ئەو مەرگەی هەرێمێكی خەمباركرد

سێوە لەبەر شیرازەی خێزانەكەی ئازارەكانی خۆی لەبیركرد
24-12-2018 08:48
سێوە قادر‌و كچە بچوكەكەی.

 

پەرەگراف- كۆچەر فازڵ


تەنیا دوو مانگێك لەمەوبەر بوو، سێوە قادر لەبەر شیرازەی خێزانەكەی بڕیاریدا توندوتیژییەكانی هاوسەرەكەی لەبیر بكات، بەڵام هەر ئەو لێخۆشبونە بووە هەوێنی كۆتاییهاتنی ژیانە پڕ ئازارەكەی.

 

ئەو ژنە گەنجە، 23 ساڵی تەمەن بوو، هەر بەئومێدی ژیانێكی ئاسودەوە، تاڵاوی ئاگری چەشت و چەند ڕۆژێك دوای مەرگی جگەرگۆشەكانی، بە یەكجاری ڕۆیشت.

 

بەرەبەیانی ئەمڕۆ دوشەممە 24ی كانونی یەكەم، هەواڵێكی تری جەرگبڕ، خەڵكی هەرێمی كوردستان و بەتایبەت چەمچەماڵی ڕاچڵەكاند، سێوە قادر، دوای زیاتر لە هەفتەیەك مانەوەی لە نەخۆشخانە، بەهۆی زۆری سوتاوییەكەیەوە گیانی لە دەستدا.

 

"بەرەبەیانی ئەمڕۆ سێوە گیانی سپارد، بەوەش لە تەنیشت منداڵەكانیەوە بەخاك دەسپێردرێت" شەفیق نوری، مامی سێوە بە نوێنەرایەتی خانەوادەكەی بۆ ڕۆژنامەنوسان وای وت.

 

بەڕێكردنی تەرمی سێوە بۆ گۆڕستان. وێنە؛ پەرەگراف.

  

چیرۆكەكەی سێوە، زیاتر لە هەفتەیە بۆتە جێی داخی خەڵك، ئەوەی زۆری لەسەر وترا و لە تۆڕە كۆمەڵایەتیەكاندا گومانی لەسەر بوو، تەمومژاوی ڕوداوەكەیە، زۆرێك پەنجەی تۆمەت بۆ هاوسەرەكەی درێژ دەكەن، لە كاتێكدا لایەنە فەرمیەكان هیچ قسەیەكی كۆتاییان لەوبارەیەوە پێ نییە.

 

شەوی 16ی كانونی یەكەم، ئەو ژنە و سێ منداڵی لە خانوەكەی خۆیاندا لە قەزای چەمچەماڵ سوتان، سەرەتا وابڵاوكرایەوە بەهۆی شۆرتی كارەباوە بوە و دواتر، دەستگیركردنی هاوسەری ئەو ژنە، لەلایەن هێزە ئەمنیەكانەوە ڕاگەیەندرا.

 

بەپێی سەرچاوەیەكی ئاگادار و بەرپرس لە پۆلیسی چەمچەماڵ بۆ پەرەگراف، لێكۆڵینەوەكان لە دۆسیەكە بەردەوامی هەیە و "بەڵگەی باش" هەن، بەڵام باوكی منداڵەكان "هێشتا هیچ دانپێدانانی نەبووە."

 

"دواكەوتنی لێكۆڵینەوەكان لە ڕوداوەكە، پەیوەندی هەیە بە نەگەیشتنی وتەی قوربانییەكە، كە لە سلێمانی لێی وەرگیراوە و دواتر پاڵپشت بەو بەڵگە و وتانەی هەیە، لێكۆڵینەوەی ورد دەكرێت" ئەو سەرچاوەیە كە نەیویست ناوی بڵاوبكرێتەوە بەهۆی هەستیاری دۆسیەكەوە، وای وت.

 

سێوە قادر، دوای گڕگرتنی خانوەكەیان، سێ منداڵەكەی دەستبەجێ گیانیان لەدەستدا، بەڵام خۆی بە برینداریی و ڕێژەی سوتاوی زیاتر لە سەدا 90ـوە، ڕەوانەی نەخۆشخانەیەكی سلێمانی كرا.

 

بە دروشمی "بەڵێ بۆ سەروەری یاسا" و "نا بۆ سوڵحی عەشایەری" پێشوازی لە تەرمی سێوە كرا. وێنە؛ پەرەگراف.

 

بەوتەی كەسوكاریی، ئەو ژنە تا ئەمڕۆ گیانی لەدەستدا، نەیزانی منداڵەكانی لە ڕوداوەكەدا سوتاون، ئەوەشی دەیوت تەنیا هاوار بوو لە دەست ئازارەكانی.

 

تەنها قسەی ئەو ژنە، دوای سوتانی لە تۆمارێكی ڤیدیۆییدا بوو كە تۆڕی میدیایی ڕووداو بڵاویكردەوە، تێیدا هاوسەرەكەی بە گڕتێبەردانی ماڵەكەیان تۆمەتباردەكات و داوادەكات، ئەو دۆسیەیە دانەخرێت.

 

سێوە یەكەمجاری نییە باس لە مامەڵەی خراپی هاوسەرەكەی بكات، ئەوەی گومانەكانی زیاتر كردووە، هەبونی دۆسیەیەكی پێشتریەتی لە بەرێوەبەرایەتی توندوتیژی دژ بە ژنان.

 

ڕائید هێمن عەلی، بەڕێوەبەری نوسینگەی بەرەنگاربونەوەی توندوتیژی خێزانیی لە چەمچەماڵ بۆ پەرەگراف ئاشكرایكرد "پێش دوو مانگ تاوانلێكراو(سێوە قادر) لەلای ئێمە سكاڵای یاسایی لەسەر مێردەكەی تۆمار كردو وتی توندوتیژی دەرونیی و جەستەیی بەرامبەری ئەنجامدەدات، ئەم سكاڵایەش پشتئەستور بوو بە بەڵگەی پشكنینی پزیشكی."

 

"پاش چەند ڕۆژێك سێوە لەگەڵ باوك و برایەكی هاتنە نوسینگەكەمان‌و تەنەزولی لە سكاڵاكە كرد، سێوە زۆر پێداگربوو پاشەكشێ بكات بە بیانووی ئەوەی شیرازەی خێزانییان تێكنەچێت، تەنانەت داوایكرد مێردەكەی ئاگاداری ئەو سكاڵایە نەبێت."

 

وێنەی سێوەو منداڵەكانی بە فراوانی لە تۆڕە كۆمەڵایەتییەكان بڵاوبووەتەوەو خەڵك بەداخن بۆیان.

 

باوكی منداڵەكانی سێوە، هێشتا لە لای دەزگا ئەمنییەكانەو ڕوداوەكە ڕەتدەكاتەوە، ئەوەش جۆرێك لە مشتومڕی لە نێوان خانەوادەی هەردولادا دروستكردووە.

 

دوابەدوای ڕوداوەكە، قادر نوری، باوكی سێوە لە بەیاننامەیەكدا بۆ فراكسیۆنەكانی پەرلەمانی كوردستان، زاواكەی بە بكەری ڕوداوەكە ناوبرد و بەپێویستی زانی، لەبارەی ئەو دۆسیەیەوە هەڵوێستیان هەبێت.

 

هەروەها ئەمڕۆ دووشەممە لە كاتی بەڕێكردنی تەرمی سێوە بۆ چەمچەماڵ، مامی لەبری بنەماڵەكەی داوایكرد دۆسیەكە بەئاقارێكدا نەبرێت و وابڕوات بەدڵی هەموان بێت، شەفیق نوری وتی"كەیسەكە ڕێچكەی خۆی گرتووە و هەموولایەنەكانیش هاوسۆزیی خۆیان دەربڕیوە، بۆیە هیچ داواكارییەكیشمان نیەو كارەكەمان داوەتە دەستی دەزگا پەیوەندیدارەكان."

 

لە ماوەی یەك هەفتەی ڕابردودا، شتی زۆر جیاواز لەبارەی دۆسیەكە و هۆكارەكانیانەوە وروژێنرا، بەڵام لێدوانی فەرمی لایەنی پەیوەندیدار ئەوەیە، یەك تۆمەتبار هەیە و دەستگیركراوە و لێكۆڵینەوەكان بەردەوامن.

 

سێوە زیاتر لە شەش ساڵە ژیانی هاوسەرێتی پێكهێناوە، سێ منداڵی تەمەن شەش مانگ تا شەش ساڵی هەبوو، دارین و لارین و دەوەن، بەر لەدایكیان جوانەمەرگ بون.

 

كەسێكی نزیك لە خانەوادەی هاوسەری ئەو ژنە كە لەبەر هەستیاری بارودۆخی نێوان هەردوو خانەوادەكە داوایكرد ناوی نەهێنرێت بۆ پەرەگراف وتی"ئێمە لەگەڵ ماڵی كاك قادر، پێشینەی خزمایەتیمان هەیە، ئەو منداڵانە و ئەو ئافرەتەش كچ و منداڵی‌ ئێمە بوون، بۆیە داواكارین ئەم بابەتە لەلایەن هیچ دەزگایەكەوە بەلاڕێدا نەبرێت، چونكە ئێمە تەسلیمی دادگامان كردووە و دەمانەوێـت یاسا یەكلاییبكاتەوە."

 

قسەی ئاشكرای خانەوادەی تۆمەتبارەكە، لە زاری باوكیەوە بوو، كاتێك لەڕێی كەناڵی ئێن ئاڕتی-یەوە داوایكرد ڕاگەیاندنەكان چاوەڕێی بڕیاری دادگا بن، چونكە كوڕەكەی خۆیی ڕادەست كردووە، تا تاوانباری سەرەكی دۆسیەكە بە سزا بگات.

 

دەرەنجامی دۆسیەكە هەرچییەك بێت، ئەوەی قوربانیدا سێوە قادر بوو، لە پێناو منداڵ و خێزانەكەیدا ئامادەبوو چاوپۆشی لە ئازارەكانی ڕۆژانەی بكات.

 

سێوە بە ئارامگەی منداڵەكانی گەیشت‌و لە تەنیشتیانەوە بەخاكسپێردرا. وێنە؛ پەرەگراف.

 

بەڕێوەبەری نوسینگەی بەرەنگاربونەوەی توندوتیژی خێزانیی لە چەمچەماڵ دەڵێت، ئەو ژنە لەكاتی كشاندنەوەی سكاڵاكەیدا وتویەتی"نامەوێـت منداڵەكانم بێ نازی باوكیان گەورەبن و خۆشەویستیم بۆ منداڵەكانم‌و مێردەكەم هەیە."

 

بەوتەی ڕائید هێمن، هێشتا هاوسەری ئەو ژنە دەستبەسەرە، بەڵام دانپێدانانی نییە، هەرچەندە "بەڵگەی زۆرباش" كۆكراوەتەوە و لێكۆڵینەوەكان بەردەوامە.

 

ڕوداوەكە، لەسەر ئاستی هەرێم ناڕەزایی بەفراوانی لێكەوتەوە، جگە لە تۆڕە كۆمەڵایەتیەكانی ئینتەرنێت، ئێوارەی ئەمڕۆ گردبونەوەیەكی ناڕەزایی لە هەولێر بەڕێوەچوو، دژی ژنكوژی.

 

بەپێی ئامارەكانی بەڕێوەبەرایەتی بەرەنگاربونەوەی توندوتیژی دژی ژنان، تەنیا لە مانگی تشرینی یەكەم/10ی ئەمساڵدا حەوت حاڵەتی كوشتن، شەش خۆكوشتن، 11 خۆسوتان، نزیكەی هەزار سكاڵا لەلایەن ژنانەوە لە شارەكانی هەرێم تۆماركراون.

 

سەركەوت ئەحمەد، وتەبێژی پۆلیسی پارێزگای سلێمانی ئەمڕۆ لە كۆنگرەیەكی ڕۆژنامەوانیدا باسی لە ڕوداوەكەی چەمچەماڵ كرد و ئاماژەی بەوەدا، تەنیا كەسێك دەستگیركراوە و ئەویش باوكی منداڵەكانە، بەڵام بەهۆی ئەوەی لە ڕوداوەكەدا ئاڵۆزیی هەیە، لێكۆڵینەوەی وردی پێویستە.

 

ماڵە گڕگرتوەكەی سێوە، دەكەوێتە گەڕەكی ئاسودە لە قەزای چەمچەماڵ و لە شوێنێكی تری ئەو شارەشدا، ئەمڕۆ بە ئامادەبونی هەزاران كەس تەرمەكەی لە پاڵ گۆڕی سێ منداڵەكەیدا بەخاكسپێردرا.

 

ڕەمك ڕەمەزان، قایمقامی چەمچەماڵ لە مەراسیمی ناشتنی تەرمی سێوەدا داوایكرد تەبایی قەزاكە و برایەتی بپارێزرێت، بەوەی هەموان ڕێگە بە دەزگا ئەمنیەكان بدەن بۆ لێكۆڵینەوەو ئاشكراكردنی تەواوی ڕوداوەكە.

 

لە قەزای چەمچەماڵ، جیاواز لە ناوچەكانی تر، خەمەكان تەنیا لەسەرشەقام و تۆڕە كۆمەڵایەتیەكاندا نەبوو، بەڵكو ئیدارەی قەزاكە بڕیاریدا سبەی بەبۆنەی ئەو ڕوداوەوە لە تەواوی سنورەكەدا ماتەمینی بێت.