پەرەگراف – دیمەن ئیسماعیل
دەمەوئێوارەبوو، سۆزان بەبێ ئاگاداری هاوسەرەكەی گەڕایەوە بۆ ماڵەوەو لەگەڵ دەرگای حەوشەكەی كردەوە دەنگەدەنگێكی نامۆ بەر گوێی كەوت، هەنگاوەكانی بەرەو ژورەوە خاوتر كردەوە و دەیویست بزانێت چی ڕوودەدات.
تا لە ژورەكانی ماڵەكەی نزیكتر دەبووەوە دەنگەكە زیاتر دەبوو، بە ئەسپایی و بێدەنگ هەنگاوی دەنا، لە دڵەڕاوكێ و بیركردنەوەی زۆردا بوو، ئەوەی چاوەڕێی نەبوو ئەو ئێوارەیە بینی، هاوسەرەكەی لە ماڵەوە لەگەڵ ئافرەتێكی تردا پێكەوەبون.
"خیانەتی مێردەكەمم بەچاوی خۆم بینی، بەڵام نەمتوانیوە هیچ شتێك بڵێم، لەترسی تێكچونی ژیانم بێدەنگم"، سۆزان وای وت.
سۆزان؛ ناوی خوازراوی ژنێكی دانیشتوی ناوچەیەكی سەر بە پارێزگای سلێمانییە، تەمەنی 26 ساڵە و زیاتر لە هەشت ساڵە ژیانی هاوسەرگیری پێكهێناوە، بەڵام ئێستا ژیانی بووەتە دۆزەخێك و بە ناچاری تێیدا ماوەتەوە.
ئەوەی زیاتر لە هەموو شتێك ئازاری ئەو ژنە دەدات، كەسی ناپاك لەگەڵ هاوسەرەكەی، خزمی خۆیەتی و پێشتر بەهۆی متمانەی زۆرەوە، دەرگای ماڵەكەی بۆ كردووەتەوە.
"ئەوكەسەی خیانەتی لێكردوم هەرگیز بەمێشكمدا نەهاتووە، چونكە خزم و هاوڕێی نزیكی متمانەپێكراوی خۆمە"، سۆزان لە گێڕانەوەی مەینەتیەكانیدا بۆ پەرەگراف نەیتوانی نەگری، هەرزوو كەوتەوە باسی ئەوكاتەی بۆ یەكەمجار هاوسەرەكەی بەو خزمەی ئاشنا بوو.
ساڵی ڕابردوو، ناچار بووە بۆ بۆنەیەكی تایبەت هاوسەرەكەی بەجێبهێڵێت، وەكو سۆزان دەڵێت، هەرئەوكات چیرۆكی ناپاكیی هاوسەرەكەی دەستیپێكردووە و دواتر چەند جارێك لەگەڵ ئەو خزمەیدا یەكترییان بینیووە، "هەرچەندە یەكتربینینەكان زۆر زیاتر بوو، بەڵام هەر گومانم نەبوو خیانەتم لێبكەن."
"خۆزگە ملم بشكابا ئەو ڕۆژە نەڕۆشتمایە بۆ ئەو بۆنەیە"، سۆزان كە دایكی دوو منداڵە، ئێستا گومانی لە زۆربەی ڕابردوی هاوسەرەكەی هەیە.
هەرچەندە ئەو، هاوسەرەكەی ناپاكیی لێكردووە، بەڵام لەبەر منداڵەكانی و تانەی كۆمەڵگا، هەموو ئازارەكانی لە دڵی خۆیدا كۆكردووەتەوە و ئامادەنییە وەكو قوربانییەك سكاڵا بكات.
بەپێی ئامارەكانی بەڕێوەبەرایەتی گشتی بەرەنگاربونەوەی توندوتیژی خێزانی، لە ساڵی ڕابردوو لە تەواوی هەرێمی كوردستاندا، زیاتر لە نۆ هەزار و 500 كچ و ژن سكاڵایان تۆماركردووە.
ڕۆزە، ناوی خوازراوی ژنێكی 29 ساڵی تری دانیشتوی هەرێمی كوردستانەو بۆ پەرەگراف وتی"ماوەی پێنج مانگ هاوسەرەكەم لەگەڵ پورێكی خۆمدا پەیوەندی هەبوو و ناپاكیی لێدەكردم"، ئەویش هاوشێوەی سۆزان بێدەنگی هەڵبژاردوە، "ویستومە چەندینجار سكاڵا بكەم، بەڵام لە ترسی هەڕەشەی مێردەكەم نەمتوانی."
بەپێی ئامارەكانی ئەنجومەنی دادوەری هەرێمی كوردستان، لە ساڵی ڕابردودا نۆ هەزار و 192 حاڵەتی تەڵاق و جیابونەوە تۆماركراون لە كۆی نزیكەی 40 هەزار هاوسەرگیری، ئەوەش بەراورد بە ساڵی 2017 نزیكەی دوو هێندە زیادیكردووە، كە ناپاكیی یەكێكە لە هۆكارەكان.
سۆلاڤ، ناوی ژنێكی تری خوازراوەو بەپێچەوانەی سۆزان و ڕۆزەوە، لەگەڵ بە ناپاكیی هاوسەرەكەی زانیوە ڕێی دادگای گرتووەتەبەر، ئەو كە لە 35 ساڵی تەمەنیدایە بە پەرەگراف-ی وت"بەدزیی منەوە هاوسەرەكەم ژنی دوەمی هێنابوو، بەڵام نەمتوانی قبوڵی بكەم و لەڕێی سكاڵاوە لێی جیابومەوە."
لە هەرێمی كوردستان، هەرچەندە بەپێی یاسا ژنهێنانی دووەم سنورداركراوە، بەڵام 89 كەس لە ساڵی ڕابردودا ڕێگەی هێنانی ژنی دوەمیان پێدراوە، ئەوەش بەپێی ئامارەكانی ئەنجومەنی دادوەری.
چۆمان ئەحمەد، توێژەری دەرونی، پێیوایە زۆربونی ناپاكیی هاوسەرگیری هۆكارەكەی ناڕازیبونی هەردولایە لە یەكتری لەگەڵ پاڵنەرەكانی تر بە نمونە؛ دراما توركییەكان.
"تی ڤی و دراما بیانییەكان كاریگەری خراپی بۆ ڕەوشتی خێزان دروستكردوە، جگە لەتێكچونی شیرازەی خێزان."
ئەو توێژەرە پێیوایە ناپاكیی خەریكە دەبێتە دیاردە و دەڵێت"ئاسانترین جۆری خیانەت لەڕێی مۆبایل و تۆڕە كۆمەڵایەتییەكانەوەیە"، لەبارەی كاریگەرییە دەرونییەكانی ئەو حاڵەتەوە وتی"بەهۆی بەردەوام خەمخواردنی كەسەكە توشی نەخۆشی نەفسی دەبێت و ڕەنگە بگات بەئاستی خۆكوشتن."
لە هەرێمی كوردستان بەپێی چەند یاسایەك مامەڵە لەگەڵ دۆسیە خێزانییەكان و توندوتیژی خێزانی دەكرێت و ناپاكییش سزای زیندانیی بۆ دانراوە.
فریاد هیدایەت، بەڕێوەبەری نوسینگەی بەرەنگاربونەوەی توندوتیژی خێزانی لە كەلار بۆ پەرەگراف ڕونیكردەوە"خیانەتی هاوسەرگیری لەدەرەوەی خێزان گەیشتبێتە زینا سزاكەی لە 24 كاتژمێر بۆ 5 ساڵ زیندانییە، ئەگەر ناپاكیی لەڕێی تۆرە كۆمەڵایەتییەكانەوە بێت شەش بۆ سێ ساڵ زیندانییە یاخود غەرامەكردن، ناپاكیی لەگەڵ كەسە مەحرەمەكاندا سزاكەی 10 بۆ 15 ساڵ زیندانیكردنە."
ئەو جۆرە سزایەی بۆ ناپاكیی هەیە هیچ لە بیروڕای سۆزان-ی نەگۆڕی، ئەو بڕیاریداوە خەمەكانی تەنیا لای خۆی بێت‌و لە پێناو منداڵەكانیدا بەرگەی ژیانە پڕ لە ئازارەكەی بگرێت، چونكە بەهەموو بینینێكی هاوسەرەكەی جارێكیتر برینی ناپاكییەكە نوێدەبێتەوە.