پەرەگراف
دادگای هەولێر پێنج كەس لە دەستگیركراوانی هەولێرو بادینانی یەكی بە شەش ساڵ زیندانیكردن سزا دا. تۆمەتباران لەبەردەم دادوەردا سكاڵایان كردووە لەوەی كە "لەژێر هەڕەشە"دا وتەیان لێ وەرگیراوە و شێروان شێروانی وتوویەتی كە "هەڕەشەی خێزانی"یان لێ كردووە. سزاكە پلەی كۆتایی وەرنەگرتووە و تانەی لێ دەدرێت.
هەرێم ڕەفعەت، پارێزەری هەریەك لە شێروان شێروانی و گۆهدار محەمەد، بە پەرەگرافی ڕاگەیاند "تۆمەتباران لەبەردەم دادوەردا هەموو باسی ئەوەیان كرد كە لەژێر هەڕەشەدا وتەیان لێ وەرگیراوە".
ئەو پارێزەرە كە بەشداریی پرۆسەی دادگاییكردنەكەی كردووە، وتیشی "شێروان شێروانی وتی هەڕەشەی خێزانییان لێ كردووم. تۆمەتباران لە دادوەرەكەیان پرسی: ئەگەر هەڕەشەی خێزانی لە تۆ بكەن، چی دەكەی؟".
سەرباری ئەوە، هەریەك لە (شێروان شێروانی، ئەیاز كەرەم، گۆهدار محەمەد، هاریوان عیسا و شڤان سەعید) یەكی شەش ساڵ زیندانیكردنیان بەسەردا سەپێندراوە، بەڵام بڕیارەكە قابیلی تانەلێدانە.
سزاكە بەپێی یاسای 23ی ساڵی 2003 بەسەر ئەو كەسانەدا سەپێندراوە و پارێزەرەكە دەڵێت "نایاساییە و ئێمە تانەی لێ دەدەین".
"ئەسڵەن نەدەبوو ئەو سزایە دەربچێت، چونكە ئەوان باس لە گرووپچاتی مەسنجەر دەكەن كە چەند ڕۆژنامەنووسێك لە بەینی خۆیاندا گرووپێكی چاتیان داناوە و وەكو ژوورێكی هەواڵ كاریان تێدا كردووە، بەڵام چونكە ئەوان لێی نازانن، وادەزانن ئەوە گرووپی چەكدارییە"، هەرێم ڕەفعەت وای وت.
ناوبراو وتیشی "بە وتەی تۆمەتباران، ئەو شتانە هی ئەوان نین. ئەگەر هی ئەوانیش بێت، دەبێت بە ماددەی دووی خراپبەكارهێنانی مۆبایل سزا بدرێن".
ئەو پارێزەرە بۆ پەرەگراف جەختی كردەوە كە "پرۆسەی دادگاییكردنەكە زۆر ناسروشتی بوو" و "ڕۆڵی ئەندامانی داواكاری گشتی زۆر خراپ بوو".
هەر لە دوای دادگیاییكردنەكە، بەشدار حەسەن، یەكێك لە پارێزەرانی دۆسیەی دەستگیركراوان، لە كۆنگرەیەكی ڕۆژنامەوانیدا وتی "دەمەوێت بۆ ڕایگشتی ڕوون بكەمەوە كە وتارەكەی سەرۆكی حكوومەت سەلمێنەری ئەوە بوو كە ئەمانە دادگایی دەكرێن و بڕیارەكە پێشوەختە دراوە".
مەسروور بارزانی، سەرۆكی حكوومەتی هەرێم، هەفتەی ڕابردوو سەبارەت بە دەستگیركردنی چالاكان و ڕۆژنامەنووسان ڕایگەیاند "ئەوانەی كە گیراون لە بنەمادا نە چالاكوانن نە ڕۆژنامەنووس، هەندێك لەوانە سیخوڕ بوون و سیخوڕییان بۆ وڵاتانی دیكە كردووە، هەندێكیشیان تێكدەر و چەكدار بوون هەوڵی تەقاندنەوەی باڵەخانە و پێگەی خەڵكی بیانی لێرە و كوشتن و ڕفاندن و تێكدانی دۆخەكەیان داوە".
ئەو وتانەی سەرۆكوەزیران، ناڕەزایی فراوانی لێكەوتەوەو بە "دەستتێوەردان" لە كاروباری دادوەریی و حوكمدانی پێشوەختە لە قەڵەم درا بەر لەوەی دادگا دۆسیەكان یەكلایی بكاتەوە.
سزادانی ئەو كەسانە پارێزەرانی دۆسیەكەی "تووشی شۆك" كردووە و دەڵێن كە "كەسوكاریان و هەموو زیندانیكراوان دڵنیا دەكەینەوە بێدەنگ نابین".
بەشدار حەسەن، پرۆسەی دادگاییكردنەكەی ئەمڕۆی بە "زۆر جیاواز لەوەی دوێنێ" ناو برد وتی "پێدەچوو تەئسیراتی جانیبیی زۆر لەسەر دادگا هەبێت. بڕیارەكان بە زۆرینە دران، كەواتە بەشێك لە دادوەرەكان لەگەڵیدا نەبوون".
داواكاریی دووبارە وەرگرتنەوەی وتەی تۆمەتبارەكانیش بە ئامادەیی پارێزەرەكانیان، لەلایەن دادگاوە بە زۆرینەی دەنگ ڕەت كراوەتەوە.
هەروەها بەشدار حەسەن دەڵێت "تووشی سەرسوڕمان بووین لەو تۆمەتانەی كە داواكاری گشتی ئاراستەی تۆمەتبارانی دەكرد".
لەگەڵ ئەوەشدا ئەو پارێزەرە جەختی كردەوە كە "ئەو شێوازانەی بەڵگەی پێ دەسەلمێندرێت، بوونی دانپێدانانە، یان دوو شاهێد كە بە چاوی خۆیان بینیبێتیان، یان دەبێت تاوان ڕووی دابێت، كە هیچیان بوونی نەبووە"، هەربۆیە ئەو وەك پارێزەرێك هیوای بە دادگای پێداچوونەوە هەبوو.
عەلی حەمەساڵح، ئەندامی پەرلەمانی كوردستان، كە بەشداریی پڕۆسەی دادگاییكردنەكەی كردبوو، وتی "ئەوەی ئەمڕۆ بینیمان ناعەدالەتییەكی گەورە بوو. نە پلان هەبووە، نە جێبەجێكردن، نە بەڵگە هەبووە كە كەسێك بكوژرێ، نە چەكدارێك گیراوە، ئەوەی هەبووە تەنیا یەك گرووپی مێسنجەرە كە زانیاریی ڕۆژنامەوانی و چاودێریی مافی مرۆڤی تێدا ئاڵوگۆڕ كراوە".
"یەكێكیان سزا دا بە شەش ساڵ زیندانی، تەنیا لەبەرئەوەی كە زانیاریی لەسەر بوونی حەقلێكی نەوتیی نایاسایی بە ڕۆژنامەنووسێك داوە. یەكێكیان هەر لە گرووپی مێسنجەرەكەشدا نەبووە، تەنیا ڕەسمێكی ناردووە بۆ یەكێكی تر، لە كاتێكدا ئەو كەسە خۆی هەزار ڕەسمی لە فەیسبووك هەیە"، عەلی حەمەساڵح وای وت.
سزاكە بەپێی یاسای یەكی ساڵی 2003 بەسەر ئەو كەسانەدا سەپێندراوە و پارێزەرەكە دەڵێت "نایاساییە و ئێمە تانەی لێ دەدەین".
هەڵمەتی دەستگیركردنی ڕۆژنامەنووس و چالاكوانانی بادینان، لە مانگی ئابی 2020ـەوە دەستیپێكرد، ئەوەش دوای خۆپیشاندانێكی ناڕەزایی، كە لە زاخۆوە سەریهەڵدا و هەرزوو گۆڕا بۆ بارگرژی و بەهۆی تەقەكردن و پێكداهەڵپژانەوە، چەندین كەس لە مەدەنی و پۆلیس برینداربوون.
ئەو خۆپیشاندانە هاوكات بوو لەگەڵ خراپیی گوزەرانی خەڵك و كێشە داراییەكانی حكومەتی هەرێمی كوردستان، لە نێویاندا دواكەوتن و لێبڕینی مووچە.
"هێزێكی چەكداری دەمامكدار، بێ خۆ ناساندن، بە زۆر كوڕەكەیان ِراپێچكردم و ڕفاندیان، بە ئێستاشەوە هەر نەمزانی كام هێز و بۆچی كوڕەكەیان بردم، یان نازانم لە چ زیندانێك و لە كوێیە" محەمەد ئەمین، باوكی گوهدار زێباری پێشتر بۆ پەرەگراف وای وت، ئەو لێدوانەی دوای چەند هەفتەیەك بوو لە دەستگیركردنی كوڕەكەی.
چەندین مانگ دوای دەستگیر كردنیان، كەسوكار و پارێزەرو هاوڕێیانیان، بە پەرلەمانتارانی كوردستانیشەوە تەنها بەدوای وەڵامی ئەو پرسیارەوە بوون؛ بۆچی دەستگیركراون و بەڵگەكانی تۆمەتباركردنیان چین؟، بەڵام وەڵام دەست نەكەوت.
هاوكات ژمارەی یاسایی پەرلەمانتارانی كوردستان، لە نوسراوێكدا داوایان لە سەرۆكایەتی پەرلەمان كرد دەستگیركردنی ڕۆژنامەنووس‌و چالاكانی مەدەنی لە هەولێرو دهۆك بخرێتە بەرنامەی كاری دانیشتنێكی پەرلەمانەوەو وەزیری ناوخۆ بانگهێشت بكرێت، بەڵام ئەوەش گوێی لێ نەگیرا.