وەزیری بازرگانی: لە 25ی مانگەوە تەنی گەنم بە 850 هەزار دینار لە جووتیاران وەردەگیرێت
پەرەگراف
كەمال موسلیم، وەزیری بازرگانیی هەرێم، رایگەیاند "بەهۆی دەستپێكردنی وەرزی دروێنەی گەنم لە هەندێك ناوچەی هەرێمی كوردستان، لە 25ی ئەم مانگەوە سایلۆكانی هەرێم دەكرێنەوە و ئەمساڵ سەرجەم گەنمی بەرهەمهاتوو لە جووتیاران وەردەگیرێت".
وەزیری بازرگانی وتیشی "وەرگرتنی گەنم بەپێی ئەو میكانیزمەی بەغدا دەبێت كە لە پارێزگاكانی دیكەی عێراق جێبەجێ دەكرێت و تەنێك گەنم بە 850 هەزار دینار لە جووتیاران وەردەگیرێت".
كەمال موسلیم، وەزیری بازرگانیی هەرێم، ئەمڕۆ سەردانی سایلۆكانی سلێمانیی كرد و ڕایگەیاند، لەبارەی نەگونجاویی كۆگاكانی بەشەخۆراكی مانگانە و دواخستنی پرۆسەی دابەشكردنی، لیژنەیەكیان پێكھێناوە بۆ دیاریكردنی كەموكورتییەكان. بەڵێنیشیان لە بەغداد وەرگرتووە كێشەی دواكەوتنی ماددە خۆراكییەكان چارەسەر بكرێن و كۆتایی بەوەبێت دابەشكردنی بەشە خۆراك لە ھەرێم دوابكەوێت بەراورد بە عێراق.
كەمال موسلیم وتیشی "بڕیاری بڕینی بەشەخۆراكی ئەو هاووڵاتییانەی كە مووچەیان لە ملیۆنێك و 500 هەزار دینار بەرەو سەرەوەیە، جێبەجێ كراوە و نووسراو لەوبارەیەوە ئاراستەی وەزارەتی دارایی كراوە".
* موسەننا ئەمین: ئەوەی لە كۆگاكانی خۆراك لە هوانە دەگوزەرێت، زۆر ڕیسوایی و نایاساییە