پەرەگراف
دەستەی سەربەخۆی مافی مرۆڤ ڕاگەیەندراوێكی دەربارەی بێسەروشوێنانی ڕووداوەكەی لالەزار بڵاو كردەوە و باس لە بوونی "بێسەروشوێن" لە لای دژەتیرۆر و كۆماندۆ دەكات. هەروەها گومانی "ئەشكەنجەدان" لە كاتی وەرگرتنی دانپێدانان دەوروژێنێت و كوژرانی ژمارەیەك كەسی دیكەش ئاشكرا دەكات.
بەپێی ڕاگەیەندراوەكەی دەستەی مافی مرۆڤ، "كەسانێك"ـی دیكە لە ڕووداوەكەی لالەزاردا كوژراون، بەڵام دەزگا ئەمنییەكانی سلێمانی ئامادە نین زانیاری لەسەر ئەو كەسانە بدەن. ئەمە جگە لە نیگەرانیی دەستەكە لەسەر ڕێگرییەكانی دژەتیرۆر و كۆماندۆ بۆ بینینی ئەو تۆمەتبارانەی لالەزار كە لای ئەوان دەستبەسەرن.
دەستەی سەربەخۆی مافی مرۆڤ داوای پێكهێنانی "لیژنەیەكی باڵا بۆ لێكۆڵینەوە و بەدواداچوون و ڕاستی و دروستی"ـی كەیسی ئوتێل لالەزار دەكات و ڕایشیدەگەیەنێت كە "ڕاپۆرتێكی وردمان لەسەر ئەم كەیسە نووسیوە و لە ماوەیەكی نزیكدا بۆ چوار سەرۆكایەتییەكەی هەرێمی كوردستانی دەنێرین".
پەیامێك لە دەستەی سەربەخۆی مافی مرۆڤ سەبارەت بە هەندێك بابەتی پەیوەست بە ڕووداوی شەڕەكەی لالەزار لە سلێمانی و كەیسی ئارام قادر:
بۆ/ سەرۆكایەتی هەرێم، سەرۆكایەتی حكومەت، سەرۆكایەتی پەرلەمان، سەرۆكایەتی ئەنجوومەنی دادوەری، نوێنەرایەتی نەتەوە یەكگرتووەكان و كونسوڵخانە و نوێنەرانی وڵاتان لەهەرێمی كوردستان
هەموو لایەك ئاگادارن كە نزیكەی پازدە ڕۆژ بەسەر ڕووداوی شەڕەكەی لالەزار لە شاری سلێمانی تێدەپەڕێت و دەستەی مافی مرۆڤ بەردەوامە لە چاودێری كردنی پێشهاتەكان و سۆراغكردنی هەموو ئەو كەسانەی كە كەس و كاریان زانیاریان لە بارەوەیان نییە و بێ سەر و شوێنن.
پاش ماوەیەك لە چاوەڕوانی بۆ زانینی سۆراغی ئەو كەسانەی تا ئێستا هیچ هەواڵێكیان لە بارەوە نازانرێت.
دەزگای ئاسایش/ سلێمانی لەڕێگەی ڕاوێژكارێكی دەستەی سەربەخۆی مافی مرۆڤەوە بە ئێمەی ڕاگەیاند دواین لیستی ناوی بێ سەر و شوێنان كە نێر دراوە بۆ دەزگای ئاسایش، لەلای ئێمە نین تەنها ئەو ئامارەی جاری پێشوو تر كە بە دەستەمان دابوو لەلای ئاسایشی سلێمانین.
بەپێی زانیاری و بەدواداچوونی ئێمە ئەو كەسانەی نادیارن بەشێكیان لەدژە تیرۆر یان كوماندۆی سلێمانین، ئەو ڕێگا نەدان و زانیاری پێ نەدانە بە كەس و كاریان وە بەدەستەی مافی مرۆڤ گومان هەڵدەگرێت و ئەوەمان پێ دەڵێت ئەو كەسانە ئەشكەنجە درابن و توندوتیژی لەگەڵ یان بەكار هاتبێت لە كاتی دان پێدان بۆیە نایانەوێت كەس بیان بینت.
پێویستە هەموو لایك بزانن ماوەی هەفتەیەكە دەستەی مافی مرۆڤ لەڕێگەی ڕاوێژكارێكی دەستە داوای كردووە كە تیمێكی دەستە بە سەرۆكایەتی سەرۆكی دەستە د. مونا سەردانی بەشێك لەو ڕاگیراوانە بكات لەناویاندا لاهوری شیخ جەنگی، بەڵام دەزگاكانی ئەمنی سلێمانی ڕەتیان كردووە بە بیانووی ئەوەی كە تیمی دەستە پێشتر هاتووە پێویست ناكات دووبارە بێن لە كاتێكدا بۆ هیچ كەس و لایەنێك نییە سەردان و بەدواداچوون بۆ كەیسەكانی مافی مرۆڤ سنووردار بكات، ڕاستە پێشتر تیمێكی دەستە سەردانی بەشێك لە ڕاگیراوانی ئەم كەیسە كردبوو، بەڵام ڕێژەی ڕاگیراوان زۆرە و پێویستە چەند جارێكی تر تیمی دەستە سەردانیان بكات تاوەكوو لەنزیكە وە هەموویان بیبینێت.
بەپێی زانیارییەكانی دەستە و سكاڵای بەرەی گەل تا ئێستاش ڕۆژانە ئەندامانی ئەو حیزبە لە سلێمانی و ناوچەكانی تری ئەو سنوورە دەستگیر دەكرێن و هەڕەشەش لە هەندێك كەسی تری نزیك لە لاهور شێخ جەنگی دەكرێت.
هەروەها بەپێی بەدواداچوون و زانیارییەكانی دەستە كەسانێك لە ڕووداوی لالەزار كوژراون، بەڵام دەزگا ئەمنییەكان ئامادە نین زانیاری بدەن و بڵاو بكەنەوە ئەوەش دیسان گومان دەخاتە سەر شێوازی كوشتنیان.
بابەتێكی تری پەیوەست بە ڕووداوەكانی لالەزار هێزە ئەمنییەكان تا ئێستا بەردەوامن لەدەست بەسەر داگرتنی موڵك و ماڵی لاهور شێخ جەنگی و ئەو بابەتانەی پەیوەستن بە ناوبراو، تەنانەت بە كەناڵی تەلەڤزیۆنی زوومی شەوە، هەمووی بە هەڕەمەكی كراوە و ئێستاش دەكرێت و لێرەوە داوا دەكەین ئەو كارە ڕابگیرێت و سەرۆكایەتی داواكاری گشتی ڕۆڵی خۆی بگێڕیت لەو بابەتە.
لێرەوە داوا دەكەین دژەتیرۆر و هێزی كۆماندۆ /سلێمانی هەرچی زووە ڕێگە بە دەستەی مافی مرۆڤ بدەن بەدواداچوون بۆ تەواوی ئەو كەیسانە بكەن و ڕێگەش بە كەس و كاری ئەوانە بدەن كە تا ئێستا سەردانیان نەكردوون وە پێویستە زانیاریش لەسەر ئەوانە ڕابگەیەنرێت كە تا ئێستا هەواڵیان نییە.
دەمانەوێت ئەوەش بۆ ڕای گشتی ڕابگەینین دەستەی سەربەخۆی مافی مرۆڤ داوای بینینی ئارام قادر سەرۆكی پێشووی حیزبی هاوپەیمانی كردبوو دەزگا ئەمنییەكانی سلێمانی ڕێگەیان نەداوە و تا ئێستا هیچ زانیارییەكیش لەسەر ژیان و تەندروستی ناوبراو و شوێن و جێگەی بە ئێمە و كەسوكاریان نەداوە.
دووپاتی ئەوە دەكەینەوە دەستەی مافی مرۆڤ لەگەڵ چەسپاندنی یاسای یە بەپێی ڕێكارە ڕێگە پێدراوەكان پشتگیری سەروەری یاسا دەكەین و دژی هەر جۆرە پێشێلكاری و كارێكی هەڕەمەكین و جەختیش لەسەر ڕۆڵی دەستەی مافی مرۆڤ دەكەینەوە كە پێویستە هەرچی زووە كار ئاسانی بۆ سەرۆك و تیمەكانمان بكرێت بۆ بەدواداچوون بۆ هەر كەیسێك لە هەر كوێ و لای هەر دەزگایەك بێت ئەوەش لە چوارچێوەی كار و ئەرك و دەسەڵاتی دەستەیە كە پەرلەمانی كوردستان بۆی دیاری كردووە وەك دەزگایەكی نیشتمانی سەربەخۆ.
لێرەدا بە هەموو خەڵكی كوردستان ڕادەگەیەنین كە ڕاپۆرتێكی وردمان نووسیوەلەسەر ئەم كەیسە لە ماوەیەكی نزیكدا بۆ چوار سەرۆكایەتی لە هەرێمی كوردستان/ سەرۆكایەتی هەرێم، سەرۆكایەتی حكومەت، سەرۆكایەتی پەرلەمان، سەرۆكایەتی ئەنجوومەنی دادوەری لە هەرێمی كوردستان دەنێرین.
لە كۆتایدا داوا دەكەین كە لیژنەیەكی باڵا پێك بهێنرێت بۆ لێكۆڵینەوەو بەدواداچوون و ڕاستی و دروستی ئەم كەیسە، لە دەرەنجامەكانی خەڵكی كوردستان ئاگادار بكرێنەوە.
دەستەی سەربەخۆی مافی مرۆڤ لە هەرێمی كوردستان