پەرەگراف
دەستەی داكۆكی لە مافی مامۆستایانی پارێزگای هەڵەبجە، پاش بەڵێنەكانی ئەمڕۆی قوباد تاڵەبانی، شكاندنی بایكۆتی ڕاگەیاند و دەڵێت "لێرە بەدواوە چاودێریی وردی ئەم بڕیارە دەكەین".
دەستەكە دەڵێت "ئێمە هەر سەرنجێكمان لەسەر ئەم ڕاگەیەندراوەی جێگری سەرۆكی حكومەت هەبێت، پێمان وایە بەری ڕەنجی ماندووبوونی زیاتر لە پێنج مانگ خەباتی بەردەوامی چواردە شار و شارۆچكەی پارێزگاكانی سلێمانی و هەڵەبجە و ئیدارەكانی گەرمیان و ڕاپەڕین و قەزای كۆیەیە لە پارێزگای هەولێر".
قوباد تاڵەبانی، جێگری سەرۆكی حكومەتی هەرێم، ئەمڕۆ لەگەڵ ژمارەیەك مامۆستای ناڕازی لە سلێمانی كۆبووەوە و دواتر ڕایگەیاند "لە دیدارم لەگەڵ ژمارەیەك لە مامۆستای ناڕازیی بەڕێز، بڕیاری حكومەتی هەرێمم بۆ دووپات كردنەوە كە؛ بە هەمواری یاسای بودجەی فیدراڵی، پلەی مامۆستایانی شایستە بەرز دەكرێتەوە و وانەبێژەكانیش دەكرێنە گرێبەستی ڕەسمی بەپێی ڕێكار و یاسا بەركارەكان و ساڵانی خزمەت، بەردەوامیش لەخەت دەبین بۆ جێبەجێ كردنی داوا رەواكانیان".