستان بەردەوامە لەسەر پابەندبوون بە لەیەكتێگەیشتنی هاوبەشی نێوان هەردوولا و هەر لەم چوارچێوەیەش، دەبێت حكومەتی فیدڕاڵ مووچەی مانگی حوزەیران و دواتریش مانگی تەمموز خەرج بكات هاوشێوەی مووچەخۆرانی ناوچەكانی دیكەی عێراق ، چونكە هەرێم پابەندە بە جێبەجێكردنی ئەوەی لەسەری بووە لە بارەی دۆسیەی نەوت و داهاتی نا نەوتی و حكومەتی هەرێم پیشتیوانی سەرخستنی لەیەكگەیشتنی هاوبەشی نێوان هەردوولایە كە پێشتر لەلایەن ئەنجومەنی وەزیرانی هەردوولا پەسەند كراوە.