ئەمریكا هێزەكانی لە سووریا كەم دەكاتەوە، بەڵام گرەنتیی ڕووبەڕووبوونەوەی داعش دەكات
پەرەگراف
ئەمریكا لە پرۆسەی كەمكردنەوەی هێزەكانی لە سووریا بەردەوامە و بنكە سەربازییەكانی یەك دەخاتەوە. پێنتاگۆن سەرباری ڕێكخستنەوە و كەمكردنەوەی هێزەكانی، دڵنیایی دەدات كە هێزەكانی لە ئامادەباشیدا دەبن بۆ "وەڵامدانەوەی هەر هێرشێكی چەكدارانی داعش و ڕێگری لە سەرهەڵدانەوەی ئەو ڕێكخراوە".
بەپێی نوێترین ڕاپۆرتی وەرزیی ھاوپەیمانیی نێودەوڵەتیی دژی داعش بە سەركردایەتیی ئەمریكا، ویلایەتە یەكگرتووەكانی ئەمریكا دەستی كردووە بە جێبەجێكردنی كەمكردنەوەیەكی قۆناغبەندیی بوونی سەربازیی خۆی لە سووریا، كە بریتییە لە یەكخستنەوەی بنكەكان و ئامادەكاری بۆ كەمكردنەوەی ژمارەی سەربازانی بۆ خوار ١٠٠٠ سەرباز و كارمەند.
ھاوپەیمانیی نێودەوڵەتیی دژی داعش بە سەركردایەتیی ئەمریكا، تەواوبوونی قۆناغی یەكەمی یەكخستنەوەی پشتڕاست كردەوە، كە بەهۆیەوە هێزەكانی ئەمریكا و هاوپەیمانان لە مانگی ئایاردا لە سێ بنكەی دۆڵی ناوەڕاستی ڕووباری فورات كشانەوە.
ئەو بنكانەی هێزەكانی ئەمریكا لێی كشاونەتەوە، بریتین لە (پێگەی پشتیوانیی ئەركی فورات، پێگەی پشتیوانیی ئەركی گوندی سەوز، بنكەی H2). هێزەكان گواستراونەتەوە بۆ بنكەكانی دیكە لە سووریا و عێراق، یان دوای تەواوبوونی ماوەی ئەركەكانیان، گەڕاونەتەوە بۆ وڵاتی خۆیان. هەروەها بنكەكانیش ڕادەستی هێزەكانی سووریای دیموكرات (هەسەدە) كراونەتەوە.
سەرەڕای كەمكردنەوەی هێزەكان، نووسینگەی بریكاری وەزیری بەرگریی ئەمریكا بۆ كاروباری سیاسەت، جەختی لەوە كردووەتەوە كە "هێزەكانی ئەمریكا لە ئامادەباشیدا دەمێننەوە بۆ ئەنجامدانی هێرش دژی پاشماوەكانی داعش لە سووریا".
وەزارەتی بەرگریی ئەمریكا دڵنیایی دەدات كە "ویلایەتە یەكگرتووەكان بەردەوام دەبێت لە پشتیوانیكردنی هێزە هاوبەشەكان، بە مەبەستی هێشتنەوەی فشار لەسەر چەكدارانی داعش و ڕێگریكردن لە سەرهەڵدانەوەی ئەو ڕێكخراوە".