پەرەگراف
محەمەد شیاع سوودانی لە كۆبوونەوەی ئەمڕۆی ئەنجومەنی وەزیرانی عێراقدا هەفتەیەكی دیكە مۆڵەتی دایە هەرێمی كوردستان بۆ ڕادەستكردنی نەوتی بەردەست. لە كۆبوونەوەكەدا هیچ بڕیارێك لەسەر ناردنی مووچە نەدراوە و بەستراوەتەوە بە جێبەجێكردنی ڕێككەوتنی نێوان هەردوولا بەتایبەت ڕادەستكردنی نەوت.
باسكردن لە دۆسیەی هەرێمی كوردستان و ڕێككەوتنەكە هاوبەشەكە، لە كۆتایی كۆبوونەوەكەی ئەنجومەنی وەزیرانی عێراقدا بووە، كە تێیدا وەزیری نەوت ڕاپۆرتێكی دەربارەی بڕی نەوتی بەردەستی هەرێم و كاریگەریی هێرشە درۆنییەكان خستووەتە ڕوو.
محەمەد شیاع سوودانی، سەرۆركوەزیرانی عێراق، بڕیاری داوە تا سێشەممەی داهاتوو مۆڵەت بە هەرێم بدرێت بۆ جێبەجێكردنی ڕێككەوتنی هاوبەشی نێوان هەردوولا، بەتایبەت ڕادەستكردن و هەناردەكردنەوەی نەوت، هەروەها لیژنە هاوبەشەكانیش تایبەت بە هەموو دۆسیەكان لەوانە نەوت، بڕی داهاتی نانەوتی و تەوتین كارەكانی خۆیان ئەنجام بدەن و ڕاپۆرت بەرز بكەنەوە.
لە كۆبوونەوەكەدا هیچ وادەیەك بۆ ناردنی مووچەی مووچەخۆرانی هەرێم دیاری نەكراوە، بەڵكو هەفتەی داهاتوو كە بەرچاوڕوونی دەربارەی جێبەجێكردنی ڕێككەوتنەكە و بەتایبەت ڕادەستكردنی نەوت هەبوو، بڕیاری ناردنی مووچەی مانگی شەش و دواتریش حەوت دەدرێت.