پەرەگراف
ئەنجوومەنی ئاسایشی هەرێمی كوردستان ئەنجامی لێكۆڵینەوە لە كوژرانی عەمید محەمەد میرزای ڕاگەیاند و دەڵێت "لە ڕێگەی بۆمبێكی لكێنراوەوە لەلایەن گرووپێكی پەكەكەوە تیرۆر كراوە".
ئەنجوومەنی ئاسایشی هەرێمی كوردستان لە ڕاگەیەندراوێكدا وردەكاریی ڕووداوەكەی بە ڤیدیۆ خستووەتە ڕوو و دەڵێت "گرووپەكە لە بەرەبەیانی 23ی تەمووز هاتوونەتە ناو زاخۆ و لە ڕێگەی ئۆتۆمبێلی هۆندای تێكسۆنی ڕەنگ سپی، چاودێریی ماڵ و ئۆتۆمبێلی محەمەد میرزا دەكەن".
بەپێی ڕاگەیەندراوەكەی ئەنجوومەنی ئاسایش، ئەو كەسانە "بە ژمارە ئۆتۆمبێلی ساختە و دوور لە چاوی كامێراكان لە ڕێگەیەكی لاوەكییەوە هاتوونەتە ناو شاری زاخۆ". دواتر "لە كاتژمێر چواری بەرەبەیان بۆمبێكی لكێنراو بە ئۆتۆمبێلەكەی عەمید محەمەد میرزاوە دەبەستن".
ئەنجوومەنی ئاسایش دەشڵێت "لە كاتژمێر 7:49 خولەكی هەمان ڕۆژ، لە شەقامێكی گشتی لە زاخۆ، لە ڕێگەی ڕیمۆت كۆنترۆڵەوە بۆمبەكە دەتەقێنرێتەوە".
شەوی 23-7-2023، لە شەقامێكی گشتیی زاخۆدا ئۆتۆمبێلی محەمەد میرزا یونسی 56 ساڵ و بەرپرسی پێشووی دەزگای پاراستنی پارتی لە زاخۆ، سووتا و خۆیشی گیانی لەدەست دا.
ئەنجوومەنی ئاسایش جەخت دەكاتەوە كە "دوای بەدواداچوون و لێكۆڵینەوە لەلایەن تیمەكانمانەوە، بەڵگەی پێویست لەبارەی ئەو كەس و گرووپەی تیرۆریستییەی بەم كردەوە تیرۆریستییە هەڵساون و لەلایەن پەكەكەوە نێردراون، لەبەردەستدایە".
لە ڕاگەیەندراوەكەدا دەستگیركردنی هیچ تۆمەتبارێك ڕانەگەیەندراوە و ناسنامەی هیچ تۆمەتبارێكیش ئاشكرا نەكراوە، بەڵام ئەنجوومەنی ئاسایش دەڵێت "بكەرانی ئەم كردەوە تیرۆریستییە لە هەركوێیەك بن، باجی ئەم كردەوە ترسنۆكانەیان دەدەن و لەو بارەیەشەوە ڕێوشوێنی گونجاو گیراوەتە بەر".
"زانیاریی تەواومان هەبوو كە لە ماوەی ڕابردوودا سەركردایەتیی پەكەكە پیلانیان بۆ بەئامانجگرتنی ژمارەیەك لە ئەفسەرانی دەزگاكانی ئاسایشی هەرێم و هێزە سەربازییەكانی دیكە داڕشتبوو"، ئەنجوومەنی ئاسایشی هەرێم وا دەڵێت.
ئەنجوومەنی ئاسایشی هەرێم دەشڵێت "پەكەكە بەمەبەستی جێبەجێكردنی پیلانەكانی چەندین مەفرەزەی خۆی ڕاسپاردووە و ڕاهێنانیان لەسەر دروستكردن، دانان و لكاندنی بۆمب پێ كردوون، هەوڵی دەربازبوونیان بۆ ناو هەرێمی كوردستان داوە".
پێشتر مەسروور بارزانی لە پرسەنامەیەكدا كە ئاراستەی بنەماڵەی (محەمەد میرزا یونس)ی كرد، ڕووداوی سووتاندنی ئۆتۆمبێلەكەی و گیانلەدەستدانی بە "تەقینەوە" ناو برد و وتی "دامودەزگا پەیوەندیدارەكانم ڕاسپاردووە لێكۆڵینەوەیەكی ورد لەم ڕووداوە بكەن و ئەو دەستانە ئاشكرا بكەن كە لە پشت ئەم تاوانەوەن".