باوکى کوژراوەکەى بەردەم لاناز: کوڕەکەم بە تەقەى ئاسایشى پاڵاوگەکە و بە فیشەکى دۆشکە کوژراوە
پەرەگراف - ئەو کەسەى لە خۆپیشاندانەکەى بەردەم پاڵاوگەى لاناز کوژرا، خەڵکى کەرکووکە، شۆفێرى بارهەڵگر بووە و هیچ پەیوەندییەکى بە خۆپیشاندانەکەوە نەبووە. باوکى دەڵێت "بە تەقەى ئاسایشى پاڵاوگەکە کوژراوە. خۆم چووم تەرمەکەیم لە پزیشکى دادى وەرگرتەوە، فیشەکى دۆشکە بەر ناوچەوانى کەوتووە و لە پشتەسەریەوە دەرچووە".
عیرفانى تەمەن ٢٥ ساڵ، باوکى کۆرپەیەکى دوو مانگانە. لە کۆمپانیاى گەلیاوە بە کرێ شۆفێریى بارهەڵگرى کردووە. لە کاتى خۆپیشاندانەکەدا بەهۆى گرتنى ڕێگاکەوە نەیتوانیوە تێپەڕێت. کەسوکارى دەڵێن "کاتێک گرژى لە خۆپیشاندانەکەدا دروست بووە، لە بارهەڵگرەکەى دابەزیوە بۆ ئەوەى خۆى دەرباز بکات و دوور بکەوێتەوە، بەڵام ئاسایشى پاڵاوگەى لاناز تەقەیان لێ کردووە و کوشتوویانە".
"کوڕەکەم کرێچییە و قەرزارە. بە قەرز ژنم بۆ هێناوە. دوو مانگە منداڵێکیان بووە. دوو بەڵگەى ڤیدیۆییم لایە کە یەکێک فەرمان بە ئاسایشەکان دەکات دەڵێت لێى بدە. خۆ کوڕەکەم تیرۆریست نییە، بۆ بە دۆشکە لێتیان دا؟"، باوکى عیرفان وا دەڵێت.
ئەم قسانەى باوکى عیرفان لە کاتێکدایە کە شەوى ڕابردوو وەزارەتى ناوخۆى حکومەتى هەرێم خۆپیشاندنەکەى بە "ئاژاوەگێڕى بە دەستى دەرەکى و فیتى ناوخۆیى" ناو برد. کوژرانى ئەو کەسەیشى دایە پاڵ خۆپیشاندەران و دەڵێت "لە ئەنجامی تەقەی ئەو كەسانەدا هاووڵاتییەك بووە قوربانی و گیانی لەدەست دا".
دانیشتووانی گوندی لاجان كە دەكەوێتە نزیك پاڵاوگەی لاناز لە قەزای خەبات لەسەر ڕێگای گوێڕ، چەند ڕۆژێكە خۆپیشاندان دەكەن و پێشتریش چەند جارێك خۆپیشاندانیان ئەنجام داوە. داوا دەكەن گەنجەكانیان لە پاڵاوگەكەدا دەرفەتی كاریان بۆ بڕەخسێنرێت.
پاش ئەوەی دوێنێش خۆپیشاندانەكە بەردەوام بوو، گرژى دروست بوو و هێزە ئەمنییەكان و پاسەوانانی پاڵاوگەكە لە دەروازەی پاڵاوگەكەدا بە دەستڕێژی گوللـە هەوڵی كۆتاییهێنان بە خۆپیشاندانەكەیان دا، لە ئەجامدا گەنجێك كوژرا كە خۆپیشاندەران وتیان "بە تەقەی ئاسایشی پاڵاوگەكە" گیانی لەدەست داوە.
دانیشتووانی گوندی لاجان سەر بە عەشیرەتی هەركین. ئەوان دەڵێن "بەر لە هەڵبژاردن بەڵێنیان پێ داین كە دەرفەتی كار بۆ ئێمەش فەراهەم بكرێت، بەڵام ئێستا پاشگەز بوونەتەوە". هەر بۆیە ڕێگەی هاتووچۆی تانكەرەكانیان بەرەو هەولێر داخست.
باوکى گەنجە کوژراوەکە لە کۆنگرەیەکى ڕۆژنامەوانیدا گلەیى ئەوەى کرد کە "تا ئێستا نوێنەرێکى حکومەتى هەرێم نەهاتووە سەرەخۆشییەکەم لێ بکات، تەنانەت تەلەفۆنێکیشیان بۆ نەکردووم". داواى لە دامودەزگا پەیوەندیدارەکانى حکومەتى هەرێميش کرد کە "خوێنى کوڕەکەم بەهەدەر نەچێت" و بکوژ دەستگیر بکرێت کە وەکوو خۆى دەڵێت "دەناسرێتەوە".
هاوسەرى کوژراوەکەش بە کۆرپەکەى باوەشیەوە لە پرسەى مێردەکەیدا قسەى بۆ میدیاکان کرد و وتى "نە دەمانچەى پێ بوو نە هیچ. لە تەنیشت سەیارەکەى خۆیەوە وەستابوو بۆ ئەوەى خۆپیشاندانەکە تەاو ببێت و بگەڕێتەوە. کاسبکارى ئەو ڕێگایە بوو، بۆ پەیداکردنى ١٥ هەزار دینار ڕۆیشتبوو".
وەزارەتی ناوخۆى حکومەتى هەرێمى کوردستان لەبارەى خۆپیشاندانەکەوە دەڵێت "چیتر ڕێگە نادەین سوود لە نیازپاكیی دامودەزگاكانی هەرێمی كوردستان وەربگێرێت و سنوورێك بۆ ئەو كارە تێكدەرانە دادەندرێت. بۆ ڕاگرتنی ئەو جۆرە ئاژاوەگێڕییانە، بەپێی یاسا بەركارەكان لە هەرێمی كوردستان مامەڵە لەگەڵ كەسانی ئاژاوەگێڕ دەكرێت و كەس لە سەرووی یاسا نییە".