دەتوانیت لە ڕووانگەی جیاوازە لە بایكۆت بنواڕیت، وەك كردەیەكی ئاڵۆزی هەمە لایەنە. بایكۆت تەنها ئابووری نییە، هەروەها ئەخلاقی و سیاسی و ناسنامەیی و ئیرادە و بوونە. ئەوانەی هەتا ئێستا ڕەخنە لە بایكۆت دەگرن، لە ڕووانگەی ئەوەوەیە كە نابێتە هۆی زیانپێگەیاندنی ئەردۆگان، یان ئابووریی توركی، ئەمە ڕەخنەیەكە لە دیدێكی تەواو تەسكەوە.
یەكەم: لە ڕووی ئایینییەوە.
بایكۆت ڕێك وەك ڕۆژووگرتن وەهایە، پرۆسەی خۆپاككردنەوەیە لە كاڵایەك كە داهاتەكەی دەبێتە هۆی كوشتنت. خۆ پاككردنەوەیە لە ژەهر، لە پشتیوانیی سیستەمێكی ئابووری كە چەندین دەیەیە لەسەر بژێوی و خاك و بوونی تۆ دەژی.
وەك چۆن لە هەموو ئایینێكدا جۆرێك لە ڕۆژووگرتن هەیە بۆ پاككبوونەوەی، نەك هەر جەستە، بەڵكو دەروون و ڕۆحیش، بایكۆت بە هەمان شێوەیە.
دووەم: بایكۆت وەك فەلسەفە
بایكۆت بۆ ئەوە نییە ئابووریی توركیا بڕووخێنێت، بۆ ئەوەیە ئیرادە بگەڕێنێتەوە بۆ مرۆڤی كورد، كە بەردەوام سیستەمی حیزبی كوردی و دژە كوردەكان و نەیارانی لە هەوڵی ئەوەدان ئەم مرۆڤە بخەسێنن. ئیرادە بۆ ئامانج نیبە، چونكە ئیرادە خۆی ئامانجە. بایكۆت هەڵویست وەرگرتنە لە بەرامبەر كارێكی دڕندانە. ئەمە ئەگەر (ئەزعەفوئیمان)یش بێت، هەر هەڵوێستە. ئەمە بنەمای بوونە، هەروەها ئامادەبوون لە دونیا، وەك ئەو كەسەی كە دەتەوێت.
سێیەم: بایكۆت وەك ئابووری
توركیا زۆر زیاتر لە خەڵكی كوردستان سوودی لە داهاتی هەرێم كردووە. توركیا هەمیشە ئامانجی ئەوە بووە كە سووڕێك دروست بكات، بە پێی ئەم سووڕە، هەرێم كە پارەی لە نەوت و غازەوە دەست دەكەوێت، كە توركیاش تیایدا سوودمەندە، ئەوا ئەو پارە بگەڕێتەوە بۆ توركیا لە ڕێگای كڕینی كاڵاوە. هەرێم بە قەبارەی خۆی یەكێكە لە هەرە كڕیارە گەورەكانی كاڵای توركی، عێراق یەكێكە لە هەرە گەورەترین بەرخۆرەكانی كاڵای توركی. فشار خستنە سەر ئەم سووڕە، مایەی نیگەرانی دەبێت، بە دڵنیاییشەوە مایەی زیانیش دەبێت بۆ توركیا. بەڵام ئەوەی زیاتر مایەی نیگەرانییە بۆ توركیا كە ئەم كارە لە ئەنجامی كارێكی سیاسییە.
چوارەم: بایكۆت وەك شووناس
مرۆڤی كورد لە ئاگابوونەوەی بە بایكۆت، لە ئەنجامدانی بایكۆت، هەڵویستێك دەنوێنێت بەرامبەر كوردێكی تر لە بەشێكی كوردستان. ئەمە هەنگاوێكی گرنگە لە سڕینەوەی سنوور، لە هاوسۆزی. سەدەیەكە هەوڵی ئەوە دەدرێت كە كورد بكرێت بە عێراقی و سووری و توركی و ئێرانی، بەڵام بایكۆت ئاماژەیە بۆ كۆتایی و شكستی پرۆسەی سڕینەوەی كورد وەك گەلێك.
پێنجەم: بایكۆت وەك سیاسەت
بایكۆت یانی دەربڕینێك، هەڵوێستێك لە بەرامبەر دۆخێك یان كارێكدا. ئەمە بە مانای ئەوە نییە كە مانای كۆتایی پەیوەندی بێت. كورد پێویستی بە پەیوەندیی باشە لەگەڵ گەلانی دەروبەری، بەڵام لە مێژووی مرۆڤایەتیدا پەیوەندیی باش هەمیشە لەسەر بنەمای هێز هاتووەتە ئاراوە، بۆیە بەهێزبوونی كورد، بنەمای پەیوەندیی باشە لەگەڵ ئەوانیتردا.
شەشەم: ڕەخنە لە بایكۆت
سەیر نییە ئەگەر بایكۆت ببێتە جێگای ڕەخنە، بە تایبەتی لە لایەن خەڵكێكەوە كە دژ بە كوردبوونن. ڕەخنە زۆر پێویستە بۆ بایكۆت، بۆ ئەوەی بەهێزی بكات، بەڵام لەناو كورددا ڕەخنە دیاردەیەكی دەگمەنە.
لە سەرووی هەموو ئەمانەوە، بایكۆت دەكرێت ببێتە بنەمای ئابوورییەكی تر كە سوڕانەوەی داهات و دابینكردنی كار فەراهەم دەكات. دوو ڕەهەند كە ئێمە پێویستمانە بۆ ئەوەی لاوان لە هەژاری بپارێزین.