لیژنەی ئەمنیی پارێزگای هەولێر 17 بڕیار و ڕاسپاردەی تایبەت بە دەستپێكردنی بانگەشەی هەڵبژاردن دەركرد
پەرەگراف
لیژنەی ئەمنیی پارێزگای هەولێر 17 بڕیار و ڕاسپاردەی تایبەت بە دەستپێكردنی بانگەشەی هەڵبژاردن دەركرد. جگە لە دیاریكردنی قەدەغەكراوەكانی بانگەشە، ڕایشیدەگەیەنێت كە بۆ ئەنجامدانی گردبوونەوەی جەماوەری بۆ بانگەشە، دەبێت ڕەزامەندی لە لیژنەی ئەمنی وەربگیرێت.
لیژنەی ئەمنیی پارێزگای هەولێر پاش كۆبوونەوەی ئەمڕۆی بە سەرپەرشتیی ئومێد خۆشناو، پارێزگاری هەولێر دەڵێت، ئەو بڕیار و ڕاسپاردانەی "لەپێناو بەڕێوەچوونی پڕۆسەی هەڵبژاردنی پەرلەمانی عێراق بە شێوازێكی شارستانی و سەردەمییانە و بەرگریكردن لە ناو و ناوبانگی پایتەختی هەرێمی كوردستان" دەركردووە.
دەقی ڕاگەیەندراوی لیژنەی ئەمنیی پارێزگای هەولێر:
ئەمڕۆ پێنجشەممە 2025.10.2، لیژنەی ئەمنی پارێزگا، بە سەرپەرشتی ئومێد خۆشناو، پارێزگاری هەولێر، لە پێناو بەڕێوەچوونی پڕۆسەی هەڵبژاردنی پەرلەمانی عێراق بە شێوازێكی شارستانی و سەردەمیانە لە سنووری پارێزگای هەولێر و بەرگریكردن لە ناو و ناوبانگی پایتەختی هەرێمی كوردستان، كە هەمیشە لە هەموو ڕووێكەوە پێشەنگ بووە، هەروەها بە ئامانجی فەراهەمكردن و دەستەبەركردنی ئازادی بۆ هەموو لایەنە سیاسیەكان بەبێ جیاوازی و پارێزگاریكردن لە كاندیدان و پاراستنی ئارامی و پاك ڕاگرتنی شار و بەڕێوەچوونی ماوەی دیاریكراوی بانگەشەی هەڵبژاردن بە سەركەوتوویی، كۆبۆوە، و كۆبوونەوە گەیشتە ئەو بڕیار و ڕاسپاردانەی خوارەوە:-
یەكەم/ بە هیچ شێوەیەك نابێت بانگەشەی هەڵبژاردن بە كاروانی زۆری ئۆتۆمبێل لە شەقامە گشتییەكان بكرێت، كە ببێتە هۆی دروستكردنی ئاستەنگ لە ڕێگای هاتووچۆی خەڵك، هەروەها نابێت ئامێری بێزاركەر بەكاربهێنرێت، كە ببێتە هۆی ناڕەحەتی هاوڵاتییان.
دووەم/ نابێت وێنە و پۆستەر و دروشمی كاندیدان لەو شوێنانەی كە ڕێگە دراوە، بە مادەیی لێكدەر وەك ( لەزگە یان غەرە ) لێبدرێت، بەڵكو دەبێت هەڵبواسرێت، یان لەسەر ستاند لە شوێنیك دابنرێت كە ڕێگا نەگرێت، هەروەها بەكارهێنانی ( قوم، لم ، چیمەنتۆ ) بۆ ڕاگرتنی دروشم و پۆستەر و وێنەكان بە هەموو شێوەیەك قەدەغەیە.
سێیەم/ نابێت لە چوار ڕێییان و ترافیك لایتەكان وێنە و پۆستەر و دروشمی كاندیدان لێبدرێت.
چوارەم/ نابێت وێنە و پۆستەری كاندیدان لە فەرمانگە حكومیەكان، نەخۆشخانە، قوتابخانەكان، هتد .. لێبدرێت.
پێنجەم/ نابێت پۆستەر و دروشمەكانی تایبەت بە بانگەشەی هەڵبژاردن لەسەر دیوار و شوێنە گشتییەكان وەك (مزگەوت، كلێساكان، شوێنە پیرۆزە ئاینیەكان و شوێنە كەلتووری و مێژووییەكان) هەڵبواسرێت.
شەشەم/ پارك و باخچە گشتییەكان نابێت بۆ بانگەشەی هەڵبژاردن بەكاربهێنرێت.
حەوتەم/ ڕێگە پێدروا نییە وێنە و تابلۆی بانگەشەی هەڵبژاردن لە (قەدی دارەكان، دورگەی ناوەندیی شەقامەكان) دابنرێت و وێنە و دروشمی كاندیدان لە داری باخچە و پاركەكان بدرێت.
هەشتەم/ نابێت لەكاتی بانگەشەی هەڵبژاردن ئۆتۆمبێلی ( میری ) حكومی بەكاربهێنرێت.
نۆیەم/ ڕێگە پێدار و نییە ڕستەی ئاڵای لایەنە سیاسیەكان بەستوونی ڕۆناككەرەوەی شەقامەكان و هێماكانی هاتووچۆ لە ناوشار و دەرەوەی شار و بەردەم كامێراكانی چاودێری هەڵبواسرێت.
دەیەم/ لە هەرە حاڵەتێكی سەرپێچی پاش دیكۆمێنتكردن، بە هەماهەنگی لەگەڵ كۆمسیۆنی هەڵبژاردن پێبژاردن بۆ كاندیدان و لایەنەكان دەكرێت.
یازدەیەم/ لە ڕۆژی هەڵبژاردن ژووری عەمەلیات لە پارێزگای هەولێر، بە بەشداری نوێنەری سەرجەم لایەنە سیاسیەكان دەبێت، لە دەستپێكردنی پڕۆسەی دەنگدان تا كۆتایی هاتنی پڕۆسەكە، هەر سەرپێچیەك لە بنكەكانی هەڵبژاردن ئەنجامبدرێت ئاگاداری ژووری عەمەلیاتی پارێزگای هەولێر دەكرێتەوە، پاشان لەگەڵ لایەنی پەیوەندیدار چارەسەر دەكرێت.
دوازدەیەم/ بۆ ئەنجامدانی هەر گردبوونەوەیەكی جەماوەری بە مەبەستی بانگەشەی هەڵبژرادن لەشوێنی گشتیی، لە پێناو پاراستنی ئاسایشی شارەكەمان و گربوونەوەكە، دەبێت ڕەزامەندی لیژنەی ئەمنی پارێزگای هەولێر وەربگیرێت.
سێزدەیەم/ هەر بەربژێرێك پابەند نەبێت بە ڕێنماییەكان، پۆستەر و بانگهێشتەكەی لەلایەن تیمەكانی شارەوانی لادەدرێت و كاردانەوەی یاسایی لەگەڵ دەكرێت.
چواردەیەم/ هەر كەس و لایەنێك بۆ بانگەشەی هەڵبژاردن چەك ببەخشێتەوە، بەپێی یاسای چەك مامەڵەی لەگەڵ دەكرێت و ڕووبەڕووی ڕێكاری یاسایی دەبێتەوە.
پازدەهەم/ بە هەموو شێوەیەك بانگەشەی هەڵبژاردن ( بەجلی سەربازی، ئۆتۆمبیلی سەربازی ) قەدەغەیە، و هەركەس و لایەنێك پابەند نەبێت، ڕووبەڕووی ڕێكاری یاسایی دەبێتەوە.
شازدەهەم/ پارێزگاریكردن لە وێنەی كاندیدانی ئافرەت و پاراستنیان لەكاتی بانگەشە، ئەركی هەوموولایەكە، هەركەس و لایەنێك بێڕیزی بە وێنەكانیان و شێواندنیان بكات، ڕووبەڕووی ڕێكاری یاسایی دەبێتەوە.
حەڤدەهەم/ دوای تەوابوونی پڕۆسەی بانگەشەی هەڵبژاردن، كاندیدان بەرپرسن لە كۆكردنەوەی پۆستەر و وێنەكانیان، بە پێچەوانەوە بەپێ بژاردن سزادەدرێن.
لیژنەی ئەمنی پارێزگای هەولێر
2025.10.2