بانكی ڕافیدەینی عێراقی لە واشنتن گرێبەستێكی بۆ "بەرەنگاربوونەوەی سپیكردنەوەی پارە و پارەداركردنی تیرۆر" واژوو كرد
پەرەگراف
بانكی ڕافیدەینی عێراقی لە واشنتن گرێبەست و ڕێككەوتنێكی بۆ "بەرەنگاربوونەوەی سپیكردنەوەی پارە و پارەداركردنی تیرۆر" لەگەڵ كۆمپانیایەكی بەناوبانگی ئەمریكی واژوو كرد. بانكەكە ئەم گرێبەستە بە "دەستكەوتێكی جۆریی بانكی" وەسف دەكات و دەڵێت "ئەمە متمانەی كۆمەڵگەی نێودەوڵەتی بە چاكسازییە داراییەكانی عێراق نیشان دەدات".
ئەم گرسێبەستەی بانكی ڕافیدەین لە كاتێكدایە هەر ئەمڕۆ كۆنگرێسمانێكی ئەمریكی بانكەكەی بە "پارەداركردنی تیرۆر" تۆمەتبار كرد و وتی "بانكی ڕافیدەین مامەڵە لەگەڵ حوسییەكانی یەمەندا دەكات".
بانكی ڕافیدەین گرێبەستەكەی لەگەڵ كۆمپانیای كەی توو ئینتیگریتی (K2 Integrity)ـی ئەمریكی ئەنجام داوە كە لە بوارەكانی ڕاوێژكاریی دارایی و چاودێریدا كار دەكات. بانكی ڕافیدەین، كۆمپانیاكە بە "پێشەنگ لەسەر ئاستی جیهان" ناو دەبات.
گرێبەستەكە لە بارەگای باڵیۆزخانەی عێراق لە واشنتنی پایتەختی ئەمریكا واژوو كرا.
بانكی ڕافیدەین دەڵێت "كۆمپانیای (كەی توو ئینتیگریتی) پاكێجێكی خزمەتگوزاریی ڕاوێژكاری و تەكنیكی و گەشەپێدانی ئاستبەرز پێشكەش دەكات، كە ئامادەكردنی ڕاپۆرتی بەپێی بەرزترین ستانداردە نێودەوڵەتییەكان لە هەردوو بواری بەرەنگاربوونەوەی سپیكردنەوەی پارە و پاڵپشتیی دارایی تیرۆر، هەروەها جێبەجێكردنی سیستەمەكانی پابەندبوون كە لە بانك و دامەزراوە داراییە گەورەكانی جیهاندا پەیڕەو دەكرێن، لەخۆ دەگرێت".
د. كەریم عەلی فەتلاوی، بەڕێوەبەری گشتی و سەرۆكی ئەنجومەنی كارگێڕیی بانكی ڕافیدەین، جەخت دەكاتەوە كە "ئەم هاوبەشییە، بازدانێكی جۆرییە لە ڕێڕەوی چاكسازیی بانكیدا". دەشڵێت "ئەم ڕێككەوتننامەیە بەشداریی دەكات لە بەهێزكردنی متمانە بە بانكە عێراقییەكان و كردنەوەی ئاسۆی فراوانتر بۆ هاریكاری لەگەڵ ئەو بانكانەی كاری حەواڵە دەكەن لە سەرانسەری جیهاندا".
هەر ئەمڕۆ 15-08-2025 و چەند كاتژمێرێك بەر لە گرێبەستەكە، جۆو ویڵسن، كۆنگرێسمانی ئەمریكی، لە تۆڕی كۆمەڵایەتیی ئێكس دەڵێت "بانكی ڕافیدەین كە سەر بە دەوڵەتی عێراقە، مامەڵەی دارایی لەگەڵ حوسییەكانی یەمەن ئەنجام دەدات". دەشڵێت "ئێمە ناوێكمان بۆ ئەم وڵاتانە هەیە، ئەویش سپۆنسەری تیرۆرە".
جۆو ویڵسن ڕایگەیاند، لە كاتی ئامادەكردنی بودجەی ئەمریكا، كار بۆ بڕینی پارەداركردنی عێراق دەكەن، داواش لە گەنجینەی ئەمریكا دەكەن سزای بانكی ڕافیدەین بدات.