پەرەگراف
وەزارەتی پێشمەرگە پلەی زیاتر لە 12 هەزار پلەدار و پێشمەرگەی بەرز كردەوە. بەردەوامیی پلەبەرزكردنەوە لە وەزارەتەكە لەكاتێكدایە كە نزیكەی 10 ساڵە پەلەبەزركردنەوەی مامۆستایان و فەرمانبەران بە "نایاسایی" ڕاگیراوە، بەوهۆیەشەوە هەریەكەیان "مانگانە 60 بۆ 300 هەزار دینار مووچە كەمتر لە مافی خۆی وەردەگرێت".
وەزارەتی پێشمەرگەی حكومەتی هەرێمی كوردستان ڕایگەیاند، بەپێی فەرمانێكی وەزاری، بڕیار درا بە بەرزكردنەوەی پلەی (١٢٠١٠) پێشمەرگەی سەر بە دیوان و لیواكانی پیادەی سەر بەوەزارەتی پێشمەرگە".
پلە بەرزركردنەوەی فەرمانبەران بە بڕیارێكی حكومەتی هەرێم كە بە "نایاسایی" ناو دەبرێت، لە ساڵی 2016ـە ڕاگیرا. دواتر پلەبەرزكردنەوە بۆ بواری سەربازی، سێ سەرۆكایەتییەكەی هەرێم و ئەنجومەنی دادوەری دەستی پێ كردەوە، بەڵام ڕاگرتنەكە بۆ مامۆستایان و فەرمانبەرانی مەدەنی بەردەوامە.
عومەر گوڵپی، ئەندامی پێشووی پەرلەمانی كوردستان، بە پەرەگرافی ڕاگەیاند "ڕاگرتنی پلەبەرزكردنەوەی مامۆستایان و فەرمانبەران لە كاتێكدایە كە بەپێی یاسا، ئەم مافە بۆ فەرمانبەران دابین كراوە و نە وەزارەتی دارایی و نە ئەنجومەنی وەزیران، بە هیچ پاساوێك بۆیان نییە مافێك كە یاسا بیدات، ڕایبگرن".
وەكوو ئەو ئەندامەی پێشووی پەرلەمانی كوردستان ئاماژەی پێ دەدات، "ڕاگرتنی پلەبەرزكردنەوە، وەكوو لێبڕینی بەردەوامە لە مووچە"، چونكە بەپێی بەدواداچوونی ئەو، "هەموو فەرمانبەران دوو تا سێ پلەیان لە لای حكومەتی هەرێمە و تا ئێستا بۆیان نەبەستراوە، كە هەر پلەیەك لەنێوان (30 تا 150) هەزار دینار دەخاتە سەر مووچە، بەپێی ئاست و پلەی فەرمانبەر".
"لە ساڵی 2016ـەوە، بەهۆی پێنەدانی دوو پلەوە، هەر فەرمانبەر و مامۆستایەك مانگانە نزیكەی (60 بۆ 300) هەزار دینار كەمتر لە مووچەكەی خۆی وەردەگرێت"، عومەر گوڵپی بۆ پەرەگراف وای وت.
لە ساڵانی ڕابردوودا مامۆستایان و فەرمانبەران دەیان خۆپیشاندانیان بۆ مووچە ئەنجام داوە و دەستپێكردنەوەی پلەبەرزكردنەوە یەكێك لە داواكارییە سەرەكییەكانیان بووە، بەڵام حكومەتی هەرێم وەڵامی ئەرێنیی نەداونەتەوە.
عومەر گوڵپی دەڵێت "ئێستا بەغدا سەرقاڵی هەمواركردنی خشتەكانی مووچە و خەرجییە لە یاسای بودجە بۆ ساڵی (٢٠٢٥)، بە بەشەبودجە و مووچەی هەرێمی كوردستانیشەوە، بۆیە ئەركی ئەو لیژنانەیە كە دەچنە بەغدا بۆ گفتوگۆی خشتەكانی مووچە، لیستی مووچە و پارەی پێویست بۆ مووچە بە پلەبەرزكردنەوەوە جێگیر بكەن و كۆتایی بەم ستەمە بهێنن كە 10 ساڵە لە مامۆستا و فەرمانبەر دەكرێت".