نووسینی: ڕەحمان غەریب
جارێ پەیوەندییە تەلەفۆنییەكەی وەزیری دەرەوەی ئەمریكا و سەرۆك وەزیرانی عێراق، لە میدیاكاندا گەرمە و بابەتی هۆشدارییەكانی ئەمریكا بۆ زاڵبوونی هەژمونی ئێران لە رێی گروپە چەكدارەكان پەرەدەستێنێت و تێوەگلانی هەندێكیان لە هێرش بۆ سەر كوردستان بابەتی میدیا عێراقییەكانە، كە پێدەچێت ببێتە مایەی ڕووبەڕووبوونەوەی سەربازی نزیك، یان سەپاندنی سزا بەسەر عێراقدا، رووداوەكەی سەرەتای ئەم هەفتەیەی سەیدیەی ڕۆژئاوای بەغداد و دزەپێكردنی نوسراوەكەی (سۆمۆ)ی هاتە سەر و شتی تریش.
شەوی رابردوو له چەند وێستگەیەكی میدیای عێراقی وەستام:
كەیسەكەی زەینەب جەواد
لە 28ی حوزەیرانی 2025 لەكاتی گەڕانەوەی لە هەولێرەوە بۆ بەغداد كاتژمێر 6ی ئێوارە لە خاڵی پشكنینی شەعب، بە بێ بڕیاری دادوەر، مۆبایلەكانی و لاپتۆپەكەی لێ وەردەگرن و دەیخەنە ئۆتۆمبێلێكەوە و دەیبەن بۆ بارەگایەكی ئەمنی حەشدی شەعبی، چەند كەسێك كە روخساریان شاردۆتەوە، شەش سەعات لێكۆڵینەوەی لەگەڵ دەكەن.
تۆ كچی مەزهەبەكەمانی، بۆ لەسەر لیستی ئێمە خۆت كاندید نەكرد؟ بۆ چویتە لای مەدەنییەكان؟ بۆ دژی مقاوەمەی؟ بۆ لە بەرنامەكەی ئەحمەد ئەلبەشیر قسەت پێ ووتین؟ بۆ دژی مەزهەبەكەمان پۆست بڵاودەكەیتەوە؟ بۆ بەشداری خۆپیشاندانەكانی تشرینت كرد؟ و دەیان پرسیاری لەو شێوەیە. دوای لێكۆڵینەوە ئازادی دەكەن و مۆبایلەكانی نادەنەوە.
پاش چەند رۆژێك لە ئازادكردنی، كەسێكی ناسراوی حەشدی شەعبی پەیوەندی پێوە دەكات و داوای لێدەكات ڤیدیۆیەك تۆمار بكات داوای لێبوردن لە مقاومەی عێراقی و لوبنانی و سوری و فەڵەستینی و..هتد بكات و بڵاوی بكاتەوە. بە پێچەوانەوە، خێر نابینێ.
شەوی 27ی تەمووز، ئەمنی حەشد نامەكانی لەگەڵ هاوڕێكانی سكرین دەكەن و هەندێك وێنەی ناو مۆبایلەكەی لە لاپەڕە سێبەرەكانی حەشد بڵاودەكەنەوە و هەڕەشەی جۆراوجۆری لێ دەكەن.
شەوی رابردوو، ئەمانەی لە بەرنامەی (الحق یقال)ی كەناڵی یوتیڤی كە میدیاكاری دیاری عێراقی عەدنان ئەلتائی پێشكەشی دەكات، ئاشكرا كرد.
عەدنان لە پێشەكی بەرنامەكە پرسیاری كرد: ئەرێ ئێوە كە ئەم كارە دەكەن، خۆتان خوشك و دایكتان نییە؟ كە دەگەڕێنەوە ماڵەوە چۆن تەماشای چاوی خوشك و دایكتان دەكەن، ئەرێ شەرم ناكەن؟
شابەندەر بە چاوی پڕ لە گریانەوە
شەوی رابردوو غالب شابەندەر لە دیداری كەناڵی سامەرا، بەچاوی پڕ لە گریانەوە گووتی: چارەسەری پرۆسەكە لە توانای مەرجەعییەتدا نییە، كارەسات لە بەردەمماندایە، هۆكارەكەیشی سەركردەكانی شیعەن، خەریكی خۆیان و مناڵەكانیان و ململانێكانیانن، بەشداریان كرد لە فرۆشتنی خۆر عەبدوڵا، سەرقاڵی پارەو گەندەڵین.
من خەبیری مەرجەعییەت نییم، بەڵام ئاگام لەو كەشەیە، ئەوەتا شیعەی لوبنان رۆشت، شیعەی سوریا رۆشت، سەركردە شیعەكانی عێراقیش لە نێوان دوو كوتلەدان، هەر یەكەو شتێكی ئەویدی لە ژێر دەستدایە، هیچیان پێناكرێت.
سۆمۆ قڵیشانییەوە
نوسراوێكی دامەزراوەی بەبازاڕكردنی نەوتی عێراق، كە بۆ ئەنجومەنی ئاسایشی نیشتمانی عێراقی ناردووە و دەزی پێ كراوە، باسی لە قاچاخچێتی بەرهەمی نەوت دەكات لەڕێگەی پاپۆڕی گواستنەوە لە بەندەرەكانی ئوم قەسر و خور ئەلزوبیر و تەكنیكی ئاڵۆزی خۆدزینەوە و فریودان بەكاردەهێنن بۆ ئەوەی خۆیان لە چاودێریكردن بپارێزن.
ئەم كردارانەی بە "هێرشێكی ڕاستەوخۆ بۆ سەر ئابووری عێراق" وەسف كردووە، داوای كردوە ڕێوشوێنی توند بگرنەبەر بۆ ڕاگرتنی ئەم قاچاخچێتییە چونكە بە هۆیەوە" عێراق رووبەڕووی لێپرسینەوەی یاسایی نێودەوڵەتی دەبێتەوە."
ترەمپ لە تونچییەوە بووە بە حەمامچی، یانی نازانێت(Dark Ship-to-Ship Transfers) لەناو یان نزیك لە سنوری ئاوی عێراق، لە تاریكیدا، دەستاودەست كردنی نایاسایی لە نێوان پاپۆڕە نەوتهەڵگرەكان، كراوە؟.