كەم ناوچە و كون و كەلەبەری هەرێم هەیە، هەفتانە چەند كەسێكی بە تۆمەتی فرۆشتن و بەكارهێنانی مادەی هۆشبەر تێدا نەگیرێت، بەڵام هێشتا مەترسیە جدییەكە دەستی پێنەكردووە.
مادەی هۆشبەر لە دوای ساڵی ٢٠٠٥ لە هەرێم كڕین و فرۆشتنی پێوەدەكرێت، بەڵام هیچ كات وەكو ئێستا فرۆشیار و بەكارهێنەرانی زۆر نەبووە، بەتایبەت كەم ڕۆژ هەیە، دەزگا ئەمنیەكان دەستگیركردنی تۆمەتبار ڕانەگەیەنن.
ساڵان دەستكەوتنی ئەم مادەیە قورس بوو، بۆیە ئەوانەی تامەزرۆی مادەی هۆشبەر بوون، پەنایان دەبردەبەر حەب و شتی تر، بەڵام ئێستا پێناچێت دەستكەوتنی قورس بێت.
دەستكەوتنی ئاسانە، نەك لەبەر كراوەیی سنورەكانی هەرێم بەڕووی وڵاتانی دراوسێ دا، كە خەڵكێكی زۆر وا تێگەیشتووە، بەڵكو مادەكە زۆر بووە، چونكە شپرزەیی ئەمنی ناوچە جیاجیاكانی عێراق و بڵاوبوونەوەی جۆرەكانی مادەی هۆشبەر، وایكردووە لەو ناوچانەشەوە دەرفەتی هێنانی بۆ هەرێم زیاتر بێت.
وەك لەسەرەتاوە ئاماژەم پێكرد، هەرچەندە مادەی هۆشبەر بڵاوبووەتەوە، بەڵام مەترسیە جدیەكەی هێشتا دەستی پێنەكردووە، بەتایبەت ئالودەبوونی ئاشكرای لێنەكەوتۆتەوە، ئینجا فرۆشیارانی نەبوونەتە باندی ئاشكرا، كە بوونە باند، مەترسیەكان لێرەوە گەورەتر دەبن، ئەوكات تەقە لە پۆلیس دەكەن و دۆخی ئەمنی تێكدەدەن و زۆر شتی تر.
ئەوەندەی من زانیاریم هەبێت، ئێستا لە عێراق خەریكە باند دروست دەبێت، چەند مانگێك لەمەوبەر سەرۆك باندێك گیرا، شوێنكەوتووەكانی تەقەیان لە هێزە ئەمنیەكان كرد و هەوڵی نانەوەی پشێوییان دا.
بۆیە هێشتا درەنگ نیە، بۆ بەرگرتن لە بڵاوبوونەوەی مادەی هۆشبەر و ڕێگرتن لە مەترسیەكانی، بەڵام ئەمە بە بەڕێوەبەرایەتی ئاسایش و دەزگایەكی محەلی ناكرێت، بەڵكو ئیرادەی جدی و هاتنە خەتی حكومەت و پلانی دەوێ.
هەنگاوی دەوێ بۆ ئەوەی هێنانی ئەم مادەیە لە ناوچە سنوری و ناوچە جیاجیاكانی عێراقەوە ڕابگیرێ، بڕیاری بوێرانەوەی دەوێ، كە هەر بەرپرس و كاربەدەستێك لە فرۆشتنی تێوە بگلێ، لێپێچینەوەی توندی لەگەڵ بكرێ.
جیا لەوانەش هەنگاو و تەكنیكی وردتر بۆ ئاشكراكردنی بەكار هێنەران و فرۆشیارانی بگیرێتەبەر، لە پاڵ تەكنیكی دەزگا ئەمنیەكاندا، بەشێوەیەك هەندێك لەو گەنجانەی ئاژاوە دەنێنەوە و دەستگیر دەكرێن، پشكنینیان بۆ بكرێت، هەندێ لەو شۆفێرانەی ڕووداوی هاتووچۆ دەكەن و جێی گومانن، بپشكنرێن. بەتایبەت ماوەیەك لەمەوبەر ڕووداوێكی هاتووچۆ ڕوویدابوو، دواتر دەركەوت ئۆتۆمبێلەكە مادەی تیابوو.
بێگومان، گەر هەوڵەكان بۆ ڕێگرتن لە هاوردەكردن و بنەبڕكردن لەنێوخۆ نەگیرێتەبەر، چوار پێنج ساڵێ تر، مەترسیەكانی مادەی هۆشبەر لە مەترسی سەر تاكەوە گەورەتر دەبێت بۆ مەترسی سەر كۆمەڵگا، ئەوكات چارەسەركردنیشی قورستر دەبێت.
_____________________________
بەدواداچوونێكی پێشتری پەرەگراف دەربارەی مادەی هۆشبەر لە كوردستان