پەرەگراف
بەپێی ئامارەكانی بەشی وزە نوێبووەكانی بەڕێوەبەرایەتی کارەبای سلێمانی، لە سنوری ئەو پارێزگایە رۆژ لەدوای رۆژ هاوڵاتیان زیاتر روو لە دانانی سیستمی بەرهەمهێنانی كارەبا لە وزەی خۆر دەكەن و لە ماوەی شەش مانگی رابردوودا بەڕێژەی 100% زیادیكردوە.
بە پێی كۆتا ئامار تا ڕێکەوتی 4/8/2025 ژمارەی ئەو هاوبەشانەی كارەبا كە سیستمەكەیان داناوە و لە بەشی وزە نوێبووەكان تۆماركراوە، گەیشتوەتە (1033) هاوبەش و بڕی بەرههمهێنانی كارەبایان (23.370) مێگاوات بووە.
لە كاتێكدا تا ڕێکەوتی 19/2/2025 ژمارەی ئەو هاوبەشانەی كارەبا كە سیستمەكەیان دانابوو (510) هاوبەش بوون.
شێوازی بەرهەمهێنانی كارەبا لە وزەی خۆر "سیستمی سۆلار"، بریتییە لە كرداری گۆڕینی تیشكی خۆر بۆ وزەی كارەبا، ئەوەش بەچەند رێگایەكی زانستی كە لە ژمارەیەك ئامێر و كەرەستەدا كورتكراونەتەوە و كۆمپانیاكان بە ئاسانی بۆ هاوڵاتیانی دادەنێن.
بەپێی رێنماییەكی وەزارەتی كارەبا؛ ئەو کارەبایەی لە وزەی خۆر بەرهەمدەهێنرێت، ئەگەر هاوڵاتیان و كۆمپانیا و شوێنەكانی دیكە تێکەڵ بە کارەبای نیشتمانی بكەنەوە، ئەوا لە کۆتایی مانگەکەدا، بەقەت ئەو بڕە كارەبایەی داویەتی بە حكومەت، لە كرێی مانگانەی كارەبای نیشتمانی ماڵەكەی كەمدەكرێتەوە.
لەبارەی ئەو رێكار و رێنماییەی وەزارەتەوە، بۆ نمونە؛ ئەگەر هاوڵاتییەک مانگانە بڕی هەزار کیلۆوات کارەبای نیشتمانی بەکاربهێنێت و لە رێگەی وزەی خۆرەوە 300 کیلۆوات کارەبا بکاتە ناو تۆڕی کارەبای نیشتمانییەوە، ئەوا لە کۆتایی مانگەکەدا حكومەت تەنیا پارەی 700 کیلۆوات کارەبای لێوەدەگرێت.
هەڵكەوتەی جوگرافیای هەرێمی كوردستان ئاڕاستەیەكی لەبارە بۆ دانانی چەندین پڕۆژەی بەرهەمهێنانی كارەبا بە وزەی خۆر، درێژیی وەرزی هاوین و تەنانەت كەمیی رۆژەكانی هەور و بارانیش یارمەتیدەرە.
بەپێی قەبارەی بەرهەمهێنان لە سیستمەکە دوای دانان، تاوەکو نزیکەی شەش ساڵ هیچ تێچووییەکی دیکەی نییە و دواتر تەنیا باترییەکانی بە نیوەی تێچووی سەرەتا دەگۆڕدرێت، هەموو سیستمەكەش بەپێی ناوچە و شارەكانی عێراق تێچویان دەگۆڕدرێت و لە نێوان سێ تا نزیكەی شەش هەزار دۆلاردایە.
ڕووکردنە سیستمی سۆلار هاوکاتە لەگەڵ پڕۆژی ڕووناکی نۆ چارەسەری کێشەی کەمیی کارەباو کۆتاییهێنان بە مۆلیدەی گەڕەکەکان، پڕۆژەی ڕووناکی ئێستا کارەبای زیاتر لە 2,700,000 هاوڵاتیی هەرێمی کوردستانی کردووەتە 24 کاتژمێریی؛ ئەمەش نزیکەی %40ی سەرجەم هاوڵاتییانی هەرێمی کوردستانە.
لە هەرێمی كوردستان جگە لە هەردوو وێستگەی كارۆئاویی دوكان و دەربەندیخان، زیاتر سوود لە غاز، نەوتی رەش و گازوایل وەرگیراوە بۆ بەرهەمهێنانی كارەبا.
ئەوەش لەكاتێكدایە جیهان ئێستا روو لە وزەی خۆرە و نەتەوە یەكگرتووەكان بە بەردەوامی هانی بەكارهێنانی دەدات؛ كە بەپێی راپۆرتێكی سەنتەری لێکۆڵینەوەی ئەمریکی بۆ وزە، ئەو کارەبایەی لەڕێگەی وزەی خۆرەوە دەستدەكەوێت بەرێژەی لە سەدا 90 مرۆڤ و ژینگە لە زیانی گازەكان دەپارێزێت و ئەگەری قەتیسبوونی گەرمای زەوی کەمدەکاتەوە.