بەغداد بۆرییەكەی خۆی بۆ هەناردەكردنی نەوتی كەركووك دەخاتەوە كار؛ هەرێم 'تووڕە' دەكات و داوایەكی ڕەت دەكاتەوە
پەرەگراف
حكومەتی عێراق داوایەكی هەرێمی كوردستان بۆ بەكارهێنانی بۆریی نەوتی هەرێم بۆ هەناردەكردنی نەوتی كەركووك ڕەت دەكاتەوە و بۆریی نەوتی كەركووك - جەیهانی خۆی نۆژەن دەكاتەوە كە بە "جێگرەوە"ـی بۆریی نەوتی هەرێمی كوردستان - توركیا ناو دەبرێت.
بەمنزیكانە بۆرییەكەی عێراق دەكەوێتە كار و ئەم هەنگاوەی بەغداد زیاتر وەزارەتی نەوتی عێراق لە پشتبەستن بە بۆرییەكەی هەرێم دوور دەخاتەوە. ئاژانسی هەواڵی ڕۆیتەرز دەڵێت "ڕەنگە ئەم هەنگاوەی عێراق، هەرێمی كوردستان و كۆمپانیا نەوتییەكان تووڕە بكات".
باسم محەمەد، بریكاری وەزارەتی نەوتی عێراق، بە ئاژانسی ڕۆیتەرزی ڕاگەیاندووە، سەرقاڵی نۆژەنكردنەوەی بۆرییەكەن و لە كۆتایی ئەم مانگەوە دەتوانن "ڕۆژانە 350 هەزار بەرمیل نەوت"ـی كێڵگەكانی كەركووك هەناردەی توركیا بكەن.
هاوكات دوو بەرپرسی وەزارەتی نەوتی عێراق كە نەیانویستووە ناویان بهێنرێت، ئاشكرایان كردووە كە بەغداد داوایەكی هەرێمی كوردستانی ڕەت كردووەتەوە، كە داوای كردووە شەش دۆلار وەكوو كرێی گواستنەوەی هەر بەرمیلێك نەوت بداتە كۆمپانیای ڕووسنەفتی ڕووسی، كە یەكێكە لە خاوەنەكانی بۆریی نەوتی هەرێم.
بۆرییەكە زیاتر لە 10 ساڵە لەكار كەوتووە و نەوتی پێدا هەناردە نەكراوە، بەگەڕخستنەوەی دەبێتە ڕكابەرێكی بەهێز بۆ بۆریی نەوتی هەرێمی كوردستان - توركیا، كە بەرپرسانی هەرێم چاویان لەوەیە بۆرییەكەیان لەلایەن عێراقەوە بۆ هەناردەی نەوت پشتی پێ ببەسترێت.
پێشتر عێراق نەوتی كەركووكی لە ڕێگەی بۆرییەكەی خۆیەوە هەناردە دەكرد، بەڵام بە هاتنی داعش لە 2014 بۆرییەكە لەكار كەوت، پاش كۆنترۆڵكردنی كەركوویش لەلایەن پێشمەرگەوە، كێڵگە نەوتییەكان كەوتنە دەستی هەرێم و نەوتی كەركووك لەڕێگەی بۆریی نەوتی هەرێمی كوردستان - توركیاوە هەناردە كرا، تا لە 16ـی ئۆكتۆبەری 2017 عێراق گەڕایەوە كەركووك و كۆنترۆڵی كێڵگە نەوتییەكانی جگە لە خورمەڵە، گرتەوە دەست.
عێراق ماوەیەك نەوتی كەركووكی لەڕێگەی بۆریی هەرێمی كوردستانەوە هەناردە كرد تا دواجار لە 25ـی ئاداری 2023 لەگەڵ هەناردەی نەوتی هەرێمدا هەناردەی نەوتی كەركوویش ڕاگیرا. ئێستا عێراق دەیەوێت بۆرییەكەی خۆی بخاتەوە گەڕ بۆ هەناردەكردنەوەی نەوتی كەركووك.
لەلایەكی دیكە كێشەی دەستپێكردنەوەی هەناردەی نەوتی هەرێم وەكوو خۆی ماوە و بەغداد سوورە لەسەر گرێبەستی نوێ لەگەڵ كۆمپانیا نەوتییەكان، بۆ جۆرێك هاوشێوەی گرێبەستەكانی دیكەی لەگەڵ كۆمپانیا نەوتییەكان بێت كە لە جۆری (خزمەتگوزاری)ن، بەڵام كۆمپانیا بیانییەكانی نەوت لە هەرێمی كوردستان جەخت لەسەر گرێبەستە كۆنەكانیان دەكەنەوە كە لە جۆری (هاوبەشی)یە و پشكیان لە نەوتی هەرێمدا هەیە، لەو ڕووەوە چوار مەرجیان بۆ بەغداد خستووەتە ڕوو.