پەرەگراف
وەزیری نەوتی عێراق ڕایگەیاند، تا ئێستا زیاتر لە یەك میلۆن بەرمیل نەوتی هەرێمی كوردستان لەلایەن كۆمپانیای سۆمۆوە وەرگیراوە، كەشتییەك نەوتیش بار كراوە و ڕەوانەی ئەو شوێنە دەكرێت كە گرێبەستی فرۆشتنی نەوتەكەی لەگەڵ كراوە.
ئەو بڕە نەوتەی كە وەزیری نەوتی عێراق ئاماژەی پێ دەكات، لە ماوەی یەك هەفتەدا لە دوای دەستپێكردنەوەی پرۆسەی هەناردەكردنەوەی نەوتی هەرێمی كوردستان ڕادەست كراوە. هەرچەندە هێشتا بە تەواوی ڕوون نییە كە ڕۆژانە چەند هەزار بەرمیل نەوت ڕادەست دەكرێت، بەڵام بەپێی لێدوانەكە، دەكاتە دەوروبەری 150 هەزار بەرمیل، لەكاتێكدا بەپێی ڕێككەوتن دەبێت لە سەرتاوە ڕۆژانە بەلای كەمەوە 230 هەزار بەرمیل ڕادەست بكرێت.
ئەمڕۆ شەممە 04-10-2025، حەیان عەبدولغەنی، وەزیری نەوتی عێراق، بە ئاژانسی هەواڵی عێراقی ڕایگەیاند، بەر لە چەند ڕۆژێك پرۆسەی پەمپكردنی نەوتی هەرێمی كوردستان بەمەبەستی هەناردەكردنەوەی بۆ بەندەری جەیهانی توركیا لە ڕێگەی بۆرییەوە، دوای زیاتر لە دوو ساڵ لە ڕاگیرانی بە ئەنجام گەیشتووە و بۆ یەكەمجار حكومەتی فیدراڵی نەوتی بەرهەمهێنراوی هەرێمی كوردستانی وەرگرتووە و پرۆسەی هەناردەكردنی بۆ دەرەوەی عێراق لە ئەستۆ گرتووە.
سەبارەت بە بڕی ئەو نەوتی كە تا بەیانیی ئەمڕۆ ڕادەست كراوە، وەزیری نەوتی عێراق بە "زیاتر لە یەك ملیۆن بەرمیل" ناوی بردووە و لەو بڕەش یەك كەشتی نەوت بار كراوە كە توانای هەڵگرتنی 650 هەزار بەرمیلی هەیە، نەوتهەڵگرەكە لە بەرندەری جەیهان جێگیر بووە و بەزوویی ئاڕاستەی ئەو شوێنە دەكرێت كە گرێبەستی پێفرۆشتنی نەوتەكەی لەگەڵ ئەنجام دراوە.
عەبدولغەنی دەستپێكردنەوەی هەناردەی نەوتی بە "دەستكەوتێكی گەورە"ـی هەردوو حكومەتی فیدراڵی و حكومەتی هەرێمی كوردستان ناو بردووە.