پەرەگراف
"كەیسەكەم بە هیچ شێوەیەك یاسایی نییە، چونكە لە ساڵی 2019ـەوە ئەم كەیسە هەبووە، تا ئێستا ئیشیان لەسەر نەكردبوو، لە 08-02-2025یش فەرمانی دەستگیركردنم بۆ دەرچووە بێ ئەوەی ئاگاداربم، دواتریش بە غیابی حوكم درام"، ئەمە نوێترین قسەی شاسوار عەبدولواحید، سەرۆكی جوڵانەوەی نەوەی نوێیە.
شاسوار عەبدولواحید كە پێی وایە كەیسەكەی بەسیاسی كراوە، "كات و شوێن"ـی دەستگیركردنەكەی بە جێگای پرسیار ناو دەبات و دەشپرسێت "ئەی لە ماوەی شەش ساڵی ڕابردوو كە لەو شارەدا بووم و لە ڕێگەی فڕۆكەخانەوە گەشتم كردووە، بۆچی دەستگیر نەكراوم؟".
دوێنێ یەكشەممە 05-10-2025، شاندێكی دەستەی سەربەخۆی مافی مرۆڤ بە سەرۆكایەتیی مونا یاقۆ، سەرۆكی دەستەكە، بۆ بەشداریی لە پرۆسەی دادگاییكردنی سەرۆكی جوڵانەوەی نەوەی نوێ سەردانی سلێمانیی كرد و دواتریش لە چاكسازیی گەوران سەردانی كرد.
دەستەی سەربەخۆی مافی مرۆڤ دەڵێت "بەهۆی ئەوەی شاسوار عەبدولواحید داوای تەمیزی كەیسەكەی كردووە و چاوەڕێی وەڵامی دادگای تەمیزی هەرێمی كوردستان دەكات، بۆیە دادگاییكردنی دواخست".
بەپێی ڕاگەیەندراوی دەستەی مافی مرۆڤ، شاسوار عەبدولواحید وتوویشیەتی "لە ڕووی تەندروستی و شوێن و مامەڵەكردنی هێزە ئەمنییەكانەوە كێشەم نییە". هەروەها داوایشی كردووە دەستەی مافی مرۆڤ "ڕۆڵی گرنگ"ـی خۆی ببینێ و لە ڕووی یاساییەوە چاودێریی دۆسیەكەی بكات.
نوێ دەكرێتەوە...